AKP កំពង់ធំ ថ្ងៃទី២០ ខែឧសភា ឆ្នាំ២០២៦--ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានអចិន្ត្រៃយ៍នៃគណៈកម្មការការពារ ទប់ស្កាត់ និងបង្ក្រាបបទល្មើសធនធានធម្មជាតិ ខេត្តកំពង់ធំនាព្រឹកថ្ងៃទី២០ ខែឧសភា ឆ្នាំ២០២៦នេះបានដឹកនាំកងកម្លាំងចម្រុះ ទៅត្រួតពិនិត្យការគ្រប់គ្រង ការពារ តំបន់ដែនជម្រកសត្វព្រៃបឹងពែនៅតំបន់ជាំក្របីក្នុងភូមិសាស្ត្រឃុំសង្គ្រាម ស្រុកប្រាសាទបល្ល័ង្គ ខេត្តកំពង់ធំ។

លោក អ៊ី វិចអុល មន្ត្រីឧទ្យានុរក្ស នៃមន្ទីរបរិស្ថានខេត្តកំពង់ធំ និងជាប្រធានទីបញ្ជាការស្រាលប្រចាំតំបន់ជាំក្របីបានរាយការណ៍ថា ដែនជម្រកសត្វព្រៃបឹងពែនៅប៉ែកខាងកើតស្ទឹងស្ទោង ក្នុងឃុំសាគ្រាម ដែលគ្រប់គ្រងដោយទីបញ្ជាការស្រាលតំបន់ជាំក្របីមានផ្ទៃដីប្រមាណជាង២ម៉ឺនហិកតា ហើយកន្លងមកថ្មីៗនេះនៅមុនបុណ្យចូលឆ្នាំថ្មីប្រពៃណីជាតិខ្មែរ មានជនល្មើសបានលបលួចកាប់ទន្ទ្រានដោយខុសច្បាប់ នៅតំបន់ត្រពាំងតាយស និងតំបន់កន្សែងធំមានប្រមាណជាង៤ហិកតា។បច្ចុប្បន្នផ្ទៃដីទាំងនេះត្រូវបានកងកម្លាំងចម្រុះការពារនិងយាមល្បាតយ៉ាងហ្មត់ចត់បំផុតមិនឱ្យមានការដុតរានឬដាំដុះធ្វើចំការបានឡើយ ហើយជនសង្ស័យក្នុងករណីកាប់បំផ្លាញព្រៃឈើនេះស្ថាប័នបរិស្ថានបានកសាងសំណុំរឿងបញ្ជូនទៅកាន់តុលាការរួចរាល់ហើយផងដែរ ។

ឧត្តមសេនីយ៍ទោ សោម ស៊ុន បានថ្លែងនូវការកោតសរសើរ ចំពោះកងកម្លាំងចម្រុះដែលប្រចាំការនៅទីបញ្ជាការស្រាលតំបន់ជាំក្របីក្នុងការគ្រប់គ្រងការពារព្រៃឈើក្នុងដែនជម្រកសត្វព្រៃបឹងពែ នាពេលកន្លងទៅ និងបច្ចុប្បន្ននេះ ហើយជាមួយគ្នានោះដែរ ក៏បានយកចិត្តទុកដាក់ ក្នុងការគ្រប់គ្រងការពារដីព្រៃឈើប្រមាណជាង៤ហិកតាដែលជនល្មើសលួចកាប់ទន្ទ្រានមុនពេលបុណ្យចូលឆ្នាំថ្មីកន្លងទៅ បានយ៉ាងល្អប្រសើរនិងបានកសាងសំណុំរឿងបញ្ជូនទៅកាន់តុលាការរួចហើយ ដើម្បីបន្តស្រាវជ្រាវរកមុខសញ្ញាជនល្មើស និងអ្នកពាក់ព័ន្ធយកទៅផ្ដន្ទាទោសតាមផ្លូវច្បាប់នៅពេលខាងមុខ។

ជាមួយគ្នានោះដែរ ឧត្ដមសេនីយ៍ទោសោម ស៊ុន ក៏បានថ្លែងនូវការកោតសរសើរចំពោះកងកម្លាំងចម្រុះ ដែលបានយាមល្បាតការពារបានដីព្រៃឈើ ដែលរងការកាប់ទន្ទ្រាននាបណ្តាឆ្នាំកន្លងទៅបានយ៉ាងល្អប្រសើរដោយបច្ចុប្បន្នតំបន់ទាំងនេះ ត្រូវបានព្រៃឈើធម្មជាតិដុះលូតលាស់ឡើងវិញ។

ឧត្តមសេនីយ៍ទោ សោម ស៊ុន បានប្រគល់ភារកិច្ចដល់កងកម្លាំងចម្រុះដែលប្រចាំការនៅទីបញ្ជាការស្រាលតំបន់ជាំក្របី ត្រូវបន្តយកចិត្តទុកដាក់ ទប់ស្កាត់ ការពារ និងបង្ក្រាបឱ្យបានមិនឱ្យមានការកាប់ទន្ទ្រានព្រៃឈើក្នុងដែនជម្រកសត្វព្រៃបឹងពែជាថ្មីទៀត។ក្នុងករណីមានជនល្មើស នៅតែបន្តរឹងទទឹងលបលួចកាប់ទន្ទ្រានព្រៃឈើ នៅក្នុងដែនជម្រកសត្វព្រៃ បឹងពែ ដែលជាបទល្មើសជាក់ស្ដែង ត្រូវចាប់ឃាត់ខ្លួនបញ្ជូនទៅស្ថាប័នជំនាញ ដើម្បីកសាងសំណុំរឿងនិងចាត់ការតាមនីតិវិធី បញ្ជូនទៅកាន់តុលាការផ្តន្ទាទោសតាមផ្លូវច្បាប់ ដោយគ្មានការលើកលែងឡើយ។

នៅក្នុងឱកាសនោះដែរ ឧត្តមសេនីយ៍ទោ សោម ស៊ុន ក៏បានប្រគល់ជូន ស្បៀងអាអាហារ គ្រឿងឧបភោគ បរិភោគ ភេសជ្ជៈនិងប្រេងឥន្ធនៈមួយចំនួនដែលជាអំណោយរបស់ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី និងជាប្រធានក្រុមការងាររបស់រាជរដ្ឋាភិបាលចុះមូលដ្ឋានខេត្តកំពង់ធំ ជូនដល់កងកម្លាំងចម្រុះដើម្បីធានាជីវភាពប្រចាំថ្ងៃ និងជាមធ្យោបាយធ្វើដំណើរក្នុងការបំពេញភារកិច្ចសម្រាប់បម្រើសង្គមជាតិដ៏មានសារៈសំខាន់នេះផងដែរ៕

ដោយ ស៊ុម វណ្ណា