AKP ភ្នំពេញ ថ្ងៃទី២៨ ខែឧសភា ឆ្នាំ២០២៦ -- រដ្ឋមន្ត្រីការបរទេសចិនលោក វ៉ាង យី (Wang Yi) កាលពីថ្ងៃអង្គារ បានសម្តែងក្តីសង្ឃឹមថា ភាគីឆេកនឹងចាត់វិធានការវិជ្ជមាន និងស្ថាបនាបន្ថែមទៀតដើម្បីកែលម្អទំនាក់ទំនងទ្វេភាគី។

លោក វ៉ាង ដែលជាសមាជិកនៃការិយាល័យនយោបាយនៃគណៈកម្មាធិការកណ្តាលបក្សកុម្មុយនិស្តចិន បានធ្វើការកត់សម្គាល់នេះក្នុងអំឡុងពេលជួបជាមួយឧបនាយករដ្ឋមន្ត្រី និងជារដ្ឋមន្ត្រីការបរទេសឆេកលោក ផេធឺ ម៉ាស៊ីនកា (Petr Macinka) នៅខាងក្រៅកិច្ចប្រជុំកម្រិតកំពូលរបស់ក្រុមប្រឹក្សាសន្តិសុខអង្គការសហប្រជាជាតិ។

ក្នុងអំឡុងពេលនៃកិច្ចប្រជុំ លោក ម៉ាស៊ីនកា បានបញ្ជាក់ពីការប្តេជ្ញាចិត្តយ៉ាងមុតមាំរបស់រដ្ឋាភិបាលឆេកថ្មីចំពោះគោលនយោបាយចិនតែមួយដោយលោកបាននិយាយថា ជំហរនេះនឹងមិនផ្លាស់ប្តូរឡើយ។

លោកបានសម្តែងឆន្ទៈក្នុងការពង្រឹងទំនាក់ទំនងជាមួយភាគីចិន បង្កើនទំនុកចិត្តគ្នាទៅវិញទៅមក នាំទំនាក់ទំនងឆេក-ចិន ត្រឡប់ទៅរកផ្លូវត្រូវវិញបន្តិចម្តងៗ និងបន្តការផ្លាស់ប្តូរ និងកិច្ចសហប្រតិបត្តិការលើវិស័យផ្សេងៗ។

ចំពោះលោក វ៉ាង បាននិយាយថា នៅចំពោះមុខបញ្ហាប្រឈមសកលបច្ចុប្បន្ន ប្រទេសធំៗ ជាពិសេសត្រូវដើរតួនាទីត្រឹមត្រូវរបស់ខ្លួនដោយដឹកនាំក្នុងការលើកកម្ពស់នីតិរដ្ឋអន្តរជាតិ និងអនុវត្តពហុភាគីនិយម។

លោក​បាន​មានប្រសាសន៍ថា គំនិតផ្តួចផ្តើម​ធំៗ​ចំនួន​បួន​របស់​ប្រធានាធិបតី​ចិន លោក ស៊ី ជីនពីង (Xi Jinping) ត្រូវ​បាន​រចនា​ឡើង​ដើម្បី​ដោះស្រាយ​បញ្ហា​ប្រឈម​សកល​ឱ្យ​បាន​ប្រសើរ​ឡើង និង​លើកកម្ពស់​ការកសាង​សហគមន៍​មួយ​ដែល​មាន​អនាគត​រួម​សម្រាប់​មនុស្សជាតិ។

រដ្ឋមន្ត្រីការបរទេសចិនបាននិយាយថា ប្រទេសចិនមានឆន្ទៈក្នុងការធ្វើការជាមួយភាគីឆេក ដើម្បីលុបបំបាត់ការរំខាន និងឧបសគ្គ កែលម្អទំនាក់ទំនងទ្វេភាគី និងរស់ឡើងវិញនូវមិត្តភាពប្រពៃណី។

លោក វ៉ាង បាននិយាយថា បញ្ហាកោះតៃវ៉ាន់គឺជាកិច្ចការផ្ទៃក្នុងរបស់ប្រទេសចិន ដោយលោកបានសម្តែងក្តីសង្ឃឹមថា រដ្ឋាភិបាលឆេកនឹងគាំទ្រគោលការណ៍ចិនតែមួយ ទប់ទល់នឹងពាក្យសម្ដី និងសកម្មភាពអវិជ្ជមានតាមរយៈវិធានការសកម្ម និងវិជ្ជមានជាងមុន ពង្រឹងមូលដ្ឋានគ្រឹះនយោបាយនៃទំនាក់ទំនងទ្វេភាគី និងជួយទំនាក់ទំនងចិន-ឆេក ឱ្យវិលត្រឡប់ទៅរកផ្លូវនៃការអភិវឌ្ឍដ៏រឹងមាំវិញ៕

ដោយ៖ មូល មិនា (ប្រភព៖ ភីបផលដេលី)