AKP ភ្នំពេញ ថ្ងៃទី២៨ ខែឧសភា ឆ្នាំ២០២៦ -- យ៉ាងហោចណាស់មានជនជាតិប៉ាឡេស្ទីនចំនួន ៧នាក់ត្រូវបានសម្លាប់ និង ១៨នាក់ផ្សេងទៀតរងរបួសកាលពីល្ងាចថ្ងៃពុធ នៅក្នុងការវាយប្រហារតាមអាកាសរបស់អ៊ីស្រាអែលលើផ្ទះមួយកន្លែងនៅកណ្តាលទីក្រុងហ្គាហ្សា។ នេះបើយោងតាមសមាគមអឌ្ឍចន្ទក្រហមប៉ាឡេស្ទីន ខណៈដែលយោធាអ៊ីស្រាអែលបាននិយាយថា ខ្លួនបានកំណត់គោលដៅលើឥស្សរជនជាន់ខ្ពស់ហាម៉ាស់ ២រូបនៅក្នុងតំបន់នោះ។

សមាគមអឌ្ឍចន្ទក្រហមបាននិយាយនៅក្នុងសេចក្តីថ្លែងការណ៍សារព័ត៌មានមួយថា ក្រុមរបស់ខ្លួនបានផ្ទេរសាកសពជនរងគ្រោះយ៉ាងហោចណាស់ចំនួន ៧នាក់ និងអ្នករបួសចំនួន ១៨ នាក់ បន្ទាប់ពីការវាយប្រហារតាមអាកាសរបស់អ៊ីស្រាអែលទៅលើផ្ទះមួយកន្លែងនៅកណ្តាលទីក្រុងហ្គាហ្សា។

ប្រភពព័ត៌មានក្នុងស្រុក និងសាក្សីដែលបានឃើញផ្ទាល់ភ្នែកបានប្រាប់សារព័ត៌មាន Xinhua  ថា យន្តហោះចម្បាំងអ៊ីស្រាអែលបានបាញ់មីស៊ីលយ៉ាងហោចណាស់ពីរគ្រាប់ទៅលើផ្ទះនោះ ដែលបណ្តាលឱ្យមានការផ្ទុះដ៏ធំមួយ ភ្លើងឆេះ និងបំណែកគ្រាប់បែកហោះ។

ប្រភពព័ត៌មានបាននិយាយថា ចំនួនអ្នកស្លាប់ និងចំនួនអ្នករងរបួសអាចកើនឡើង ដោយប្រភពបានបន្ថែមថា ការវាយប្រហារនេះបានបណ្តាលឱ្យមានការបំផ្លិចបំផ្លាញយ៉ាងច្រើនដល់តំបន់ជុំវិញ ជាកន្លែងដែលជំរំស្នាក់នៅរាប់សិបគ្រួសារដែលផ្លាស់ទីលំនៅ ដោយធ្វើឱ្យខូចខាតដល់តង់ជាច្រើននៅទីនោះ។

នៅក្នុងសេចក្តីថ្លែងការណ៍ខ្លីមួយ យោធាអ៊ីស្រាអែលបានបញ្ជាក់ថាខ្លួនបានបើកការវាយប្រហារនេះ ដោយនិយាយថាខ្លួនបានកំណត់គោលដៅលើឥស្សរជនហាម៉ាសចំនួន ២នាក់នៅក្នុងតំបន់ហ្គាហ្សាដោយមិនផ្តល់ព័ត៌មានលម្អិតបន្ថែម។ មិនមានការអត្ថាធិប្បាយភ្លាមៗណាមួយពីក្រុមហាម៉ាស់ទាក់ទងនឹងការវាយប្រហាររបស់អ៊ីស្រាអែលនោះទេ៕

ដោយ៖ មូល មិនា (ប្រភព៖ ស៊ីនហួ)