AKP ភ្នំពេញ ថ្ងៃទី០១ ខែមិថុនា ឆ្នាំ២០២៦ -- ការផ្ទុះឡើងនៃជំងឺអេបូឡានាពេលបច្ចុប្បន្ននៅក្នុងខេត្តអ៊ីទូរី នៅភាគខាងកើតនៃសាធារណរដ្ឋប្រជាធិបតេយ្យកុងហ្គោ (DRC) កំពុងរីករាលដាលក្នុងអត្រាមួយដែលមិនធ្លាប់មានពីមុនមក។ នេះបើយោងតាមលោក អាលែន ហ្កុនហ្សាឡេស (Alain Gonzalez) អនុប្រធានប្រតិបត្តិការសម្រាប់អង្គការមនុស្សធម៌អន្តរជាតិគ្រូពេទ្យគ្មានព្រំដែន (MSF)។

លោកបានកត់សម្គាល់ខាងលើនេះក្នុងអំឡុងពេលដែលលោកបំពេញទស្សនកិច្ចទៅកាន់ទីក្រុងប៊ូនៀ ជាមួយអគ្គនាយកអង្គការសុខភាពពិភពលោក (WHO) លោក ធេដ្រូស អាដហាណូម ហ្កេប្រេយ៉េស៊ុស ដោយលោកបានបន្ថែមថា «មិនធ្លាប់មានករណីផ្ទុះឡើងនៃជំងឺអេបូឡាច្រើនយ៉ាងនេះទេ បន្ទាប់ពីការប្រកាសរបស់វា»។

យោងតាមអ្នកជំនាញរូបនេះ បានឱ្យដឹងថា ពីរសប្តាហ៍បន្ទាប់ពីការផ្ទុះឡើងនៃជំងឺនេះត្រូវបានប្រកាស ស្ថានភាពនៅតែជាប្រភពនៃការព្រួយបារម្ភយ៉ាងខ្លាំង ហើយការឆ្លើយតបនៅតែយឺតយ៉ាវជាងល្បឿននៃការរីករាលដាលនៃជំងឺនេះ។

អ្នកនាំពាក្យអង្គការ MSF បានកត់សម្គាល់ថា «ករណីសង្ស័យថ្មីកំពុងត្រូវបានរាយការណ៍ជារៀងរាល់ថ្ងៃ ប៉ុន្តែសំណាករាប់រយនៅតែមិនទាន់បានធ្វើតេស្ត»។

លោក ហ្កុនហ្សាឡេស បានសង្កត់ធ្ងន់ថា «ក្នុងពេលជាមួយគ្នានេះ ការរឹតបន្តឹងធំៗ រួមទាំងការបិទព្រំដែន និងអាកាសយានដ្ឋាន បន្តពន្យារពេលការទៅដល់នៃសម្ភារៈវេជ្ជសាស្ត្រសំខាន់ៗ ជំនួយមនុស្សធម៌ និងបុគ្គលិកឯកទេស។ យើងដឹងពីបទពិសោធន៍ថា វិធានការទាំងនេះរារាំងយ៉ាងខ្លាំងដល់ការឆ្លើយតបនៃការផ្ទុះឡើង និងធ្វើឱ្យប្រទេសដែលត្រូវការការគាំទ្រពីអន្តរជាតិឯកោភ្លាមៗ»។

អង្គការនេះបានអំពាវនាវឱ្យមានការពង្រីកសមត្ថភាពធ្វើតេស្តជាបន្ទាន់បង្កើនការគាំទ្រផ្នែកវេជ្ជសាស្ត្រ និងមនុស្សធម៌អន្តរជាតិ និងការចូលទៅកាន់តំបន់ដែលរងផលប៉ះពាល់ដោយគ្មានការរារាំង។

អាជ្ញាធរសាធារណរដ្ឋប្រជាធិបតេយ្យកុងហ្គោ បានប្រកាសពីការផ្ទុះឡើងនៃជំងឺអេបូឡានៅថ្ងៃទី១៥ ខែឧសភា។ ជំងឺនេះបណ្តាលមកពីមេរោគអេបូឡា-ប៊ុនឌីប៊ូហ្គីយ៉ូ ដែលត្រូវបានរកឃើញជាលើកដំបូងនៅក្នុងប្រទេសអ៊ូហ្គង់ដាក្នុងឆ្នាំ២០០៧។ ចំណុចកណ្តាលនៃការផ្ទុះឡើងនាពេលបច្ចុប្បន្ន គឺខេត្តអ៊ីទូរីនៅភាគខាងកើតនៃប្រទេស ដោយខេត្តគីវូខាងជើង និងខាងត្បូងក៏រងផលប៉ះពាល់ផងដែរ។ រហូតមកដល់បច្ចុប្បន្ន មានករណីសង្ស័យថាមានការឆ្លងជាង ១.០០០ករណី និងករណីសង្ស័យថាមានអ្នកស្លាប់ប្រហែល ២៤០នាក់ត្រូវបានចុះបញ្ជីនៅសាធារណរដ្ឋប្រជាធិបតេយ្យកុងហ្គោ៕

ដោយ៖ យា ចិន្ដាខន្ដី (ប្រភព៖ តាសស៍)