AKP ភ្នំពេញ ថ្ងៃទី១៤ ខែឧសភា ឆ្នាំ២០២៦--ការប្រកតប្រដាល់ឃីកបុកស៊ីង «កំពូលអ្នកចម្បាំងកម្ពុជា» ដែលឧបត្ថម្ភដោយភេសជ្ជៈ កីឡាកម្ពុជា CAMBODIA SPORT+ របស់ក្រុមហ៊ុន ខ្មែរ ប៊ែវើរីជីស ត្រូវបានឯកឧត្តម ហេង សុខឃន ប្រធានសហព័ន្ធប្រដាល់ឃីកបុកស៊ីងកម្ពុជាប្តេជ្ញានឹងរៀបចំការប្រកួតឱ្យបានល្អប្រសើរ និងយុត្តធម៌បំផុតក្នុងការកាត់ក្តី ដែលតាមរយៈការប្រកួតនេះក៏ជាការពង្រឹងសមត្ថភាពមន្ត្រី អាជ្ញាកណ្តាល ចៅក្រមរបស់ខ្លួនឱ្យកាន់តែរឹងមាំ ដើម្បីទទួលបានការគាំទ្រ និងមានប្រជាប្រិយខ្លាំងបំផុត។

ការប្តេជ្ញាចិត្តខ្ពស់របស់ឯកឧត្តមប្រធាន បានធ្វើឡើង នៅក្នុងសន្និសីទសារព័ត៌មាន នៅថ្ងៃទី១៤ ខែឧសភា ឆ្នាំ២០២៦ នៅផ្សារទំនើប ជីបម៉ុងមេហ្គាម៉ល ២៧១ រាជធានីភ្នំពេញ ដោយមានការចូលរួមពីលោក អ៊ឹង វីរៈ អគ្គនាយបន្តវេនក្រុមហ៊ុន ខ្មែរប៊ែរវើរីជីស ដែលជាអ្នកឧបត្ថម្ភ និងលោក Naser Nassiri ប្រធានសហព័ន្ធឃីកប៊ុកស៊ីងអាស៊ី។

ឯកឧត្តម ហេង សុខឃន បានសង្កត់ធ្ងន់ថា អាជ្ញាកណ្តាល និងចៅក្រមរបស់ប្រភេទកីឡាប្រដាល់ឃីកបុកស៊ីងកម្ពុជាសុទ្ធតែទទួលបានការបណ្តុះបណ្តាលសមត្ថភាពបច្ចេកទេសក្នុងការដាក់ពិន្ទុ ដោយទទួលស្គាល់ ការគាំទ្រពីលោក Nasser Nassiri ប្រធានសហព័ន្ធប្រដាល់ឃីកបុកស៊ីងអាស៊ី។ ដូច្នេះឯកឧត្តមដាក់ការជឿជាក់ថា អាជ្ញាកណ្តាល និងចៅក្រមនឹងដាក់ពិន្ទុសុក្រិតយុត្តិធម៌ មិនលម្អៀងឡើយ ដោយឯកឧត្តមរំពឹងខ្ពស់ថា ការប្រកួតនេះនឹងទទួលបានការគាំទ្រយ៉ាងពេញទំហឹងអ្នកគាំទ្រប្រដាល់ឃីកបុកស៊ីងជាក់ជាមិនខាន់។

ប្រធានសហព័ន្ធរូបនេះគូសបញ្ជាក់ទៀតថា វិស័យកីឡាក្នុងប្រទេសកម្ពុជាជាច្រើន ជាពិសេសកីឡាប្រដាល់ឃីកបុកស៊ីង ដែលក្រុមហ៊ុន ខ្មែរប៊ែវើរីជីស តែងតែចូលរួមសហការជាមួយសហព័ន្ធកីឡាជាតិ ព្រមទាំងដៃគូអភិវឌ្ឍ ក៏ដូចជាស្ថាប័នពាក់ព័ន្ធផ្សេងទៀត ដើម្បីជំរុញឱ្យភាពរីកចម្រើននៃកីឡាប្រដាល់បើកបុកស៊ីងកម្ពុជាកាន់តែល្អប្រសើរជាលំដាប់ តាមរយៈការឧបត្ថម្ភលើព្រឹត្តិការណ៍ប្រកួតទាំងថ្នាក់ជាតិ-និងអន្តរជាតិ។ ឯកឧត្តម ហេង សុខឃន ចាត់ទុកថា សង្វៀនប្រដាល់ឃីកបុកស៊ីងរបស់ភេសជ្ជៈកីឡាកម្ពុជា CAMBODIA SPORT+ ក៏នឹងក្លាយជាវេទិកាមួយ ដែលជួយពង្រឹងសមត្ថភាពកីឡាករកីឡាការិនីយើងត្រៀមខ្លួនដណ្តើមជ័យលាភីលើឆាកអន្តរជាតិ។ ដើម្បីចូលរួមពង្រឹងបន្ថែមលើវិស័យនេះ ខ្មែរ ប៊ែវើរីជីស បានឧបត្ថម្ភទឹកប្រាក់ក្នុងចំនួនមួយដ៏ច្រើន ដល់សហព័ន្ធផ្ទាល់ ដើម្បីរកគ្រូបង្វឹកជំនាញបច្ចេកទេសច្បាស់លាស់មកបង្ហាត់បង្រៀនកីឡាករ-កីឡាការិនីកម្ពុជាកាន់តែខ្លាំងក្លាជាងមុន។ ជាលទ្ធផល សហព័ន្ធក៏ជ្រើសរើសបានគ្រូបង្វឹក ៤រូបសុទ្ធតែជាអ្នកជំនាញមកពីក្រៅប្រទេស ត្រៀមបង្ហាញយុទ្ធសាស្ត្រហ្វឹកហាត់ថ្មី ដល់ក្លឹបឃីកបុកស៊ីងទូទាំងប្រទេស។

គួរបញ្ជាក់ថា ការប្រកតប្រដាល់ឃីកបុកស៊ីង «កំពូលអ្នកចម្បាំងកម្ពុជា» នឹងធ្វើឡើងនៅវេលាម៉ោង ៧យប់តទៅ ថ្ងៃទី១៥ ខែឧសភា ឆ្នាំ២០២៦ នៅសង្វៀន TV5 ដោយមានគូជាតិ-អន្តរជាតិសរុប ៧គូ។ ចំពោះគូអន្តរជាតិ៥គូ រួមមាន៖ អ្នកប្រដាល់ឃីកបុកស៊ីងកម្ពុជា នូវ វាន់ថង ប៉ះអ្នកប្រដាល់អាសហ្គានីស្ថាន Ali Sina ទម្ងន់ ៥៧គ.ក្រ, កីឡាការិនី ទូច ចាន់វត្តី ប៉ះកីឡាការិនីចិន Zhou Xiwei ទម្ងន់ ៥៤គ.ក្រ, កីឡាករ ពេជ្រ អាទិទេព ប៉ះ អ្នកប្រដាល់កៀហ្ស៊ីស៊ីស្ថាន Toksonbaev Kushbakovich ទម្ងន់ ៥៧គ.ក្រ, ឈុត សេរីវាន់ថង ប៉ះអ្នកប្រដាល់កៀហ្ស៊ីស៊ីស្ថាន Akhror Rozbaev ទម្ងន់ ៦០គ.ក្រ ខណៈទូច ដេវិត នឹងត្រូវប្រជែងជាមួយអ្នកប្រដាល់មកពីប្រទេសហ្វីលីពីន Jorma Balangui ក្នុងប្រភេទទម្ងន់ ៦០គ.ក្រ៕

ដោយ ហេង ណាលីន