AKP កំពង់ធំ ថ្ងៃទី៣០ ខែឧសភា ឆ្នាំ២០២៦--លោក អ៊ុត វណ្ណរ៉ា អភិបាលស្រុកកំពង់ស្វាយ អញ្ជើញសម្ពោធដាក់ឱ្យប្រើប្រាស់នូវអគារសិក្សា ១ខ្នង០៥បន្ទប់ និងសមិទ្ធផលនានារួមមាន÷បង្គន់អនាម័យ១ខ្នង០៣បន្ទប់ និងអណ្តូងទឹក០១កន្លែង ដែលជាអំណោយរបស់សប្បុរសជន សម្រាប់ប្រើប្រាស់ជាទ្រព្យសម្បត្តិរដ្ឋនៅសាលាបឋមសិក្សាសាន់គ នៅភូមិសាន់គ(ក) ឃុំសាន់គ ស្រុកកំពង់ស្វាយ ខេត្តកំពង់ធំ នាព្រឹកថ្ងៃទី៣០ ខែឧសភា ឆ្នាំ២០២៦ដោយមានការអញ្ជើញចូលរួមពីលោកលោកស្រីអភិបាលរងស្រុក មន្ត្រីសាលាស្រុក កងកម្លាំងទាំង៣ លោក មេឃុំ ម្ចាស់ជំនួយផ្តួចផ្តើមកសាងអគារសិក្សា នាយកសាលា លោកគ្រូអ្នកគ្រូ មាតាបិតាសិស្ស លោកយាយលោកតា និងសិស្សានុសិស្សប្រមាណជាង៧០០នាក់។

ឧបាសក តាប់ ម៉េងឡុង និងឧបាសិកា ហ៊ុយ គឹមហុង តំណាងឱ្យសប្បុរសជនទាំងអស់ បានលើកឡើងថា ការឧបត្ថម្ភថវិកា និងសម្ភារៈមួយចំនួន ដើម្បីកសាងសាលារៀននេះឡើង គឺដោយសារមានការបង្កើតគណៈកម្មការរៃអង្គាសថវិកា ដើម្បីគ្រប់គ្រងការប្រមូលថវិកា និងធានាតម្លាភាពក្នុងការប្រើប្រាស់ទៅតាមតម្រូវការគ្រប់ចំនួនហើយ ក៏ឯកភាពគ្នាកសាងជាសាលារៀន១ខ្នង០៥បន្ទប់នេះតែម្ដង។ ជាក់ស្ដែង នេះជាការគិតគូរមួយក្នុងការចូលរួមចំណែកការអភិវឌ្ឍសហគមន៍ឱ្យមានការរីកចម្រើននៅក្នុងវិស័យអប់រំ។

លោក អ៊ុត វណ្ណរ៉ា អភិបាលស្រុកកំពង់ស្វាយ បានផ្តាំផ្ញើដល់លោកនាយកសាលា លោកគ្រូអ្នកគ្រូនិងសិក្សានុសិស្សទាំងអស់ ដើម្បីឱ្យសមិទ្ធផលដ៏ធំធេងទាំងនេះ បន្តបម្រើផលប្រយោជន៍ដល់កូនចៅតទៅមុខទៀត៖១.សូមបន្តខិតខំប្រឹងប្រែងពង្រឹងគុណភាព នៃការបង្រៀនស្របតាមកំណែទម្រង់វិស័យអប់រំ ត្រូវរួមគ្នាថែរក្សាការពារអគារសិក្សាថ្មីនេះ ក៏ដូចជាហេដ្ឋារចនាសម្ព័ន្ធ បណ្តាញ ទឹក ស្អាត ភ្លើង និងបរិស្ថានបៃតងជុំវិញសាលា ឱ្យមានសោភ័ណភាព និងអនាម័យជាប់ជានិច្ច។ ២.បន្តជំរុញ និងតាមដានការសិក្សារបស់កូនចៅឱ្យបានដិតដល់។ ការផ្តល់ឱកាសឱ្យកូនរៀនសូត្រ គឺជាការកសាងអនាគតដ៏រឹងមាំសម្រាប់គ្រួសារ និងសហគមន៍។ ៣.អគារសិក្សាដ៏ស្អាត បរិស្ថានសាលាដ៏ល្អ ដែលមានទឹកស្អាត និងភ្លើងប្រើប្រាស់គ្រប់គ្រាន់នេះ គឺកើតចេញពីញើសឈាម និងការលះបង់ របស់ចាស់ទុំ គ្រូបង្រៀន និងសប្បុរសជន។ ដូច្នេះ ក្មួយៗត្រូវខិតខំប្រឹងប្រែងរៀនសូត្រ ឱ្យក្លាយជា "កូនល្អ សិស្សល្អ និងជាទំពាំងស្នងឫស្សីដ៏មានសមត្ថភាព”។

សូមបញ្ជាក់ផងដែរថា÷ សាលារៀន១ខ្នង០៥បន្ទប់ ដែលមានប្រវែង៤១ម៉ែត្រ ទទឹង៩ម៉ែត្រ និងកំពស់៦ម៉ែត្រ ដែលសម្ពោធដាក់ឱ្យប្រើប្រាស់មានការផ្តួចផ្ដើមកសាងដោយសប្បុរសជនរួមមាន÷១.លោក ហ៊ុយ អ៉ី និងលោកស្រី ចាយ គន្ធា(ហៅផើង)។២.ឧបាសក ចាយ គឹមសេង និងឧបាសិកា ហង្ស ផល្លី។៣.លោកគ្រូ ផូ ប៊ុនថា និងលោកស្រី គូ ជូរីន។៤.ឧបាសក ព្រំ តាំងអ៉ីម និងឧបាសិកា ង៉ោ ហុងកុង។៥.លោក ហេ ម៉េងឡៃ និងលោកស្រី គុយ ស៊ីណា។៦.ឧបាសក តាប់ ម៉េងឡុង និងឧបាសិកា ហ៊ុយ គឹមហុង។៧.លោក សៀន ឆេងកូ និងលោកស្រី ឈាត វណ្ណធីវ។៨.លោក ហង្ស ឫទ្ធី និងលោកស្រី ទិត្យ សុម៉ាលីនិងពុទ្ធបរិស័ទសុទ្ធ សប្បុរសជនជិតឆ្ងាយព្រមទាំងគណៈកម្មការគ្រប់គ្រងសាលា លោកនាយក លោកគ្រូអ្នកគ្រូមាតាបិតាសិស្សដែលចំណាយថវិកាអស់ ប្រមាណ៥៦៥០០ដុល្លារសហរដ្ឋអាមេរិក៕

ដោយ៖ ស៊ុម វណ្ណា