AKP បន្ទាយមានជ័យ ថ្ងៃទី៣០ ខែឧសភា ឆ្នាំ២០២៦–ថ្នាក់ដឹកនាំជាន់ខ្ពស់នៃគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា និងរដ្ឋបាលខេត្តបន្ទាយមានជ័យ បានបង្ហាញជំហរដាច់ខាតក្នុងការរួមគ្នាបោសសម្អាត និងបង្ក្រាបរាល់ទម្រង់នៃបទល្មើសឆបោកតាមប្រព័ន្ធអនឡាញ (Online Scams) ដើម្បីធានាសន្តិសុខ សណ្តាប់ធ្នាប់សង្គម និងរក្សាភាពស្អាតស្អំនៅតាមតំបន់ព្រំដែន។
ការប្ដេជ្ញាចិត្តនេះ ត្រូវបានធ្វើឡើងនៅក្នុងកិច្ចប្រជុំបូកសរុបការងារអនុវត្តយុទ្ធនាការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា នៅក្នុងភូមិសាស្ត្រខេត្តបន្ទាយមានជ័យ ក្រោមអធិបតីភាព ឯកឧត្តមនាយឧត្តមសេនីយ៍ ជួន សុវណ្ណ រដ្ឋមន្ត្រីប្រតិភូអមនាយករដ្ឋមន្ត្រី និងជាអនុប្រធានលេខាធិការដ្ឋាន នៃគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា និង ឯកឧត្ដម អ៊ុ រាត្រី អភិបាល នៃគណៈអភិបាលខេត្តបន្ទាយមានជ័យ។
កិច្ចប្រជុំដ៏មានសារៈសំខាន់នេះ ត្រូវបានប្រារព្ធធ្វើឡើងនៅសាលប្រជុំ «ក» សាលាខេត្តបន្ទាយមានជ័យ នាថ្ងៃទី៣០ ខែឧសភា ឆ្នាំ២០២៦ ដោយមានការអញ្ជើញចូលរួមពី ឯកឧត្តមឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិ និងជាអនុប្រធានលេខាធិការដ្ឋាន, ប្រតិភូអមដំណើរ, ថ្នាក់ដឹកនាំសាលាដំបូងខេត្ត, គណៈអភិបាលរងខេត្ត, មេបញ្ជាការកងកម្លាំងគ្រប់ប្រភេទ, អភិបាលក្រុង-ស្រុកទាំង៩ ព្រមទាំងសមត្ថកិច្ចពាក់ព័ន្ធសរុបជាង ២០០នាក់។

      នៅក្នុងឱកាសនោះ ឯកឧត្តមនាយឧត្តមសេនីយ៍ ជួន សុវណ្ណបានមានប្រសាសន៍សង្កត់ធ្ងន់ថា បទល្មើសឆបោកតាមប្រព័ន្ធបច្ចេកវិទ្យា (Online Scams) មិនត្រឹមតែជាការបំផ្លិចបំផ្លាញដល់ទ្រព្យសម្បត្តិរបស់ប្រជាពលរដ្ឋប៉ុណ្ណោះទេ ប៉ុន្តែវាក៏ជាការគំរាមកំហែងដល់សន្តិសុខជាតិ និងមុខមាត់របស់ប្រទេសជាតិនៅលើឆាកអន្តរជាតិផងដែរ។ ឯកឧត្តមបានវាយតម្លៃខ្ពស់ចំពោះកិច្ចខិតខំប្រឹងប្រែងរបស់កងកម្លាំងសមត្ថកិច្ចគ្រប់លំដាប់ថ្នាក់ក្នុងខេត្តបន្ទាយមានជ័យ នាពេលកន្លងមក ដែលបានបើកប្រតិបត្តិការស្រាវជ្រាវ និងបង្ក្រាបលើករណីទាំងនេះជាបន្តបន្ទាប់។

