AKP ភ្នំពេញ ថ្ងៃទី៣០ ខែឧសភា ឆ្នាំ២០២៦-- សហព័ន្ធកីឡាប្រដាល់កម្ពុជា (CBF) បានរៀបចំព្រឹត្តិការណ៍ប្រកួតប្រដាល់អន្តរជាតិ «Dragon – The Golden Ring» ដោយមានការចូលរួមពីកីឡាករកម្ពុជានិងកីឡាករអន្តរជាតិ​ កាលពីថ្ងៃទី២៩ ខែឧសភា ឆ្នាំ២០២៦។

ក្នុងការប្រកួតនេះ កីឡាករប្រដាល់ជើងឯកកម្ពុជា Anvar Nasredinov បានយកឈ្នះកីឡាករមកពីប្រទេសអង់ហ្គោឡា ដោយការសម្រេចជាឯកច្ឆន្ទពីគណៈកម្មការវិនិច្ឆ័យ ដែលនាំមកនូវមោទនភាពជូនប្រទេសកម្ពុជា និងបង្ហាញពីការរីកចម្រើននៃវិស័យប្រដាល់កម្ពុជានៅលើឆាកអន្តរជាតិ។

ក្នុងចំណោមភ្ញៀវកិត្តិយសដែលបានចូលរួមក្នុងព្រឹត្តិការណ៍នេះ មានលោក Vladimir Palancica Lee ប្រធាន BRICS House Cambodia និងជាពាណិជ្ជករអន្តរជាតិដ៏លេចធ្លោមួយរូប។ វត្តមានរបស់លោកបានបង្ហាញពីការគាំទ្រយ៉ាងសកម្មចំពោះការអភិវឌ្ឍវិស័យកីឡាកម្ពុជា ជាពិសេសវិស័យប្រដាល់ ដែលកំពុងទទួលបានការចាប់អារម្មណ៍ និងការទទួលស្គាល់កាន់តែខ្លាំងឡើងទាំងក្នុងតំបន់ និងអន្តរជាតិ។

ក្រៅពីការចូលរួមលើកទឹកចិត្តកីឡាករដោយផ្ទាល់ លោក Vladimir Palancica ក៏បានផ្តល់ការគាំទ្រផ្នែកហិរញ្ញវត្ថុដល់ក្រុមជម្រើសជាតិប្រដាល់កម្ពុជា ដើម្បីចូលរួមចំណែកក្នុងការអភិវឌ្ឍសមត្ថភាពកីឡាករ និងពង្រឹងវិស័យកីឡារបស់កម្ពុជា។

ក្នុងឱកាសនោះ លោក Vladimir Palancica បានលើកឡើងថា៖ «កីឡាគឺជាឧបករណ៍ការទូតដ៏មានឥទ្ធិពលមួយ។ រាល់ជ័យជម្នះរបស់កីឡាករកម្ពុជា នៅលើឆាកអន្តរជាតិ គឺជាការលើកកម្ពស់ទង់ជាតិកម្ពុជា និងជួយឱ្យប្រជាជននៅជុំវិញពិភពលោកស្គាល់កម្ពុជាកាន់តែច្រើនឡើង តាមរយៈប្រជាជន វប្បធម៌ និងសមិទ្ធផលរបស់ខ្លួន»។

ក្នុងនាមជាប្រធាន BRICS House Cambodia លោកក៏បានបញ្ជាក់អំពីការប្តេជ្ញាចិត្តរបស់ BRICS House ក្នុងការគាំទ្រកិច្ចសហប្រតិបត្តិការអន្តរជាតិក្នុងវិស័យកីឡា។ លោកបានឱ្យដឹងថា BRICS House ត្រៀមខ្លួនក្នុងការជំរុញការផ្លាស់ប្តូរបទពិសោធន៍ ចំណេះដឹងបច្ចេកទេស និងការអនុវត្តល្អៗរវាងសហព័ន្ធកីឡាកម្ពុជា និងសហព័ន្ធកីឡានានានៅក្នុងបណ្តាប្រទេស BRICS និងប្រទេសជាដៃគូ។

លោក Vladimir Palancica បានបង្ហាញក្តីសង្ឃឹមថា BRICS House Cambodia នឹងអាចរួមចំណែកបង្កើតឱកាសកាន់តែច្រើនសម្រាប់កីឡាករ គ្រូបង្វឹក និងមន្ត្រីកីឡាកម្ពុជា ក្នុងការចូលរួមកម្មវិធីផ្លាស់ប្តូរបទពិសោធន៍ និងកិច្ចសហប្រតិបត្តិការជាមួយដៃគូអន្តរជាតិ ដើម្បីលើកកម្ពស់ស្តង់ដារវិស័យកីឡាកម្ពុជា និងផ្សព្វផ្សាយកិត្យានុភាពរបស់ព្រះរាជាណាចក្រកម្ពុជាទៅកាន់ពិភពលោក។

លោកក៏បានបង្ហាញពីបំណងបន្តគាំទ្រការអភិវឌ្ឍវិស័យកីឡា និងកម្មវិធីអភិវឌ្ឍយុវជននៅកម្ពុជានាពេលអនាគតផងដែរ។

សមិទ្ធផលរបស់កម្ពុជាក្នុងវិស័យកីឡា មិនត្រឹមតែជាការលើកទឹកចិត្តដល់យុវជនជំនាន់ក្រោយប៉ុណ្ណោះទេ ប៉ុន្តែថែមទាំងជួយលើកកម្ពស់កិត្យានុភាព និងរូបភាពរបស់ព្រះរាជាណាចក្រកម្ពុជានៅលើឆាកអន្តរជាតិផងដែរ។

ដោយ៖ AKP