AKP ភ្នំពេញ ថ្ងៃទី0៨ ខែឧសភា ឆ្នាំ២០២៦--អង្គការអភិរក្សអន្តរជាតិកម្ពុជា (អង្គការ CI) បានរៀបចំកិច្ចប្រជុំផ្សព្វផ្សាយ និងពិគ្រោះយោបល់ ស្តីពីការមិនបន្តជាភូមិគោលដៅក្នុងការអនុវត្តន៍គម្រោងរេដបូកព្រៃឡង់ ជាមួយភូមិចំនួន១៨ ក្នុងខេត្តព្រះវិហារ កំពង់ធំ និងក្រចេះ នៃដែនជម្រកសត្វព្រៃ ព្រៃឡង់ ។នេះបើតាមការឱ្យដឹងពីអង្គការ CI នៅថ្ងៃទី០៨ ខែឧសភា ឆ្នាំ២០២៦នេះ។ 

កិច្ចប្រជុំនេះបានបង្ហាញពីលទ្ធផលនៃការធ្វើបច្ចុប្បន្នភាពភូមិគោលដៅរបស់គម្រោងរេដបូកព្រៃឡង់ និងបានចែករំលែកព័ត៌មានស្តីពីការមិនបន្តជាភូមិគោលដៅក្នុងការអនុវត្តន៍គម្រោងដល់តំណាងអ្នកភូមិ និងអាជ្ញាធរមូលដ្ឋានផងដែរ។ កិច្ចប្រជុំនេះមានការចូលរួមពីតំណាងសហគមន៍ អាជ្ញាធរមូលដ្ឋាន និងតំណាងមន្ទីរបរិស្ថានខេត្ត សរុបចំនួន ១២០នាក់ ជនជាតិដើមភាគតិច ២៥នាក់។ ក្នុងឱកាសនោះ អ្នកចូលរួមបានពិភាក្សាលើបញ្ហាសំខាន់ៗ ដែលជាលទ្ធផលភូមិចំនួនពីរ ក្នុងចំណោម ១៨ភូមិត្រូវបានរក្សាទុកជាភូមិគោលដៅវិញ។ ការណ៍នេះបានបង្ហាញពីការធ្វើការជាមួយសហគមន៍មូលដ្ឋានដោយផ្អែកលើគោលការណ៍នៃការសម្រេចចិត្តដោយសេរី ការទទួលបានព័ត៌មានជាមុន និងស៊ីជម្រៅ និងសិទ្ធិសម្រេចចិត្ត (FPIC)។

សូមរំលឹកថា អង្គការCI និងក្រសួងបរិស្ថានបាន និងកំពុងអនុវត្តគម្រោងរេដបូកព្រៃឡង់ នៅដែនជម្រកសត្វព្រៃ ព្រៃឡង់ ក្រោមយន្តការឥណទានកាបូនរួមគ្នា ក្នុងភូមិសាស្ត្រខេត្តចំនួនបួនរួមមានខេត្តស្ទឹងត្រែង ក្រចេះ កំពង់ធំ និងព្រះវិហារ តាំងពីឆ្នាំ២០២២មក ដោយមានភូមិគោលដៅសរុបចំនួន ៤៩ភូមិ។ យ៉ាងណាមិញ ក្រោយពីមានការកែប្រែតំបន់គោលដៅគម្រោងរេដបូកព្រៃឡង់ស្របតាមអនុសាសន៍របស់ក្រសួងបរិស្ថាន អង្គការCI ក៏បានសម្រេចធ្វើការប្រជុំពិគ្រោះយោបល់ភាគីពាក់ព័ន្ធម្តងទៀត ដើម្បីធ្វើបច្ចុប្បន្នភាពភូមិគោលដៅឡើងវិញ។ បន្ទាប់ពីនេះអង្គការក៏បានបង្ហាញ និងពិភាក្សាលើវឌ្ឍនភាពនៃការអនុវត្តន៍គម្រោងរេដបូកព្រៃឡង់ ដើម្បីធានាថាប្រជាពលរដ្ឋទទួលបានព័ត៌មានគម្រោងកាន់តែទូលំទូលាយ ៕ 

ដោយ ណយ នឿន (ប្រភព៖CI)