AKP កំពង់ចាម ថ្ងៃទី០៨ ខែឧសភា ឆ្នាំ២០២៦--នៅក្នុងពិធីចុះជួបសំណេះសំណាល និងពិនិត្យមើលសហគមន៍មួយកន្លែងនៅឃុំរក្សត្នោត ក្នុងភូមិសាស្ត្រស្រុកស្ទឹងត្រង់ នាព្រឹកថ្ងៃទី០៨ ខែឧសភា ឆ្នាំ២០២៦នេះ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានលើកឡើងថា ដើម្បីលើកកម្ពស់តម្លៃកសិផលក្នុងស្រុក និងទប់ស្កាត់ការក្លែងបន្លំប្រភេទទុរេនពីតំបន់ផ្សេងៗ  បងប្អូនប្រជាកសិករ និងសហគមន៍ដាំទុរេនក្នុងស្រុកស្ទឹងត្រង់ គួររួបរួមគ្នាបង្កើតជា ស្លាកសញ្ញាសម្គាល់ផលិតផល បង្កើតជាឡូហ្គោ (Logo) ឬ QR Code បិទលើផ្លែទុរេននីមួយៗ ដើម្បីសម្គាល់ និងបញ្ជាក់ពីប្រភពដើម ដើម្បីឱ្យអតិថិជនងាយស្រួលស្កេនពិនិត្យប្រភពចម្ការ ឱ្យបានច្បាស់លាស់ ជាផលិតផលទុរេនស្ទឹងត្រង់ របស់ខេត្តកំពង់ចាមយើង។ 

ឯកឧត្តម អ៊ុន ចាន់ដា បានបញ្ជាក់ថា ទុរេនស្រុកស្ទឹងត្រង់ ខេត្តកំពង់ចាមរបស់យើង គឺជាស្រុកដ៏មានសក្តានុពលខ្ពស់លើដំណាំទុរេន និង ដំណាំដទៃទៀតដែលមានរសជាតិឆ្ងាញ់ពិសារដែលទទួលស្គាល់ដោយអ្នកបរិភោគទូទៅ។ កន្លងមកមានការនាំចូលទុរេនពីក្រៅតំបន់ ហើយយកឈ្មោះទុរេនស្ទឹងត្រង់ទៅប្រើប្រាស់លើទុរេននាំចូល ដែលធ្វើឱ្យប៉ះពាល់ដល់កេរ្តិ៍ឈ្មោះ និងតម្លៃទីផ្សារពិតប្រាកដ។

    បន្ទាប់ពីទទួលបានការណែនាំរបស់ ឯកឧត្តមអភិបាលខេត្ដ ជំរុញឱ្យសហគមន៍សហការជាមួយមន្ទីរជំនាញ ដើម្បីបង្កើតឡូហ្គោ (Logo) និងQR Code បិទលើផ្លែទុរេននីមួយៗ បញ្ជាក់សញ្ញាសម្គាល់ដែលបញ្ជាក់ពីប្រភពដើម "ទុរេនស្ទឹងត្រង់" បងប្អូនកសិករនៅក្នុងសហគមន៍ទុរេនស្រុកស្ទឹងត្រង់ បានសម្តែងនូវការសប្បាយរីករាយ និងគាំទ្រយ៉ាងពេញទំហឹងចំពោះអនុសាសន៍នេះ។ ហើយសន្យានឹងខិតខំរៀបចំរចនាសម្ព័ន្ធសហគមន៍ឱ្យកាន់តែរឹងមាំដើម្បីប្រែក្លាយទុរេនស្ទឹងត្រង់ឱ្យមានសញ្ញាសម្គាល់ផលិតផលកសិកម្មប្រចាំខេត្តកំពង់ចាម ត្រឹមត្រូវច្បាស់លាស់៕ 

ដោយ ឆាយ ម៉ុត