AKP ភ្នំពេញ ថ្ងៃទី២២ ខែឧសភា ឆ្នាំ២០២៦ -- ការិយាល័យរបស់រដ្ឋមន្ត្រីក្រសួងឧស្សាហកម្មកូរ៉េខាងត្បូង លោក គីម ជុងក្វាន (Kim Jung-kwan) បាននិយាយថា លោក គីម បានជួបជាមួយសមភាគីគៀហ្ស៊ីស៊ីស្ថានកាលពីថ្ងៃព្រហស្បតិ៍ ដើម្បីពិភាក្សាអំពីវិធីពង្រីកពាណិជ្ជកម្ម និងកិច្ចសហប្រតិបត្តិការរ៉ែសំខាន់ៗរវាងប្រទេសកូរ៉េខាងត្បូង និងប្រទេសអាស៊ីកណ្តាល។

លោក គីម និងរដ្ឋមន្ត្រីក្រសួងសេដ្ឋកិច្ច និងពាណិជ្ជកម្មគៀហ្ស៊ីស៊ីស្ថានលោកបាគីត ស៊ីឌីកូវ (Bakyt Sydykov) បានឯកភាពគ្នាលើតម្រូវការក្នុងការពង្រីកពាណិជ្ជកម្មទ្វេភាគីដោយធ្វើពិពិធកម្មទំនិញពាណិជ្ជកម្មក្នុងអំឡុងពេលកិច្ចប្រជុំរបស់ពួកគេនៅទីក្រុងសេអ៊ូល ដោយភាគីទាំងពីរសរសើរថា ប្រទេសទាំងពីរបានជួញដូរទំនិញមានតម្លៃ ៣,៥ប៊ីលានដុល្លារអាម៉េរិកកាលពីឆ្នាំមុន ដែលនេះគឺជាតួលេខខ្ពស់បំផុតចាប់តាំងពីពួកគេបានបង្កើតទំនាក់ទំនងការទូតក្នុងឆ្នាំ១៩៩២។

យោងតាមក្រសួងពាណិជ្ជកម្ម ឧស្សាហកម្ម និងធនធាន បានឱក្យដឹងថា រដ្ឋមន្ត្រីក៏បានឯកភាពគ្នាក្នុងការពង្រឹងកិច្ចសហប្រតិបត្តិការលើរ៉ែសំខាន់ៗដោយប្រើប្រាស់ធនធានអង់ទីម៉ូនី និងស្តែនដ៏សម្បូរបែបរបស់គៀហ្ស៊ីស៊ីស្ថាន។

លោក គីម បាននិយាយថា «ប្រទេសគៀហ្ស៊ីស៊ីស្ថានគឺជាដៃគូសហប្រតិបត្តិការដ៏សំខាន់សម្រាប់កូរ៉េខាងត្បូងក្នុងវិស័យពាណិជ្ជកម្ម រ៉ែសំខាន់ៗ និងជំនួយអភិវឌ្ឍន៍ផ្លូវការ ហើយជាមួយនឹងកិច្ចប្រជុំកំពូលកូរ៉េ-អាស៊ីកណ្តាល ដែលនឹងប្រព្រឹត្តទៅនៅទីក្រុងសេអ៊ូលក្នុងខែកញ្ញា យើងចង់ពន្លឿនកិច្ចសហប្រតិបត្តិការសេដ្ឋកិច្ចទ្វេភាគី»៕

ដោយ៖ មូល មិនា (ប្រភព៖ យ៉ុនហាប់)