AKP កំពង់ធំ ថ្ងៃទី០៨ ខែឧសភា ឆ្នាំ២០២៦--ឯកឧត្តម នួន ផារ័ត្ន អភិបាល នៃគណៈអភិបាលនិងជាប្រធានគណៈបញ្ជាការឯកភាពរដ្ឋបាលខេត្តកំពង់ធំបានជំរុញាដល់ប្រធានគណៈបញ្ជាការឯកភាពរដ្ឋបាលក្រុង ស្រុក បន្តសហការគ្នាថែរក្សាការពារទប់ស្កាត់ និងបង្ក្រាបបទល្មើសធនធានធម្មជាតិ និងប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា(online  scam)ឱ្យមានប្រសិទ្ធភាពក្នុងដែនសមត្ថកិច្ចរបស់ខ្លួន។ ឯកឧត្តមបានជំរុញដូចនេះក្នុងកិច្ចប្រជុំប្រចាំខែរបស់គណៈបញ្ជាការឯកភាពរដ្ឋបាលខេត្តកំពង់ធំកាលពីរសៀលថ្ងៃទី០៧ ខែឧសភា ឆ្នាំ២០២៦នៅសាលប្រជុំប្រាសាទតោនៃរដ្ឋបាលខេត្តកំពង់ធំ។

ជាមួយគ្នានេះ ឯកឧត្តម នួន ផារ័ត្ន បានណែនាំដល់គណៈបញ្ជាការឯកភាពរដ្ឋបាលក្រុងស្ទឹងសែនឱ្យចុះរៀបចំសណ្តាប់ធ្នាប់ អនាម័យ និងសោភ័ណភាពសាធារណៈនៅតាមសួនស្ទឹងសែនឱ្យមានរបៀបរៀបរយ និងស្អាតបាតជានិច្ច។ចុះប្រមូលជនអនាថា និងជនវិកលចរិតក្នុងក្រុងស្ទឹងសែន បញ្ជូនទៅមន្ទីរសង្គមកិច្ច អតីតយុទ្ធជន និងយុវនីតិសម្បទា ដើម្បីរៀបចំការថែទាំសមស្រប ព្រមទាំងរៀបចំទីតាំងចតយានយន្តឱ្យមានសណ្តាប់ធ្នាប់ដើម្បីប្រែក្លាយក្រុងស្ទឹងសែនឱ្យក្លាយជាទីក្រុងមានសោភ័ណភាព និងទាក់ទាញភ្ញៀវទេសចរជាតិ និងអន្តរជាតិមកស្នាក់នៅ និងកម្សាន្តប្រកបដោយភាពរីករាយ និងកក់ក្តៅ៕

ដោយ ស៊ុម វណ្ណា