AKP ភ្នំពេញ ថ្ងៃទី១១ ខែឧសភា ឆ្នាំ២០២៦--ក្រុមហ៊ុន កូកា-កូឡា ខេមបូឌា បេវេរេដ ខមប៉ានី បានអបអរខួប ៣៣ ឆ្នាំ ដែលក្រុមហ៊ុនមានរោងចក្រប្រតិបត្តិការអាជីវកម្មក្នុងប្រទេសកម្ពុជា ហើយក្រុមហ៊ុនបានយកការរៀបចំកម្មវិធី​បរិច្ចាគឈាម និងការជួយខ្ចប់សាប៊ូ ដើម្បីយកចែកជូនគ្រួសារ និងកុមារនៅក្នុងអង្គការផ្កាយសមុទ្រកម្ពុជា។

នៅក្នុងព្រឹត្ដិការណ៍នោះដែរ កូកា-កូឡា ខេមបូឌា បេវេរេដ ខមប៉ានី មិនត្រឹមតែអបអរខួប ៣៣ ឆ្នាំ នៃការរួមដំណើរជាមួយប្រជាជនកម្ពុជាប៉ុណ្ណោះទេ តែក៏ជាខួប ១៤០​ ឆ្នាំ របស់​កូកា-កូឡា លើពិភពលោកដែរ។ ការអបអរឆ្នាំនេះ សាមញ្ញ តែមិនសាមញ្ញ ដោយសារថា ក្រុមហ៊ុនបានយកការងារជួយសហគមន៍ ជាការតបស្នងសងគុណបងប្អូនខ្មែរ ជាពិសេសអ្នកត្រូវការជំនួយ។

បុគ្គលិករោងចក្របានមកចូលរួមនៅការិយាល័យកណ្តាលរបស់ក្រុមហ៊ុន ក្នុងខណ្ឌឫស្សីកែវ រាជធានីភ្នំពេញ ដើម្បីអបអរ ហើយក៏មានដៃគូសហការពីអង្គការផ្កាយសមុទ្រកម្ពុជា សណ្ឋាគារ Sofitel, Tribe, Shangri-La និងមិត្តអ្នកសារព័ត៌មានបានចូលរួមបរិច្ចាគឈាម ជាមួយមជ្ឈមណ្ឌលជាតិផ្តល់ឈាម ខណៈនេះគឺចំពេលវេលាដែលមជ្ឍមណ្ឌលត្រូវការឈាមបន្ថែម ដើម្បីយកផ្គត់ផ្គង់ ដល់អ្នកត្រូវការឈាមសង្គ្រោះជីវិត។

ក្រៅពីនេះ បុគ្គលិកកូកា-កូឡាខ្មែរ ក៏បានជួយ​ «ខ្ចប់សាប៊ូ ខ្ចប់ដោយបេះដូង» ពោរពេញដោយភាពរីករាយ។ ការវេចខ្ចប់សាប៊ូកែច្នៃនេះ គឺសម្រាប់យកចែកជូនគ្រួសារ និងកុមារនៅក្នុងសហគមន៍ស្ទឹងមានជ័យ និងច្បារអំពៅ តាមរយៈអង្គការ​ផ្កាយសមុទ្រ (ISF) ក្នុងគោលដៅលើកកម្ពស់អនាម័យ និងសុខុមាលភាពរស់នៅប្រចាំថ្ងៃរបស់ពួកគេ។

