AKP ភ្នំពេញ ថ្ងៃទី២០ ខែឧសភា ឆ្នាំ២០២៦--ឯកឧត្តមទេសរដ្ឋមន្ត្រី លី ធុជ ទទួលបន្ទុកបេសកកម្មពិសេសបានបញ្ជាក់ថា រាជរដ្ឋាភិបាលកម្ពុជាក្រោមការដឹកនាំប្រកបដោយគតិបណ្ឌិត និងចក្ខុវិស័យវែងឆ្ងាយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា តែងតែយកចិត្តទុកដាក់ និងចាត់ទុកវិស័យអប់រំជាវិស័យអាទិភាព និងជាកិច្ចការស្នូលសម្រាប់ការអភិវឌ្ឍន៍ប្រទេសកម្ពុជា ក្នុងដំណើរឆ្ពោះទៅរកវឌ្ឍនភាព និងភាពរីកចម្រើនរបស់ប្រទេសជាតិ។
ការលើកឡើងបែបនេះ ក្នុងឱកាសដែល ឯកឧត្តម អញ្ជើញជាអធិបតី ក្នុងពិធីចែកសញ្ញាបត្រជូននិស្សិតជ័យលាភីបញ្ចប់ការសិក្សាកម្រិតបរិញ្ញាបត្ររហូតដល់ថ្នាក់បណ្ឌិត នៃសាកលវិទ្យាល័យគ្រប់គ្រងអាស៊ីបូព៌ា នាថ្ងៃទី២០ ខែឧសភា ឆ្នាំ២០២៦ នៅសណ្ឋាគារហ៊ីម៉ាវ៉ារី ភ្នំពេញ។ ពិធីចែកសញ្ញាបត្រនេះ ក៏មានការអញ្ជើញចូលរួមពីថ្នាក់ដឹកនាំក្រសួង-ស្ថាប័ន ប្រធានក្រុមប្រឹក្សាភិបាល អធិកាបតី សមាជិកក្រុមប្រឹក្សាភិបាល គណៈគ្រប់គ្រង សាស្ត្រាចារ្យ លោក លោកស្រី អាណាព្យាបាល និងសិស្ស និស្សិតជាច្រើនរូបទៀត។

ក្នុងឱកាសនោះ ឯកឧត្តមទេសរដ្ឋមន្ត្រី លី ធុជ បានសម្តែងការអបអរសាទរដល់និស្សិតជ័យលាភីទាំងអស់ ដែលបានបញ្ចប់ការសិក្សាដោយជោគជ័យ បន្ទាប់ពីបានខិតខំប្រឹងប្រែងតស៊ូ និងឆ្លងកាត់ដំណាក់កាលនានាក្នុងការសិក្សារហូតទទួលបានលទ្ធផលដ៏គួរជាទីមោទនភាពនេះ។ ជាមួយគ្នានេះ ឯកឧត្តមក៏បានវាយតម្លៃខ្ពស់ចំពោះការខិតខំប្រឹងប្រែង និងការលះបង់របស់គណៈគ្រប់គ្រង និងសាស្ត្រាចារ្យទាំងអស់ ដែលបានចំណាយពេលវេលា កម្លាំងកាយចិត្ត និងចំណេះដឹង ក្នុងការបណ្តុះបណ្តាលធនធានមនុស្សប្រកបដោយគុណភាព សម្រាប់បម្រើដល់ការអភិវឌ្ឍន៍សង្គម និងប្រទេសជាតិ។

ឯកឧត្តមទេសរដ្ឋមន្ត្រីបានលើកឡើងបន្ថែមថា ប្រទេសកម្ពុជា មានមោទនភាព និងដាក់ក្តីសង្ឃឹមយ៉ាងមុតមាំលើយុវជនជំនាន់ក្រោយ ដែលជាកម្លាំងចលករដ៏សំខាន់ក្នុងការបន្តថែរក្សាសន្តិភាព ជំរុញការអភិវឌ្ឍន៍ និងចូលរួមកសាងអនាគតដ៏រុងរឿងសម្រាប់ប្រទេសជាតិ។ និស្សិតជ័យលាភីទាំងអស់ គឺជាធនធានមនុស្សដ៏មានសក្តានុពល ដែលបានត្រៀមខ្លួនរួចជាស្រេចក្នុងការឈានចូលទីផ្សារការងារ និងរួមចំណែកដល់ការអភិវឌ្ឍន៍ជាតិ។

ឯកឧត្តមទេសរដ្ឋមន្ត្រី លី ធុជ ក៏បានផ្តល់ការណែនាំ និងសារលើកទឹកចិត្តដល់និស្សិតថា សញ្ញាបត្រដែលទទួលបាននាថ្ងៃនេះ គឺជាការចាប់ផ្តើមថ្មី មិនមែនជាទីបញ្ចប់នៃការសិក្សានោះឡើយ។ ឯកឧត្តមបានជំរុញឱ្យនិស្សិតបន្តសិក្សាស្វែងយល់ អភិវឌ្ឍសមត្ថភាព និងរៀនសូត្រពេញមួយជីវិត ដើម្បីឆ្លើយតបនឹងការប្រែប្រួលនៃពិភពលោក។ ទន្ទឹមនឹងនេះ សញ្ញាបត្រមិនមែនគ្រាន់តែផ្តល់ចំណេះដឹងប៉ុណ្ណោះទេ ប៉ុន្តែថែមទាំងផ្តល់វិន័យ ទម្លាប់នៃការគិត ការប្តេជ្ញាបញ្ចប់អ្វីដែលបានចាប់ផ្តើម និងបទពិសោធន៍ជីវិត។ លើសពីនេះ មិត្តភាពដែលបានកសាងក្នុងអំឡុងពេលសិក្សា ក៏អាចក្លាយជាកម្លាំងគាំទ្រ និងជាទ្រព្យសម្បត្តិដ៏មានតម្លៃសម្រាប់ជីវិតនាពេលអនាគតផងដែរ ៕

ដោយ សួស សំរិត