        ទន្ទឹមនឹងនេះ ឯកឧត្តមនាយឧត្តមសេនីយ៍ ជួន សុវណ្ណ បានដាក់ទិសដៅយ៉ាងម៉ឺងម៉ាត់ដល់អាជ្ញាធរ និងសមត្ថកិច្ចពាក់ព័ន្ធទាំងអស់ ត្រូវបន្តពង្រឹងការងារគ្រប់គ្រងសហគ្រាស ទីតាំងអាជីវកម្មអនឡាញ និងស្នាក់នៅរបស់ជនបរទេសឱ្យបានហ្មត់ចត់បំផុត។ ឯកឧត្តមបានរំលឹកថា ត្រូវអនុវត្តច្បាប់ឱ្យបានតឹងរ៉ឹង ដោយគ្មានការលើកលែង ឬយោគយល់ឡើយ ចំពោះបុគ្គល ឬមេខ្លោងទាំងឡាយណាដែលនៅពីក្រោយខ្នងនៃអាជីវកម្មខុសច្បាប់ទាំងនេះ។
        មានប្រសាសន៍ឡើងវិញនៅក្នុងកិច្ចប្រជុំនោះដែរ ឯកឧត្ដម អ៊ុ រាត្រី អភិបាលខេត្តបន្ទាយមានជ័យ បានសម្តែងនូវការគាំទ្រយ៉ាងពេញទំហឹងចំពោះយុទ្ធនាការថ្នាក់ជាតិមួយនេះ។ ឯកឧត្តមបានបញ្ជាក់ថា ក្នុងនាមជាខេត្តជាប់ព្រំដែន ដែលមានការអភិវឌ្ឍសេដ្ឋកិច្ច និងលំហូរជនបរទេស រដ្ឋបាលខេត្តតែងតែយកចិត្តទុកដាក់ខ្ពស់លើបញ្ហាសន្តិសុខប្រព័ន្ធបច្ចេកវិទ្យា។

      ឯកឧត្ដម អ៊ុ រាត្រី បានថ្លែងថា រដ្ឋបាលខេត្ត និងកងកម្លាំងប្រដាប់អាវុធគ្រប់ប្រភេទ ប្ដេជ្ញាចិត្តយ៉ាងដាច់ខាតក្នុងការសហការជាធ្លុងមួយជាមួយគណៈកម្មការចំពោះកិច្ចថ្នាក់ជាតិ ដើម្បីកម្ទេច និងលុបបំបាត់រាល់សម្បុកបទល្មើសឆបោកតាមប្រព័ន្ធបច្ចេកវិទ្យាក្នុងភូមិសាស្ត្រខេត្ត មិនឱ្យមានកន្លែងជ្រកកោនឡើយ។ ឯកឧត្តមអភិបាលខេត្ត ក៏បានជំរុញឱ្យអាជ្ញាធរក្រុង-ស្រុកទាំង៩ បង្កើនការផ្សព្វផ្សាយ និងអប់រំដល់ប្រជាពលរដ្ឋមូលដ្ឋាន ឱ្យមានការប្រុងប្រយ័ត្នខ្ពស់ កុំឱ្យធ្លាក់ក្នុងល្បិចកលបោកប្រាស់តាមប្រព័ន្ធតុលាការនិម្មិត ឬការវិនិយោគខ្យល់តាមអនឡាញ។

កិច្ចប្រជុំបូកសរុបពេញមួយថ្ងៃនេះ បានក្លាយជាវេទិកាដ៏មានសារៈសំខាន់ ក្នុងការត្រួតពិនិត្យឡើងវិញនូវចំណុចខ្លាំង ចំណុចខ្សោយ និងបញ្ហាប្រឈមនានា រួចដាក់ចេញនូវផែនការយុទ្ធសាស្ត្ររួមគ្នាមួយរវាងថ្នាក់ជាតិ និងថ្នាក់ក្រោមជាតិ ដើម្បីធានាថា យុទ្ធនាការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា នៅក្នុងខេត្តបន្ទាយមានជ័យ ទទួលបានលទ្ធផលកាន់តែមានប្រសិទ្ធភាព និងភាពស័ក្តិសិទ្ធិខ្ពស់ថែមទៀត ក្នុងបេសកកម្មគាំពារសុខសន្តិភាព និងស្ថិរភាពសង្គមជូនប្រជាពលរដ្ឋ៕
ដោយ៖ ឈុន សារ៉ាត