AKP បន្ទាយមានជ័យ ថ្ងៃទី០៤ ខែមិថុនា ឆ្នាំ២០២៦--ឯកឧត្តម ប្លែក វ៉ារី ប្រធានក្រុមប្រឹក្សាខេត្តបន្ទាយមានជ័យបានថ្លែងការកោតសរសើរចំពោះកិច្ចខិតខំប្រឹងប្រែងរបស់រដ្ឋបាលខេត្តកន្លងមក ប៉ុន្តែឯកឧត្តមបានដាក់ការក្រើនរម្លឹកយ៉ាងមុតមាំទៅដល់មន្ត្រីរាជការគ្រប់លំដាប់ថ្នាក់ ពិសេសអាជ្ញាធរមូលដ្ឋាន ត្រូវបង្កើនស្មារតីទទួលខុសត្រូវខ្ពស់ក្នុងការបំពេញតួនាទី។ការថ្លែងយ៉ាងដូច្នេះបានធ្វើឡើង នៅព្រឹកថ្ងៃទី០៤ ខែមិថុនា ឆ្នាំ២០២៦ ក្នុងឱកាសដែលឯកឧត្តម ប្លែក វ៉ារី បានដឹកនាំកិច្ចប្រជុំសាមញ្ញលើកទី២៥ អាណត្តិទី៤ ក្រោមការចូលរួមពីលោក លី សុវណ្ណារិទ្ធិ អភិបាលរងខេត្ត តំណាងឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ ព្រមទាំងថ្នាក់ដឹកនាំមន្ទីរ អង្គភាព និងអភិបាលក្រុង-ស្រុកជាច្រើនរូបទៀត។

ឯកឧត្តមបានសង្កត់ធ្ងន់ថា ការផ្តល់សេវាសាធារណៈជូនប្រជាពលរដ្ឋ គឺជាកាតព្វកិច្ចចម្បងដែលមិនអាចខ្វះបាន មន្ត្រីត្រូវចាត់ទុក ទុក្ខលំបាករបស់ប្រជាពលរដ្ឋ ជាទុក្ខលំបាករបស់ខ្លួន ហើយត្រូវដោះស្រាយបញ្ហាឱ្យបានលឿន ច្បាស់លាស់ និងប្រកបដោយតម្លាភាព។

ឯកឧត្តមប្រធានក្រុមប្រឹក្សាខេត្តបន្ទាយមានជ័យ ក៏បានជំរុញឱ្យមន្ត្រីគ្រប់ផ្នែកបង្កើនប្រសិទ្ធភាពការងារ ពង្រឹងសាមគ្គីភាពផ្ទៃក្នុង និងត្រូវចុះជាប់ជាមួយមូលដ្ឋានដើម្បីក្តាប់ឱ្យជាប់នូវរាល់បញ្ហាប្រឈមរបស់ប្រជាពលរដ្ឋ ដើម្បីឆ្លើយតបបានទាន់ពេលវេលា។

ជាការឆ្លើយតបលោក លី សុវណ្ណារិទ្ធិ អភិបាលរងខេត្តបន្ទាយមានជ័យ បានទទួលយកនូវប្រសាសន៍ណែនាំដ៏ខ្ពង់ខ្ពស់របស់ឯកឧត្តមប្រធានក្រុមប្រឹក្សាខេត្ត ដើម្បីដាក់ចេញជាផែនការសកម្មភាពបន្ត។ លោកបានបញ្ជាក់ថា រដ្ឋបាលខេត្តនឹងបន្តយកចិត្តទុកដាក់ពង្រឹងយន្តការដោះស្រាយសេវារដ្ឋបាលឱ្យកាន់តែមានប្រសិទ្ធភាព ដើម្បីឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋនៅក្នុងខេត្ត។

កិច្ចប្រជុំនេះ បានធ្វើការពិនិត្យ ពិភាក្សា និងអនុម័តលើរបៀបវារៈសំខាន់ៗ រួមមាន៖
-ការពិនិត្យ និងអនុម័ត សេចក្តីព្រាងរបៀបវារៈនៃកិច្ចប្រជុំសាមញ្ញលើកទី២៥ អាណត្តិទី៤។
-ការពិនិត្យ និងអនុម័ត សេចក្តីព្រាងកំណត់ហេតុនៃកិច្ចប្រជុំសាមញ្ញលើកទី២៤ អាណត្តិទី៤។
-ការពិនិត្យ និងអនុម័តសេចក្តីព្រាងរបាយការណ៍សកម្មភាពប្រចាំខែឧសភា ឆ្នាំ២០២៦ របស់រដ្ឋបាលខេត្ត។
-ការពិនិត្យ និងអនុម័ត សេចក្តីព្រាងការបែងចែកប្រាក់រង្វាន់លើកទឹកចិត្តដែលបានមកពីការផ្តល់សេវារដ្ឋបាល ជូនដល់មន្ត្រី-បុគ្គលិកនៃរដ្ឋបាលខេត្តសម្រាប់ខែឧសភា ឆ្នាំ២០២៦ រួមជាមួយនឹងការពិនិត្យលើការប្រើប្រាស់ថវិកាសម្រាប់ពង្រឹងយន្តការរដ្ឋបាលខេត្ត។

កិច្ចប្រជុំបានបញ្ចប់ទៅដោយភាពជោគជ័យ និងមានការឯកភាពខ្ពស់ពីសមាជិកក្រុមប្រឹក្សាខេត្ត និងតំណាងមន្ទីរអង្គភាពនានា ដើម្បីបន្តជំរុញការអភិវឌ្ឍខេត្តបន្ទាយមានជ័យឱ្យកាន់តែរីកចម្រើនថែមទៀត៕

ដោយ ឈុន សារ៉ាត