AKP ភ្នំពេញ ថ្ងៃទី០៧ ខែឧសភា ឆ្នាំ២០២៦ -- កងឆ្មាំបដិវត្តន៍អ៊ីស្លាម(IRGC) បានអះអាងពីការគ្រប់គ្រងទាំងស្រុងលើច្រកសមុទ្រហ័រមុសដោយបានអះអាងថា មិនមាននាវាពាណិជ្ជកម្ម ឬនាវាដឹកប្រេងណាមួយបានឆ្លងកាត់ផ្លូវទឹកនេះនាពេលថ្មីៗនេះដោយគ្មានការអនុញ្ញាតពីអ៊ីរ៉ង់ឡើយ។សេចក្តីថ្លែងការណ៍នេះបម្រើជាការបដិសេធដោយផ្ទាល់ចំពោះការអះអាងរបស់សហរដ្ឋអាមេរិកអំពីការឆ្លងកាត់ដោយសុវត្ថិភាព ដោយមន្ត្រីអ៊ីរ៉ង់បានព្រមានថា ចលនាសមុទ្រណាមួយដែលប្រឆាំងនឹងគោលការណ៍របស់កងទ័ពជើងទឹករបស់ពួកគេនឹងប្រឈមមុខនឹងហានិភ័យធ្ងន់ធ្ងរ និងអន្តរាគមន៍ដោយបង្ខំ។

ភាពតានតឹងបានកើនឡើងបន្ថែមទៀតបន្ទាប់ពីការសន្យារបស់ប្រធានាធិបតីសហរដ្ឋអាមេរិក លោក ដូណាល់ ត្រាំ ក្នុងការដឹកនាំនាវាដែលជាប់គាំងចេញពីផ្លូវទឹកដែលត្រូវបានហាមឃាត់មួយនេះ។ ជាការឆ្លើយតបបញ្ជាការយោធាអ៊ីរ៉ង់បានគំរាមកំហែងវាយប្រហារកងកម្លាំងបរទេសណាមួយ ជាពិសេសយោធាអាម៉េរិក ដែលព្យាយាមចូលទៅក្នុងច្រកសមុទ្រ។ របាយការណ៍បានបង្ហាញថា កងកម្លាំងកងទ័ពជើងទឹកអ៊ីរ៉ង់បានបាញ់មីស៊ីល និងគ្រាប់រ៉ុក្កែតនៅជិតនាវាពិឃាតអាម៉េរិករួចហើយ ជាការព្រមានឱ្យរក្សាចម្ងាយរបស់ពួកគេ។

ការប្រឈមមុខដាក់គ្នាបច្ចុប្បន្នមានឫសគល់ពីសេចក្តីសម្រេចរបស់អ៊ីរ៉ង់ក្នុងការហាមឃាត់ការឆ្លងកាត់របស់នាវាអាម៉េរិក និងអ៊ីស្រាអែលចាប់តាំងពីថ្ងៃទី២៨ ខែកុម្ភៈ បន្ទាប់ពីការវាយប្រហាររួមគ្នាលើទឹកដីអ៊ីរ៉ង់។ ការបិទផ្លូវនេះកាន់តែខ្លាំងឡើងបន្ទាប់ពីកិច្ចចរចាបរាជ័យនៅទីក្រុងអ៊ីស្លាម៉ាបាដកាលពីដើមខែមេសា ដែលនាំឱ្យមានផែនការប្រតិបត្តិការថ្មីរបស់អ៊ីរ៉ង់ដែលត្រូវបានរចនាឡើងដើម្បីទប់ទល់នឹងការប៉ុនប៉ងណាមួយរបស់សហរដ្ឋអាមេរិកក្នុងការបើកច្រកសមុទ្រហ័រមុសនេះឡើងវិញ៕

ដោយ៖ យា ចិន្ដាខន្ដី (ប្រភព៖ ឆាយណាដេលី)