លោក Paulo Gaspar Rodrigues អគ្គនាយកប្រតិបត្តិក្រុមហ៊ុន កូកា-កូឡា ខេមបូឌា បេវេរេដ ខមប៉ានី បានមានប្រសាសន៍ថា៖ «ថ្ងៃនេះ ជាថ្ងៃពិសេស និងសំខាន់របស់អាជីវកម្មយើង វាគឺជាថ្ងៃខួប ១៤០ ឆ្នាំ របស់កូកា-កូឡា ដែលពួកយើងស្រលាញ់ចូលចិត្ត ក៏ជាខួប ៣៣ឆ្នាំ ដែលក្រុមហ៊ុន កូកា-កូឡា ខេមបូឌា បេវេរេដ ខមប៉ានី បានផលិតភេសជ្ជៈនៅក្នុងប្រទេសកម្ពុជា ដោយដៃខ្មែរ សម្រាប់ប្រជាជនខ្មែរ ហើយជាក្រុមហ៊ុនដែលបង់ពន្ធជូនរដ្ឋយ៉ាងគត់មុត និងបន្តធ្វើជាក្រុមហ៊ុនគំរូមួយនៅកម្ពុជា។ ថ្ងៃនេះ យើងយកការអបអរខួបរបស់យើង ក្នុងការរួមចំណែកជួយសហគមន៍ជាការតបស្នង ហើយយើងនៅតែប្តេជ្ញាគាំទ្រ និងបង្កើតអំពើល្អៗ ដើម្បីជួយប្រទេសកម្ពុជារុងរឿងរីកចម្រើនជាបន្តបន្ទាប់»។

ក្នុងឱកាសនោះ លោកស្រីវេជ្ជបណ្ឌិតឯកទេស​ ហេង សុខចំរើន អនុប្រធានមជ្ឈមណ្ឌលជាតិផ្តល់ឈាម គូសបញ្ជាក់ថា៖ «ខ្ញុំសូមអរគុណ ចំពោះការរួមចំណែករបស់ក្រុមហ៊ុន កូកា-កូឡា ខេមបូឌា បេវេរេដ ខមប៉ានី។ ការផ្តល់ពីក្រុមហ៊ុនក្នុងថ្ងៃនេះ គឺចំពេលដែលមជ្ឈមណ្ឌលត្រូវការឈាមបន្ថែម ដើម្បី​ផ្តល់ឈាមសង្គ្រោះជីវិតដល់អ្នកមានតម្រូវការ ហើយក៏សូមកោតសរសើរក្រុមហ៊ុន ដែលបង្កើតទម្លាប់ ដោយយកការអបអរ ជាការផ្តល់ឈាមសង្គ្រោះជីវិត។ វាពិតជាមានអត្ថន័យណាស់ និងមានអត្ថប្រយោជន៍ សម្រាប់សង្គមខ្មែរយើង»។

ជាមួយគ្នានេះ លោកស្រី ជួប វិច្ឆិកា នាយិកាប្រតិបត្តិអង្គការផ្កាយសមុទ្រកម្ពុជាបានលើកឡើងថា៖ «គំនិតផ្តួចផ្តើមនេះ បានជួយលើកកម្ពស់អនាម័យ និងសុខមាលភាពរស់នៅរបស់គ្រួសារ និងកុមារខ្វះខាត។ ផ្តល់សាប៊ូ បើស្តាប់ទៅ ដូចសាមញ្ញណាស់ តែព្រោះតែសាប៊ូនេះ គ្រួសារទាំងនោះនឹងបង្កើនការលាងដៃឱ្យស្អាត។ ពេលដៃស្អាត មិនសូវឈឺស្កាត់ ហើយមិនសូវខាតពេលប្រកបរបរ ហើយធ្វើឱ្យក្មេងៗអាចទៅរៀនជាប់លាប់។ នេះជារឿងវិជ្ជមានមែនទែន»។

សូមជម្រាបជូនថា ក្នុងឱកាសអបអរខួប ៣៣ ឆ្នាំ នៅកម្ពុជា ​ដ៏ពិសេសនេះ ក្រុមហ៊ុន កូកា-កូឡា ខេមបូឌា បេវេរេដ ខមប៉ានី សូមថ្លែងអំណរគុណយ៉ាងជ្រាលជ្រៅដល់​បុគ្គលិក ដៃគូសហការ និងមិត្តអ្នកសារព័ត៌មាន ដែលបានចូលរួមអបអរជុំគ្នាដោយភាពកក់ក្តៅ និងរីករាយ។ ក្រុមហ៊ុនប្តេជ្ញាបន្តជួយគាំទ្រសហគមន៍​ ក៏ដូចជាបន្តរួមចំណែកនៃការរីកចម្រើនរួមគ្នាជាមួយកម្ពុជា៕

ដោយ៖ រិទ្ធី