AKP ភ្នំពេញ ថ្ងៃទី១១ ខែមិថុនា ឆ្នាំ២០២៦--ឯកឧត្តមបណ្ឌិតសភាចារ្យ ហ៊ាន សាហ៊ីប ទីប្រឹក្សាសម្តេចធិបតីនាយករដ្ឋមន្រ្តី និង​ជាប្រធានក្រុមការងារជំរុញការ​វិនិយោគ​ក្នុង​ភូមិ​ភាគឦសាន “ក.វ.ឦសាន” បានដឹកនាំកិច្ចប្រជុំលេខាធិការដ្ឋានក្រុមការងារ ក្នុងគោលបំណងពិនិត្យវឌ្ឍនភាពការងារប្រចាំឆមាសទី ១ ឆ្នាំ ២០២៦ នៃការ​អនុវត្តកម្ម​វិធីពិ​សេស​ជំរុញ​ការវិនិ​យោគ​ក្នុងខេត្តទាំងបួននៅភូមិភាគឦសាន នៃព្រះរាជាណាចក្រកម្ពុជា និង ដាក់ចេញទិសដៅអាទិភាពការងារបន្ត ។ កិច្ចប្រជុំនេះបានប្រព្រឹត្តទៅនៅថ្ងៃទី១០ ខែមិថុនា ឆ្នាំ២០២៦ ដោយមានការអញ្ជើញចូលរួមពី ប្រធាន អនុប្រធាន ទីប្រឹក្សា និង សមាជិក សមាជិកាពាក់ព័ន្ធ នៃលេខាធិការដ្ឋានក្រុមការងារ។

ឯកឧត្តមបណ្ឌិតសភាចារ្យ បានផ្តល់អនុសាសន៍ជូនលេខាធិការដ្ឋានក្រុមការងារ ឱ្យបន្តយុទ្ធនាការផ្សព្វផ្សាយកម្មវិធីពិសេស និង ពង្រីកទំនាក់ទំនង ជាមួយវិនិយោគិន និង ភាគីពាក់ព័ន្ធ ដើម្បីជំរុញការវិនិយោគ និង ដោះស្រាយបញ្ហាប្រឈមជូនវិនិយោគិន ដោយផ្សារភ្ជាប់ជាមួយ ការសម្របសម្រួលការអនុវត្តគម្រោងវិនិយោគជាប្រចាំ ដើម្បីលើកកម្ពស់ប្រសិទ្ធភាព នៃ​គោ​ល​​ការណ៍លើកទឹកចិត្ត, ការសម្រួលនីតិវិធី និង ការទទួលបានហិរញ្ញប្បទានសម្រាប់ការវិនិយោគ បានឆាប់រហ័ស ស្របតាមអភិក្រម “ជវភាពនៃប្រព័ន្ធតួអង្គតែមួយ” ។

ឯកឧត្តមប្រធានក្រុមការងារ “ក.វ.ឦសាន”  បានណែនាំឱ្យលេខាធិការដ្ឋានក្រុមការងារ ចាប់ផ្តើមគម្រោងសិក្សាស្រាវជ្រាវ អំពីការជំរុញការវិនិយោគលើការកែច្នៃកសិផល និង វិស័យ​ទេស​ចរ​ណ៍ នៅភូមិភាគឦសាន ឱ្យបានគ្រប់ជ្រុងជ្រោយ ដើម្បីកំណត់បញ្ហាប្រឈមចំពោះមុខ ជាពិសេស ក្នុងបរិការណ៍ដែលពិភពលោកទាំងមូល​ជួបប្រទះនឹងប​ញ្ហានៃ​ការ​កើនឡើងថ្លៃប្រេងឥន្ធនៈ និង ជីកសិកម្ម ព្រមទាំង រៀបចំជាយុទ្ធសាស្ត្រសម្រាប់ដោះស្រាយបញ្ហាប្រឈមរយៈពេលមធ្យម ដើម្បីជាមូលដ្ឋានសម្រាប់​ការស្នើសុំវិធាន​ការ​ដោះ​ស្រាយសមស្រប ៕

ដោយ៖ ទូច វលក័្ខណ (ប្រភព៖ក្រសួងសេដ្ឋកិច្ច)