AKP ព្រះសីហនុ ថ្ងៃទី0៨ ខែឧសភា ឆ្នាំ២០២៦--ឯកឧត្តម ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ នាព្រឹកថ្ងៃសុក្រទី៨ ខែឧសភា ឆ្នាំ២០២៦នេះបានអញ្ជើញជួបសំណេះសំណាលជាមួយនិយោជក កម្មករ និយោជិតតំបន់សេដ្ឋកិច្ចពិសេស ក្រុងព្រះសីហនុ ដើម្បីអបអរសាទរខួបអនុស្សាវរីយ៍លើកទី១៤០ ទិវាពលកម្មអន្តរជាតិ ១ឧសភា ក្រោមប្រធានបទ “រួមគ្នាកសាងភាពធន់ ដើម្បីការងារសមរម្យ” ដែលមានបុគ្គលិក កម្មករ និយោជិកចូលរួមចំនួន ៥០០នាក់ ។

   លោក យ៉ូវ ខេមរា ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តព្រះសីហនុ អានសារលិខិតសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសខួបអនុស្សាវរីយលើកទី១៤០ ទិវាពលកម្មអន្តរជាតិ ១ឧសភា ២០២៦ ជាការឆ្លុះបញ្ចាំងការយកចិត្តទុកដាក់ និងការបេជ្ញាចិត្តលើកកម្ពស់ការអភិវឌ្ឍន៍ទីផ្សារការងារប្រកបដោយភាពធន់ និងចីរភាព ការកែលម្អលក្ខខណ្ឌការងារការធានាសិទ្ធិការងារ និងសេរីភាពអង្គការវិជ្ជាជីវៈ ការពង្រឹងប្រព័ន្ធគាំពារសង្គម និងការលើកកម្ពស់កិច្ចសន្ទនាសង្គម ក្នុងគោលដៅបម្រើឧត្តមប្រយោជន៍របស់បងប្អូនកម្មករ និយោជិតទាំងនៅក្នុងប្រព័ន្ធ និងក្រៅប្រព័ន្ធ។ រាជរដ្ឋាភិបាលមានឆន្ទៈក្នុងការទាក់ទាញវិនិយោគ ដើម្បីជំរុញសន្ទុះអភិវឌ្ឍសេដ្ឋកិច្ចជាតិ បង្កើតសហគ្រាស ក្រុមហ៊ុន រោងចក្រ និងបង្កើនឱកាសការងារជូនប្រជាពលរដ្ឋថែមទាំងមានមហិច្ឆតាក្នុងការកសាងប្រព័ន្ធសេដ្ឋកិច្ច ដែលមានស្ថេរភាពយូរអង្វែង និងបង្កើតការងារសមរម្យប្រកបដោយបរិយាបន្ន ដើម្បីនាំមកនូវសេចក្តីក្សេមក្សាន្ត និងវិបុលភាពជូនប្រជាពលរដ្ឋគ្រប់រូបក្រោមម្លប់ដ៏ត្រជាក់ត្រជុំនៃសន្តិភាព ។  
ឯកឧត្តម ម៉ាង ស៊ីណេត អភិបាលខេត្តព្រះសីហនុ បានថ្លែងថា ការប្រារព្ធទិវាពលកម្មអន្តរជាតិ ១ឧសភា ២០២៦នេះគឺដើម្បីរំលឹកការអនុវត្តន៍នូវលក្ខខណ្ឌការងារ សិទ្ធិសេរីភាពនានារបស់កម្មករ និយោជិត និយោជក ដែលមាននៅក្នុងច្បាប់ ស្តីពីការងារ និងអនុសញ្ញាអន្តរជាតិនានា។ កម្ពុជាតែងតែបានប្រារឰទិវាពលកម្មអន្តរជាតិ ១ឧសភា ជារៀងរាល់ឆ្នាំចាប់តាំងពីក្រោយថ្ងៃរំដោះ ៧មករា ឆ្នាំ១៩៧៩នោះមក។ ការជ្រើសរើសប្រធានបទ “រួមគ្នាកសាងភាពធន ដើម្បីការងារសមរម្យ” សម្រាប់ទិវាពលកម្មអន្តរជាតិ ១ឧសភា ឆ្នាំ២០២៦នេះ ពិតជាបានបង្ហាញឱ្យឃើញកាន់តែច្បាស់ និងជាសក្ខីភាពនៃការយកចិត្តទុកដាក់របស់រាជរដ្ឋាភិបាលក្នុងការលើកកម្ពស់ការអភិវឌ្ឍន៍ទីផ្សារការងារប្រកបដោយភាពធន់ និងចីរភាព ការកែលម្អលក្ខខណ្ឌការងារ ការធានាសិទ្ធិការងារ និងសេរីភាពអង្គការវិជ្ជាជីវៈ ការពង្រឹងប្រព័ន្ធគាំពារសង្គម និងការលើកកម្ពស់កិច្ចសន្យាសង្គម ក្នុងគោលដៅបម្រើឧត្តមប្រយោជន៍របស់បងប្អូនកម្មករ និយោជិតទាំងក្នុង និងក្រៅប្រព័ន្ធដោយប្រែក្លាយ “សហគ្រាសមួយ ជាសហគមន៍សុខសាន្តមួយ" ក៏ដូចជាបង្កើតភាពធន់សម្រាប់ការងារសមរម្យនៅកម្ពុជា។ 

រាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំប្រកបដោយចក្ខុវិស័យវែងឆ្ងាយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាបានដាក់ចេញ និងកំពុងជំរុញការអនុវត្តន៍យុទ្ធសាស្ត្របញ្ចកោណដំណាក់កាលទី១ ដើម្បីធានាបាននូវកំណើនការងារ សមធម៌ ប្រសិទ្ធភាព និងចីរភាព សំដៅប្រែក្លាយកម្ពុជា ជាប្រទេសដែលមានចំណូលខ្ពស់នៅឆ្នាំ២០៥០។ ក្នុងស្មារតីនេះ ការកែទម្រង់ និងការពង្រឹងភាពធន់នៃវិស័យសេដ្ឋកិច្ចសង្គម ត្រូវបានចាត់ទុកជាអាទិភាពខ្ពស់បំផុត ដើម្បីឆ្លើយតបនឹងការផ្លាស់ប្តូរយ៉ាងឆាប់រហ័សនៃរចនាសម្ព័ន្ធសេដ្ឋកិច្ច ការងារ និងភូមិសាស្ត្រនយោបាយ។ ជាមួយគ្នានេះ រាជរដ្ឋាភិបាលកម្ពុជាបានដាក់ចេញកម្មវិធីនយោបាយអាទិភាពចំនួន៦ ប្រកបដោយភាពប្រទាក់ក្រឡាគ្នា ស្របនឹងអនុសាសន៍ទាំង១០ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាមានដូចជា៖ ១.ចរចារប្រាក់ឈ្នួល,២.បន្តអនុវត្តរបបសន្តិសុខសង្គម(ថែទាំសុខភាព ហានីភ័យការងារ និងផ្នែកសោធននិវត្តន៍), ៣.ការងារបណ្តុះបណ្តាលវិជ្ចាជីវ និងបច្ចេកទេស, ៤.ការអនុវត្តធ្វើតេស្តិវាយតម្លៃជំនាញ (RPL) បងប្អូនអតីតពលករមកពីប្រទេសថៃ, ៥.ការជ្រើសរើសពានរង្វាន់ សហគ្រាសមួយ ជាសហគមន៏សុខសាន្ដមួយ,៦.ស្វាគមន៍បងប្អូនអតីតពលករមកពីប្រទេសថៃ, ៧.លើកទឹកចិត្តសហគ្រាស ក្រុមហ៊ុន រោងចក្រ តំបន់សេដ្ឋកិច្ច សួនឧស្សាហកម្ម, ៨.កែលម្អកន្លែងហូបបាយ អាហារដ្ឋានឪ្យបានសមរម្យ, ៩.លើកកម្ពស់លក្ខខណ្ឌការងារតាមរយការពង្រីកសមត្ថភាព និង១០.ពង្រឹងសុខដុមនីយកម្មនៃទំនង សក់ទំនងវិជ្ចាជីវៈ ។   

ក្នុងឱកាសនោះ ឯកឧត្តម អភិបាលខេត្ត ក៏បានធ្វើការអំពាវនាវដល់ពលករខ្មែរដែលធ្វើការនៅក្រៅប្រទេស សូមមករកការងារធ្វើនៅកម្ពុជា ជាពិសេសការងារក្នុងខេត្តព្រះសីហនុ ព្រោះយើងនៅខ្វះកម្លាំងពលកម្មជាច្រើនពាន់នាក់។ ម្យ៉ាងទៀតការមកធ្វើការនៅខេត្តព្រះសីហនុ ចូលរួមចំណែកអភិវឌ្ឍសេដ្ឋកិច្ចជាតិយើងផង និងអភិវឌ្ឍសេដ្ឋកិច្ចគ្រួសារផង។

បន្ទាប់មក ឯកឧត្តម អភិបាលខេត្ត ក៏បាននាំយកថវិកាសម្តេចធិបតី និងលោកជំទាវបណ្ឌិត ឧបត្ថមជូនបុគ្គលិក កម្មករ និងយោជិកដែលបានចូលរួមចំនួន៥០០នាក់ ក្នុងម្នាក់ទទួលបានថវិកាចំនួន២ម៉ឺនរៀល។     
សូមរម្លឹកថា តំបន់សេដ្ឋកិច្ចពិសេសក្រុងព្រះសីហនុ មានរោងចក្រ សហគ្រាសចំនួន២១៧ ដែលមានកម្មករ និយោជិកប្រមាណជា ៣៥ ០០០នាក់ ៕ 

ដោយ ងូ សុមុនី