AKP ភ្នំពេញ ថ្ងៃទី២១ ខែឧសភា ឆ្នាំ២០២៦ -- កាលពីពេលថ្មីៗនេះ ប្រធានអង្គការសុខភាពពិភពលោក (WHO) បានសម្តែងការព្រួយបារម្ភអំពីទំហំ និងល្បឿននៃការផ្ទុះឡើងនៃជំងឺអេបូឡាប្រភេទកម្រមួយប្រភេទ ដែលគេស្គាល់ថា Bundibugyo នៅភាគខាងកើតប្រទេសកុងហ្គោ ជាកន្លែងដែលអាជ្ញាធរបានរាយការណ៍ថា មានអ្នកស្លាប់ចំនួន ១៣៤នាក់ និងករណីសង្ស័យជាង ៥០០ករណី។

អ្នកជំនាញសុខភាព និងបុគ្គលិកជំនួយបាននិយាយថា វីរុសនេះបានរីករាលដាលដោយមិនបានរកឃើញអស់រយៈពេលជាច្រើនសប្តាហ៍បន្ទាប់ពីករណីស្លាប់ដំបូងដែលគេដឹង ខណៈដែលអាជ្ញាធរបានធ្វើតេស្តរកប្រភេទជំងឺអេបូឡាទូទៅមួយប្រភេទ ហើយលទ្ធផលចេញមកអវិជ្ជមាន។ វីរុសBundibugyo មិនមានថ្នាំ ឬវ៉ាក់សាំងដែលត្រូវបានអនុម័តទេ។

នៅក្នុងទីក្រុងប៊ូនីយ៉ា ជាកន្លែងដែលមានមនុស្សស្លាប់ដំបូងគេដែលត្រូវបានគេដឹងនោះ បុគ្គលិកសុខាភិបាលដែលស្លៀកពាក់សម្លៀកបំពាក់ការពារបានដើរក្នុងចំណោមអ្នកស្រុកដែលពាក់ម៉ាស់ក្រណាត់។ លោក ណូអែលឡា លូម៉ូ (Noëla Lumo) ដែលជាអ្នកស្រុកដែលមានការព្រួយបារម្ភម្នាក់បាននិយាយថា «ខ្ញុំដឹងពីផលវិបាកនៃជំងឺអេបូឡា ខ្ញុំដឹងថាវាយ៉ាងម៉េច»។

លោក ហ្សង់-ចាកគេស មូយេមបេ (Jean-Jacques Muyembe)អ្នកជំនាញខាងវីរុសនៅវិទ្យាស្ថានជាតិស្រាវជ្រាវជីវវេជ្ជសាស្ត្រ បាននិយាយថា ប្រទេសកុងហ្គោរំពឹងថានឹងទទួលបានវ៉ាក់សាំងពិសោធន៍សម្រាប់ជំងឺអេបូឡាប្រភេទផ្សេងៗគ្នាពីសហរដ្ឋអាមេរិក និងចក្រភពអង់គ្លេស ដែលបង្កើតឡើងដោយអ្នកស្រាវជ្រាវនៅសាកលវិទ្យាល័យអុកហ្វត។

លោកបាននិយាយថា «យើងនឹងចាក់វ៉ាក់សាំង ហើយមើលថា អ្នកណាជាអ្នកបង្កើតជំងឺនេះ»។ ប៉ុន្តែអ្នកជំនាញបាននិយាយថា កិច្ចខិតខំប្រឹងប្រែងបែបនេះនឹងត្រូវការពេលវេលា។

លោក ធេដ្រូស អាដហាណម ហ្គេប្រេយេស៊ុស (Tedros Adhanom Ghebreyesus) អគ្គនាយកអង្គការសុខភាពពិភពលោក បាននិយាយថាលោកមានការព្រួយបារម្ភយ៉ាងខ្លាំងអំពីទំហំ និងល្បឿននៃការរាតត្បាតហើយលោកបានចង្អុលបង្ហាញពីការលេចចេញនូវករណីឆ្លងនៅក្នុងតំបន់ទីក្រុង ការស្លាប់របស់បុគ្គលិកសុខាភិបាល និងចលនាប្រជាជនយ៉ាងច្រើន។

លោក ធេដ្រូស បាននិយាយនៅក្នុងកិច្ចប្រជុំគណៈកម្មាធិការបន្ទាន់របស់ទីភ្នាក់ងារសុខភាពអង្គការសហប្រជាជាតិថា នៅប្រទេសកុងហ្គោ មានករណីឆ្លងចំនួន ៣០ករណីត្រូវបានបញ្ជាក់។ លោកបាននិយាយថា ប្រទេសអ៊ូហ្គង់ដាដែលជាប្រទេសជិតខាងបានជូនដំណឹងដល់អង្គការសុខភាពពិភពលោកអំពីករណីឆ្លងពីរករណីដែលត្រូវបានបញ្ជាក់ រួមទាំងករណីស្លាប់នៅក្នុងរដ្ឋធានីកាំប៉ាឡា ក្នុងចំណោមមនុស្សដែលបានធ្វើដំណើរពីប្រទេសកុងហ្គោ៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)