AKP ភ្នំពេញ ថ្ងៃទី២៩ ខែឧសភា ឆ្នាំ២០២៦ -- ឧបនាយករដ្ឋមន្ត្រីចិនលោក ហេ លីហ្វេង (He Lifeng) បានអំពាវនាវឱ្យប្រទេសចិន និងអាល្លឺម៉ង់ ពង្រឹងបន្ថែមទៀតនូវមូលដ្ឋានគ្រឹះនៃកិច្ចសហប្រតិបត្តិការប្រពៃណី និងទាញយកសក្តានុពលសម្រាប់កិច្ចសហប្រតិបត្តិការនៅក្នុងវិស័យដែលកំពុងរីកចម្រើន។

លោក ហេ ដែលជាសមាជិកនៃការិយាល័យនយោបាយនៃគណៈកម្មាធិការកណ្តាលបក្សកុម្មុយនិស្តចិន បានធ្វើការកត់សម្គាល់នេះខណៈពេលជួបជាមួយរដ្ឋមន្ត្រីសេដ្ឋកិច្ច និងថាមពលអាល្លឺម៉ង់ លោកស្រី ខាធើរីណា រ៉ៃឆេ (Katherina Reiche) និងតំណាងធុរកិច្ចអាល្លឺម៉ង់នៅទីក្រុងប៉េកាំង កាលពីថ្ងៃពុធ។

ភាគីទាំងពីរបានផ្លាស់ប្តូរទស្សនៈគ្នាលើការពង្រឹងកិច្ចសហប្រតិបត្តិការសេដ្ឋកិច្ច និងពាណិជ្ជកម្មចិន-អាល្លឺម៉ង់។

លោកបានមានប្រសាសន៍ថា ប្រទេសចិន និងអាល្លឺម៉ង់ គឺជាដៃគូសេដ្ឋកិច្ច និងពាណិជ្ជកម្មដ៏សំខាន់សម្រាប់គ្នាទៅវិញទៅមក ហើយកិច្ចសហប្រតិបត្តិការសេដ្ឋកិច្ច និងពាណិជ្ជកម្មទ្វេភាគីមានមូលដ្ឋានគ្រឹះរឹងមាំជាមួយនឹងសក្តានុពលដ៏ធំសម្បើម និងការបំពេញបន្ថែមដ៏រឹងមាំ។ ឧបនាយករដ្ឋមន្ត្រីបានសម្តែងក្តីសង្ឃឹមថា ភាគីទាំងពីរនឹងលើកកម្ពស់ការអភិវឌ្ឍប្រកបដោយចីរភាព និងមានសុខភាពល្អនៃទំនាក់ទំនងសេដ្ឋកិច្ច និងពាណិជ្ជកម្មទ្វេភាគីតាមរយៈកិច្ចសហប្រតិបត្តិការកម្រិតកំពូល។

ដោយកត់សម្គាល់ថា អាល្លឺម៉ង់ គឺជាដៃគូសេដ្ឋកិច្ច និងពាណិជ្ជកម្មដែលអាចទុកចិត្តបានសម្រាប់ប្រទេសចិន លោកស្រី រ៉ៃឆេ បាននិយាយថាសហគមន៍សេដ្ឋកិច្ចអាល្លឺម៉ង់មានទំនុកចិត្តលើទស្សនវិស័យសេដ្ឋកិច្ច និងសមត្ថភាពច្នៃប្រឌិតរបស់ប្រទេសចិន ហើយនឹងបន្តពង្រឹងកិច្ចសហប្រតិបត្តិការជាមួយប្រទេសនេះ៕

ដោយ៖ មូល មិនា (ប្រភព៖ ភីបផលដេលី)