AKP ភ្នំពេញ ថ្ងៃទី២០ ខែឧសភា ឆ្នាំ២០២៦--មូលនិធិអភិវឌ្ឍន៍ជំនាញ (SDF) មានក្តីសោមនស្សរីករាយក្នុងការទទួលស្វាគមន៍ គណៈប្រតិភូស្ថានទូតសិង្ហបុរី ដឹកនាំដោយ ឯកឧត្តម ស្ទីវិន ផាំង ឈី វី ឯកអគ្គរដ្ឋទូតសាធារណរដ្ឋសិង្ហបុរីប្រចាំនៅកម្ពុជា សម្រាប់ដំណើរទស្សនកិច្ចនៅការិយាល័យ SDF ក្នុងទីក្រុងភ្នំពេញ នៅថ្ងៃទី២០ ខែឧសភា ឆ្នាំ២០២៦ ។

ឯកឧត្តម គី សុខគីម នាយកប្រតិបត្តិ SDF បានចែករំលែកពីយន្ដការហិរញ្ញប្បទានក្នុងការគាំទ្រការអភិវឌ្ឍន៍ជំនាញ រួមទាំងសមិទ្ធផលសំខាន់ៗ និងកម្មវិធីនានាដែល SDF កំពុងបន្តអនុវត្តដើម្បីលើកកម្ពស់ និងអភិវឌ្ឍកម្លាំងពលកម្មរបស់កម្ពុជា។ យន្តការរបស់ SDF ស្រដៀងគ្នានឹងយន្តការ SkillsFuture របស់ប្រទេសសិង្ហបុរី ដែលជាយន្តការគាំទ្រហិរញ្ញប្បទានដល់វិស័យឯកជន និងប្រជាពលរដ្ឋដើម្បីបង្កើនជំនាញឱ្យត្រូវតាមតម្រូវការទីផ្សារការងារ ក៏ដូចជាការអភិវឌ្ឍន៍សេដ្ឋកិច្ចសង្គម។

ដំណើរទស្សនកិច្ចរបស់ឯកអគ្គរដ្ឋទូតសិង្ហបុរីនេះ បង្ហាញពីការចាប់អារម្មណ៍របស់គណៈប្រតិភូលើវិធីសាស្ត្ររបស់ SDF ក្នុងការអភិវឌ្ឍន៍ជំនាញ រួមមាន៖ គំរូហិរញ្ញប្បទាន កម្មវិធីសំខាន់ៗ និងផលជះលើកម្លាំងពលកម្មរបស់កម្ពុជាផងដែរ។ ស្ថានទូតសិង្ហបុរី នឹងជួយពង្រឹងកិច្ចសហប្រតិបត្តិការបន្ថែមជាមួយ SDF ដើម្បីផ្លាស់ប្តូរបទពិសោធ និងកម្មវិធីបណ្តុះបណ្តាលផ្សេងៗ ដើម្បីបំពេញតម្រូវការជំនាញនៅកម្ពុជា និងសិង្ហបុរី។

SDF សូមអរគុណដល់ស្ថានទូតសិង្ហបុរី ដែលបានចែករំលែកបទពិសោធល្អៗ ជាពិសេសតាមរយៈ SkillsFuture សិង្ហបុរី និងដៃគូអភិវឌ្ឍផ្សេងៗទៀត៕

ដោយ ណយ នឿន (ប្រភព៖SDF)