AKP ភ្នំពេញ ថ្ងៃទី២២ ខែឧសភា ឆ្នាំ២០២៦ -- ធនាគារអភិវឌ្ឍន៍អាហ្វ្រិក(AfDB) បានអនុម័តប្រាក់កម្ចីចំនួន ២០០លានអឺរ៉ូ (២៣៥លានដុល្លារអាម៉េរិក) ដល់ប្រទេសម៉ារ៉ុក ដើម្បីលើកកម្ពស់ឱកាសការងារសម្រាប់យុវជន និងស្ត្រី។

ការិយាល័យធនាគារ AfDB នៅទីក្រុងរ៉ាបាត បាននិយាយនៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ថា ហិរញ្ញប្បទាននេះនឹងត្រូវបានប្រើប្រាស់ដើម្បីពង្រឹងភាពពាក់ព័ន្ធ គុណភាព និងភាពចម្រុះនៃការបណ្តុះបណ្តាលវិជ្ជាជីវៈតាមរយៈឌីជីថលូបនីយកម្ម ការដាក់ឱ្យប្រើប្រាស់ប្រព័ន្ធសិក្សា និងយន្តការធ្វើសមាហរណកម្មទីផ្សារការងារឱ្យកាន់តែរឹងមាំ។

ធនាគារបានបន្ថែមថា ហិរញ្ញប្បទាននេះនឹងជួយគាំទ្រកម្មវិធី CAP Competences 2030 របស់ប្រទេសម៉ារ៉ុក ដើម្បីធ្វើបដិវត្តន៍ការបណ្តុះបណ្តាលវិជ្ជាជីវៈ និងជំរុញការងាររបស់យុវជន និងស្ត្រី។

យោងតាមស្ថិតិផ្លូវការបានឱ្យដឹងថា ចាប់តាំងពីឆ្នាំ១៩៧០ មក ក្រុមហ៊ុនAfDB បានវិនិយោគជាង ១៥ប៊ីលានអឺរ៉ូនៅក្នុងវិស័យជាច្រើននៃសេដ្ឋកិច្ចម៉ារ៉ុក៕

ដោយ៖ មូល មិនា (ប្រភព៖ ស៊ីនហួ)