AKP ភ្នំពេញ ថ្ងៃទី២៩ ខែឧសភា ឆ្នាំ២០២៦ -- រុស្ស៊ី និងកាហ្សាក់ស្ថានបានចុះហត្ថលេខាលើឯកសារចំនួន១៥ ក្នុងអំឡុងពេលដំណើរទស្សនកិច្ចផ្លូវរដ្ឋរបស់ប្រធានាធិបតីរុស្ស៊ី លោក វ្ល៉ាឌីមៀរ ពូទីន ទៅកាន់ទីក្រុងអាស្តាណា។នេះបើយោងតាមការរាយការណ៍របស់អ្នកឆ្លើយឆ្លងព័ត៌មានស្ពុតនីក(Sputnik) កាលពីថ្ងៃព្រហស្បតិ៍។

លោក ពូទីន បានទៅដល់ទីក្រុងអាស្តាណាសម្រាប់ដំណើរទស្សនកិច្ចផ្លូវរដ្ឋនៅក្នុងប្រទេសកាហ្សាក់ស្ថានកាលពីថ្ងៃពុធ។ បន្ទាប់ពីពិធីជួបប្រជុំជាផ្លូវការ លោក ពូទីន និងប្រធានាធិបតីកាហ្សាក់ស្ថាន លោក កាស់ស៊ីម ចូម៉ាត តូកាយ៉េវ បានធ្វើកិច្ចចរចាទ្វេភាគី បន្ទាប់ពីនោះ ពិធីចុះហត្ថលេខាលើឯកសារមួយបានធ្វើឡើង។

ឯកសារដែលបានចុះហត្ថលេខារួមមាន កិច្ចព្រមព្រៀងប្តូរប្រាក់ និងអនុស្សរណៈ ស្តីពីការប្រយុទ្ធប្រឆាំងនឹងប្រតិបត្តិការក្លែងបន្លំ ដែលចុះហត្ថលេខាដោយធនាគាររុស្ស៊ី និងធនាគារជាតិកាហ្សាក់ស្ថាន។

លើសពីនេះ អាជ្ញាធរដឹកជញ្ជូនបានចុះហត្ថលេខាលើផែនការសកម្មភាពសម្រាប់ឌីជីថលូបនីយកម្មនៃវិស័យដឹកជញ្ជូន។ អង្គការឃ្លាំមើលអ្នកប្រើប្រាស់រុស្ស៊ី (Rospotrebnadzor) និងក្រសួងសុខាភិបាលកាហ្សាក់ស្ថាន បានចុះហត្ថលេខាលើផែនទីបង្ហាញផ្លូវសហប្រតិបត្តិការ។ភាគីទាំងពីរក៏បានអនុម័តផែនការសម្រាប់កិច្ចសហប្រតិបត្តិការអន្តរភ្នាក់ងារក្នុងបទប្បញ្ញត្តិសុវត្ថិភាពនុយក្លេអ៊ែរ និងវិទ្យុសកម្មសម្រាប់ឆ្នាំ២០២៦-២០៣០។

លោក ពូទីន និងលោក តូកាយ៉េវ ក៏បានចុះហត្ថលេខាលើសេចក្តីថ្លែងការណ៍រួម ដែលគូសបញ្ជាក់ពីគោលការណ៍ចំនួនប្រាំពីរនៃមិត្តភាព និងទំនាក់ទំនងល្អរវាងប្រជាជនរុស្ស៊ី និងកាហ្សាក់ស្ថានផងដែរ។

សេចក្តីថ្លែងការណ៍​នេះ​បាននិយាយ​ថា ទីក្រុងមូស្គូ និង​ទីក្រុងអាស្តាណាក៏បានទទួលស្គាល់​តួនាទី​សំខាន់​របស់​អង្គការ​សន្ធិសញ្ញា​សន្តិសុខ​សមូហភាព (CSTO) ក្នុងការធានា​ស្ថិរភាព​ក្នុងតំបន់ និងបានសង្កត់ធ្ងន់ទៅ​លើ​តម្រូវការ​ក្នុងការពង្រឹង​សក្តានុពល​របស់ខ្លួន​បន្ថែមទៀត រួមទាំង​ក្នុងអំឡុងពេល​ប្រធានាធិបតី​បច្ចុប្បន្ន​របស់​រុស្ស៊ី​៕

ដោយ៖ យា ចិន្ដាខន្ដី (ប្រភព៖ ស្ពុតនីក)