AKP ភ្នំពេញ ថ្ងៃទី០៥ ខែមិថុនា ឆ្នាំ២០២៦ -- ក្រសួងការបរទេសទីក្រុងសេអ៊ូលបាននិយាយថា អនុរដ្ឋមន្ត្រីការបរទេសកូរ៉េខាងត្បូង និងនូវែលសេឡង់ បានជួបប្រជុំគ្នានៅទីក្រុងសេអ៊ូល កាលពីថ្ងៃព្រហស្បតិ៍ ហើយបានពិភាក្សាអំពីវិធីជំរុញកិច្ចសហប្រតិបត្តិការក្នុងវិស័យថាមពល និងវិស័យផ្សេងទៀតដែលមានផលប្រយោជន៍ទៅវិញទៅមក ចំពេលមានជម្លោះនៅតំបន់មជ្ឈិមបូព៌ា។

យោងតាមក្រសួងបានឱ្យដឹងថា ក្នុងអំឡុងពេលនៃកិច្ចប្រជុំនេះ អនុរដ្ឋមន្ត្រីការបរទេសទីមួយរបស់កូរ៉េខាងត្បូង គឺលោក ផាក យ៊ូនជូ (Park Yoon-joo) និងអនុរដ្ឋមន្ត្រីការបរទេស និងពាណិជ្ជកម្មនូវែលសេឡង់ គឺលោក បេដេ ក័ររី (Bede Corry) បានផ្លាស់ប្តូរទស្សនៈលើបញ្ហាសំខាន់ៗក្នុងតំបន់ និងអន្តរជាតិ រួមទាំងជម្លោះនៅតំបន់មជ្ឈិមបូព៌ា និងការអភិវឌ្ឍនៅលើឧបទ្វីបកូរ៉េ និងប្រទេសកោះប៉ាស៊ីហ្វិក។

លោក ផាក បាននិយាយថា កិច្ចប្រជុំនេះមានអត្ថន័យ ព្រោះវាជាការពិគ្រោះយោបល់កម្រិតកំពូលទ្វេភាគីលើកដំបូងរវាងក្រសួងការបរទេសទាំងពីរ ចាប់តាំងពីប្រទេសទាំងពីរបានបង្កើតភាពជាដៃគូយុទ្ធសាស្ត្រដ៏ទូលំទូលាយកាលពីឆ្នាំមុន។

ដោយកត់សម្គាល់ថា ប្រទេសកូរ៉េខាងត្បូងគឺជាអ្នកផ្គត់ផ្គង់ផលិតផលប្រេងចម្រាញ់ធំជាងគេរបស់ប្រទេសនូវែលសេឡង់ លោក ក័ររី បានអំពាវនាវឱ្យមានការសម្របសម្រួលយ៉ាងជិតស្និទ្ធរវាងភាគីទាំងពីរលើបញ្ហាផ្គត់ផ្គង់ថាមពល ចំពេលមានវិបត្តិនៅតំបន់មជ្ឈិមបូព៌ា។

ក្រសួងបាននិយាយថា លោក ក័ររី ក៏បានសង្កត់ធ្ងន់លើសារៈសំខាន់កាន់តែខ្លាំងឡើងនៃការទំនាក់ទំនងយ៉ាងជិតស្និទ្ធរវាងប្រទេសដែលមានគំនិតដូចគ្នា ចំពេលមានភាពមិនប្រាកដប្រជាកាន់តែខ្លាំងឡើងនៅក្នុងកាលៈទេសៈសកល៕

ដោយ៖ មូល មិនា (ប្រភព៖ យ៉ុនហាប់)