AKP កំពង់ស្ពឺ  ថ្ងៃទី១១ ខែមិថុនា ឆ្នាំ២០២៦--លោក ហន ភក្តី អភិបាលរងនៃគណៈអភិបាលខេត្តកំពង់ស្ពឺ បានអញ្ជើញជាអធិបតីភាពក្នុងពិធីអបអរសាទរទិវាបរិស្ថានជាតិ និងបរិស្ថានពិភពលោក ៥មិថុនា ២០២៦ ក្រោមប្រធានបទ «សំណល់សូន្យ»  ដោយមានការអញ្ជើញចូលរួមពីលោកប្រធានមន្ទីរបរិស្ថានខេត្ត ប្រធានមន្ទីរអង្គភាពនានាជុំវិញខេត្ត កងកម្លាំងទាំង៣ តំណាងមកពីក្រុង/ស្រុកទាំង៩ សិស្សានុសិស្ស សរុបប្រមាណជាង១៥០០នាក់  នៅបរិវេណសួនសម្តេចព្រះសង្ឃរាជ ជួន ណាត ស្ថិតនៅភូមិទួលគក សង្កាត់ច្បារមន ក្រុងច្បារមន ខេត្តកំពង់ស្ពឺ នាថ្ងៃទី១១ ខែមិថុនា ឆ្នាំ២០២៦។

ក្នុងឱកាសនោះដែរ លោក ហន ភក្តី អភិបាលរងខេត្ត បានសម្តែងនូវការកោតសរសើរ និងវាយតម្លៃខ្ពស់ចំពោះមន្ទីរបរិស្ថានខេត្ត អាជ្ញាធរក្រុង/ស្រុក និងគ្រប់ផ្នែកពាក់ព័ន្ធទាំងអស់ ដែលបានសហការគ្នាយ៉ាងសកម្មក្នុងការរៀបចំដាស់តឿន និងបំផុសស្មារតីជាសាធារណៈឱ្យយល់ដឹងកាន់តែច្បាស់ពីបញ្ហាបរិស្ថាន។ លោកបានសង្កត់ធ្ងន់ថា ប្រធានបទ «សំណល់សូន្យ» ក្នុងឆ្នាំនេះ គឺជារូបភាពឆ្លុះបញ្ចាំងយ៉ាងសំខាន់ក្នុងការជំរុញឱ្យមានការកាត់បន្ថយ ការប្រើប្រាស់ឡើងវិញ និងការកែច្នៃកាកសំណល់ ដើម្បីឈានទៅរកការគ្រប់គ្រងសម្រាមប្រកបដោយនិរន្តរភាព និងការលុបបំបាត់សំណល់ឱ្យអស់ពីសហគមន៍។

ជាមួយគ្នានោះដែរ លោកអភិបាលរងខេត្ត បានដាក់ទិសដៅណែនាំដល់មន្ទីរបរិស្ថានខេត្ត ត្រូវសហការជាមួយមន្ទីរការងារ និងបណ្តុះបណ្តាលវិជ្ជាជីវៈខេត្ត ចុះធ្វើការផ្សព្វផ្សាយ និងអប់រំណែនាំដល់ម្ចាស់រោងចក្រ សហគ្រាស ព្រមទាំងបងប្អូនកម្មករ កម្មការិនីទាំងអស់ឱ្យយល់ដឹងកាន់តែច្បាស់ពីការគ្រប់គ្រងសំណល់រឹង-រាវ ការញែកសម្រាម និងការថែរក្សាអនាម័យបរិស្ថាននៅតាមខ្សែច្រវាក់ផលិតកម្ម និងជុំវិញបរិវេណរោងចក្រ ដើម្បីធានាបាននូវបរិស្ថានការងារល្អ និងមិនមានការបង្ហូរ ឬបោះចោលសំណល់ពាសវាលពាសកាល។

លោកអភិបាលរងខេត្ត សូមអំពាវនាវ ដល់បងប្អូនប្រជាពលរដ្ឋ អាជីវករ យុវជន និងក្មួយៗសិស្សានុសិស្សទាំងអស់ ចូលរួមផ្លាស់ប្តូរឥរិយាបថរស់នៅ ដោយចាប់ផ្តើមពីខ្លួនយើងផ្ទាល់ ក្នុងការទុកដាក់សម្រាមឱ្យបានត្រឹមត្រូវតាមកន្លែងកំណត់ ញែកសំណល់តាមប្រភេទ និងរួមគ្នាកាត់បន្ថយការប្រើប្រាស់ថង់ប្លាស្ទិក ដើម្បីលើកកម្ពស់សោភណភាព និងបរិស្ថានក្នុងខេត្តកំពង់ស្ពឺ ឱ្យកាន់តែមានភាពបៃតង ស្អាត និងមានខ្យល់អាកាសបរិសុទ្ធ។

‎គួរបញ្ជាក់ផងដែរថា នៅក្នុងពិធីអបអរសាទរនេះក៏មានការដើរក្បួន និងសកម្មភាពរួមគ្នាប្រមូលសម្រាម សម្អាតអនាម័យនៅតាមទីសាធារណៈ ដើម្បីជាការដាស់ស្មារតីដល់ប្រជាពលរដ្ឋទូទៅ ឱ្យចូលរួមថែរក្សាអនាម័យបរិស្ថានទាំងអស់គ្នាផងដែរ៕

ដោយ ម៉ែន ប៊ុនធីម