AKP ភ្នំពេញ ថ្ងៃទី០៧ ខែឧសភា ឆ្នាំ២០២៦-- រដ្ឋមន្ត្រីក្រសួងអប់រំ យុវជន និងកីឡា បានចាត់ទុកឯកសារណែនាំនៃការប្រើប្រាស់បញ្ញាសិប្បនិម្មិត (AI) សម្រាប់គ្រូបង្រៀន ថាជាជំហានយុទ្ធសាស្ត្រដ៏សំខាន់ក្នុងការជំរុញការប្រើប្រាស់បច្ចេកវិទ្យាអប់រំឱ្យកាន់តែមានប្រសិទ្ធភាព និងទូលំទូលាយ។ ក្នុងន័យនេះ ឯកឧត្តមបានណែនាំឱ្យក្រុមការងារបន្តរៀបចំផែនការសកម្មភាព ដើម្បីបញ្ជ្រាបការប្រើប្រាស់បញ្ញាសិប្បនិម្មិត (AI) ចូលទៅក្នុងកម្មវិធីបណ្តុះបណ្តាលនៅតាមសាលាបណ្តុះបណ្តាលគ្រូ និងរៀបចំយុទ្ធសាស្ត្រផ្សព្វផ្សាយនៅតាមគ្រឹះស្ថានសិក្សាទូទាំងប្រទេស។ 

ក្នុងកិច្ចប្រជុំស្ដីពីការបង្ហាញឯកសារណែនាំនៃការប្រើប្រាស់បញ្ញាសិប្បនិម្មិត (AI) សម្រាប់គ្រូបង្រៀននារសៀលថ្ងៃទី០៦ ខែឧសភា ឆ្នាំ២០២៦ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានណែនាំឱ្យប្រើប្រាស់គ្រប់ប្រព័ន្ធផ្សព្វផ្សាយរបស់ក្រសួង ដើម្បីបញ្ជ្រាបចំណេះដឹងបច្ចេកវិទ្យានេះដល់លោកគ្រូ អ្នកគ្រូ ក្នុងការបង្កើនសមត្ថភាពឌីជីថល និងជួយឱ្យពួកគាត់អាចយកប្រព័ន្ធបច្ចេកវិទ្យា AI នេះទៅប្រើប្រាស់ជាជំនួយក្នុងការបង្រៀន និងរៀនប្រកប ដោយនវានុវត្តន៍។

បើតាមក្រសួងអប់រំ យុវជន និងកីឡាថា ការបង្កើតឯកសារណែនាំនៃការប្រើប្រាស់បញ្ញាសិប្បនិម្មិត (AI)សម្រាប់គ្រូបង្រៀននេះឡើងក្នុងគោលបំណងឱ្យវាក្លាយជាជំនួយការឆ្លាតវៃ៖ ផ្លាស់ប្តូរតួនាទី AI ឱ្យទៅជាជំនួយការ ដើម្បីសម្រាលបន្ទុកការងាររដ្ឋបាល និងការរៀបចំឯកសារមេរៀន។ លើកកម្ពស់វិធីសាស្ត្របង្រៀនបែបថ្មី៖ ជំរុញការបង្រៀនតាមបែបសិស្សមជ្ឈមណ្ឌល និងការរៀនតាមបែបសកម្ម (Active Learning) តាមរយៈបច្ចេកវិទ្យា។ ពង្រឹងសមត្ថភាពគ្រូបង្រៀនឌីជីថល៖ ផ្ដល់ជាត្រីវិស័យសម្រាប់លោកគ្រូ អ្នកគ្រូ ក្នុងការកសាងសមត្ថភាពខ្លួនឯងឱ្យក្លាយជាគ្រូបង្រៀនឌីជីថល សម្រាប់សតវត្សទី២១។ ធានាតម្លាភាព និងសីលធម៌៖ បណ្ដុះស្មារតីទទួលខុសត្រូវក្នុងការប្រើប្រាស់បច្ចេកវិទ្យា ដោយមិនឱ្យប៉ះពាល់ដល់កម្មសិទ្ធិបញ្ញា និងសុវត្ថិភាពទិន្នន័យសិស្ស៕

ដោយ៖ ចាន់ សុភឿន (ប្រភព៖ ក្រសួងអប់រំ)