AKP ព្រះសីហនុ ថ្ងៃទី0៤ ខែមិថុនា ឆ្នាំ២០២៦-- កម្លាំងគណៈបញ្ជាការឯកភាពរដ្ឋបាលក្រុងព្រះសីហនុ ដោយមានការសម្របសម្រួលនីតិវិធីពីតំណាងអយ្យការអមសាលាដំបូងខេត្តព្រះសីហនុកាលពីថ្ងៃពុធទី៣ ខែមិថុនា ឆ្នាំ២០២៦បានចុះធ្វើរដ្ឋបាលចំហទីតាំងអគារស្នាក់នៅមួយកន្លែង រកឃើញសម្ភារ និងវត្ថុជាឧបករណ៍អេឡិចត្រូនិចជាប់ពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យា (Online Scams) ស្ថិតនៅភូមិ៥ សង្កាត់លេខ៤ ក្រុងព្រះសីហនុ។

នៅក្នុងកិច្ចប្រតិបត្តិការធ្វើរដ្ឋបាលចំហនេះ កម្លាំងគណៈបញ្ជាការឯកភាពរដ្ឋបាលក្រុងព្រះសីហនុបានសម្រេចដកហូតវត្ថុតាងរួមមាន៖
-កុំព្យូទ័រយួរដៃចំនួន ១១៧គ្រឿង
-ទូរស័ព្ទដៃចំនួន ៤១៥គ្រឿង
-ធុង CPU ចំនួន ១៧គ្រឿង
- ម៉ូនីទ័រ Monitor ១៩គ្រឿង
-ម៉ូតូ ១៥គ្រឿង
ក្នុងប្រតិបត្តិការចុះធ្វើរដ្ឋបាលចំហនេះដែរ កម្លាំងគណៈបញ្ជាការឯកភាពរដ្ឋបាលក្រុងព្រះសីហនុ បានធ្វើការឃាត់ខ្លួនជនសង្ស័យចំនួន ១១១នាក់ ស្រី ៣៧នាក់ ក្នុងនោះជនជាតិឥណ្ឌូនេស៊ីចំនួន ១០៨នាក់ ត្រៀមបណ្តេញចេញពីព្រះរាជាណាចក្រកម្ពុជា។

ចំណែកជនសង្ស័យទាំង ០៣នាក់ផេ្សងទៀត រួមជាមួយវត្ថុតាង ត្រូវបានបញ្ជូនទៅកាន់ស្នងការដ្ឋាននគរបាលខេត្តព្រះសីហនុ ដើម្បីបន្តនីតិវិធីសាកសួរ និងកសាងសំណុំរឿងបញ្ជូនទៅកាន់សាលាដំបូងខេត្ត ដើម្បីចាត់វិធានការទៅតាមផ្លូវច្បាប់។

សូមរម្លឹកផងដែរថា កាលពីថ្ងៃទី២ ខែមិថុនា ឆ្នាំ២០២៦ កម្លាំងគណៈបញ្ជាការឯកភាពរដ្ឋបាលក្រុងកំពង់សោម ក៏បានចុះធ្វើរដ្ឋបាលចំហនៅផ្ទះវិទ្យា រកឃើញជនសង្ស័យចំនួន ២៦នាក់ ស្រី ៣នាក់ និងដកហូតវត្ថុតាងមានកុំព្យូទ័រ ទូរស័ព្ទ រថយន្ត និងម៉ូតូ ៕

ដោយ ងូ សុមុនី