AKP បន្ទាយមានជ័យ ថ្ងៃទី២១  ខែឧសភាឆ្នាំ២០២៦--នៅក្នុងស្មារតីចងចាំមិនភ្លេចនូវរាល់ពលិកម្ម និងវីរភាពដ៏អង់អាចក្លាហានរបស់កងទ័ពជាតិ ក្នុងបុព្វហេតុការពារជាតិមាតុភូមិ និងស្របពេលដែលកម្ពុជាប្រារព្ធ «ទិវានៃការចងចាំ ២០ ឧសភា» ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ រួមជាមួយលោកជំទាវ ជ័យ ណារី អ៊ុំរាត្រី និងឯកឧត្តម ប្លែក វ៉ារី ប្រធានក្រុមប្រឹក្សាខេត្ត បានអញ្ជើញចុះជួបសំណេះ សំណាល សួរសុខទុក្ខ និងនាំយកអំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ជូនដល់គ្រួសារកងទ័ពសរុបចំនួន ២៨០ គ្រួសារ។

ពិធីជួបសំណេះសំណាលដ៏មានអត្ថន័យ និងពោរពេញដោយភាពកក់ក្តៅនេះ ត្រូវបានធ្វើឡើងដាច់ដោយឡែកពីគ្នាកាលពីថ្ងៃទី២០ខែឧសភាឆ្នាំ២០២៦នេះ ដោយផ្ដល់ជូនគ្រួសារកងទ័ពចំណុះតំបន់ប្រតិ បត្តិការសឹករងបន្ទាយមានជ័យ ចំនួន ៥៥ គ្រួសារ និងគ្រួសារកងទ័ពចំណុះកងពលតូចថ្មើរជើងលេខ៥១ ក្នុងស្រុកព្រះនេត្រព្រះ ចំនួន ២២៥ គ្រួសារ។

នៅក្នុងឱកាសនោះ ឯកឧត្តម អ៊ុំ រាត្រី បានពាំនាំនូវប្រសាសន៍ផ្ដាំផ្ញើសួរសុខទុ ក្ខប្រកបដោយក្តីនឹករលឹក និងមនោស ញ្ចេតនាជ្រាលជ្រៅបំផុតពីសំណាក់ សម្តេចធិបតី ហ៊ុន ម៉ាណែត និងលោក ជំទាវបណ្ឌិត ជូនដល់បងប្អូនកងទ័ព និងគ្រួសារកងទ័ពទាំងអស់។ 

ឯកឧត្តមបានគូសបញ្ជាក់ថា ប្រមុខរាជរដ្ឋាភិបាលកម្ពុជា តែងតែផ្តល់អាទិ ភាព និងយកចិត្តទុកដាក់ខ្ពស់បំផុតចំពោះ សុខទុក្ខ សុខុមាលភាព និងជីវភាពរស់នៅរបស់បងប្អូនកងទ័ព ក៏ដូចជាគ្រួសារកងទ័ពនៅគ្រប់ទីកន្លែង ដោយមិនទុកចោលណាម្នាក់ឡើយ។   

ឯកឧត្តមអភិបាលខេត្ត បានថ្លែងការកោតសរសើរដោយស្មោះស្ម័គ្រ និងវាយតម្លៃខ្ពស់ចំពោះវីរភាពដ៏អង់អាចក្លាហាន និងការលះបង់សាច់ស្រស់ឈាមស្រស់របស់បងប្អូនយុទ្ធជនក្នុងការការពារបូរណភាពទឹកដី ថែរក្សាសុខសន្តិភាព និងស្ថិរភាពសង្គម ដែលជាគ្រឹះមិនអាចខ្វះបានសម្រាប់ការអភិវឌ្ឍប្រទេសជាតិឱ្យមានការរីកចម្រើនដូចសព្វថ្ងៃ។

ឯកឧត្តមបានគូសបញ្ជាក់ថា៖

«បងប្អូនកងទ័ព គឺជាបង្អែកដ៏រឹងមាំរបស់ជាតិ ហើយរាជរដ្ឋាភិបាល និងប្រជាជនកម្ពុជាទាំងមូល តែងតែចងចាំ និងដឹងគុណជានិច្ចចំពោះរាល់ការលះបង់ដ៏ឧត្តុង្គឧត្តមនេះ»។      

ជាការឆ្លើយតប នៅក្នុងទិដ្ឋភាពដ៏សែនរំភើបញាប់ញ័រ តំណាងគ្រួសារកងទ័ពដែលបានទទួលអំណោយ បានសម្តែងនូវក្តីសប្បាយរីករាយ និងដឹងគុណយ៉ាងជ្រាលជ្រៅជាទីបំផុត រកអ្វីប្រៀបផ្ទឹមពុំបាន ចំពោះសម្តេចធិបតី ហ៊ុន ម៉ាណែត លោកជំទាវបណ្ឌិត ព្រមទាំងថ្នាក់ដឹកនាំខេត្តបន្ទាយមានជ័យទាំងអស់ ដែលតែងតែនៅក្បែរ និងមិនដែលបោះបង់ពួកគេចោលក្នុងគ្រប់កាលៈទេសៈ។

តំណាងគ្រួសារកងទ័ពម្នាក់បានលើកឡើងទាំងក្តីរំភើបថា៖ពួកយើងមានមោទនភាពណាស់ដែលមានស្វាមី និងកូនចៅជាកងទ័ពការពារជាតិ។ នៅពេលដែលឃើញថ្នាក់ដឹកនាំ ពិសេសគឺសម្តេចនាយករដ្ឋមន្ត្រី លោកតែងតែនឹកគិត និងផ្ដល់ជំនួយឧបត្ថម្ភដល់គ្រួសារយើងខ្ញុំបែបនេះ វាគឺជាកម្លាំងចិត្តដ៏ធំធេងបំផុត។ អំណោយទាំងនេះមិនត្រឹមតែជួយសម្រាលជីវភាពគ្រួសារប៉ុណ្ណោះទេ ប៉ុន្តែវាបានបង្ហាញពីតម្លៃនៃការយកចិត្តទុកដាក់ និងការផ្តល់កិត្តិយសដ៏ខ្ពង់ខ្ពស់ដល់គ្រួសារកងទ័ពយើងខ្ញុំ។ ពួកយើងសូមប្ដេជ្ញាចិត្តគាំទ្ររាជរដ្ឋាភិបាល និងជម្រុញឱ្យស្វាមី កូនចៅ បន្តបំពេញភារកិច្ចការពារជាតិឱ្យបានកាន់តែរឹងមាំ។

គួរបញ្ជាក់ផងដែរថា អំណោយដែលបានចែកជូនដល់គ្រួសារកងទ័ពទាំង ២៨០ គ្រួសារនាពេលនេះ រួមមានគ្រឿង ឧបភោគបរិភោគ និងថវិកាមួយចំនួន ដែលជាការជួយសម្រាលបន្ទុកជីវភាពប្រចាំថ្ងៃរបស់បងប្អូនបានមួយកម្រិតធំ ព្រមទាំងបានបន្សល់ទុកនូវស្នាមញញឹម និងមនោសញ្ចេតនាដ៏កក់ក្តៅរវាងរាជរដ្ឋាភិបាល ថ្នាក់ដឹកនាំខេត្ត ជាមួយនិងគ្រួសារយុទ្ធជនជួរមុខយ៉ាងស៊ីជ ម្រៅ៕

ដោយ ៖ឈុនសារ៉ាត