AKP ភ្នំពេញ ថ្ងៃទី០៧ ខែឧសភា ឆ្នាំ២០២៦--លោកសាស្ត្រាចារ្យ SAKAKIBARA Yasushi សមាជិកក្រុមប្រឹក្សាភិបាលនៃមូលនិធិ CIESF កាលពីថ្ងៃទី០៦ ខែឧសភា ឆ្នាំ២០២៦ បានដឹកនាំក្រុមការងារចុះបំពេញទស្សនកិច្ចសិក្សា និងពិភាក្សាការងារនៅសាលាគរុកោសល្យ និងវិក្រឹតការខេត្តស្វាយរៀង ដើម្បីពង្រឹងកិច្ចសហប្រតិបត្តិការលើការងារអប់រំវិទ្យាសាស្ត្រឱ្យកាន់តែប្រសើរឡើង។

ផ្អែកតាមស្មារតីនៃកិច្ចពិភាក្សា មូលនិធិ CIESF នឹងបន្តគាំទ្រយ៉ាងសកម្មលើផ្នែកសម្ភារ និងវិធីសាស្ត្របង្រៀនសម្រាប់គ្រូឧទ្ទេសមុខវិជ្ជាវិទ្យាសាស្ត្រ។ ជាលទ្ធផល មូលនិធិបានធ្វើការអនុម័តថវិកាចំនួន២គម្រោងសម្រាប់បន្តអនុវត្តសកម្មភាព រួមមាន គម្រោង EXPO’70 FUND និងគម្រោងគូសាណូណិ។ ចំពោះគម្រោង EXPO’70 FUND នឹងត្រូវអនុវត្តក្នុងរយៈពេល៣ឆ្នាំ ដោយផ្ដោតសំខាន់លើសកម្មភាពបង្គោល ដូចជា ការបណ្ដុះបណ្ដាលបច្ចេកទេស៖ ផ្ដោតលើខ្លឹមសារមេរៀនស្ដីពីការប្រើប្រាស់សៀវភៅណែនាំគ្រូវិទ្យាសាស្ត្រថ្នាក់ទី៥ ដល់គ្រូឧទ្ទេសមុខវិជ្ជាវិទ្យាសាស្ត្រនៃសាលាគរុកោសល្យ និងវិក្រឹតការខេត្តស្វាយរៀង។ ការគាំទ្រដល់សាលាគោលដៅ៖ ធ្វើការបំប៉នបន្ថែមដល់គ្រូបង្រៀនថ្នាក់ទី៥ នៅតាមសាលាបឋមសិក្សាគោលដៅចំនួន១៤សាលា ក្នុងក្រុងស្វាយរៀងសរុប ២៥នាក់។ ការផលិតធនធានសិក្សា៖ រៀបចំបោះពុម្ពសៀវភៅណែនាំគ្រូវិទ្យាសាស្ត្រថ្នាក់ទី៥ ដើម្បីចែកចាយជូនដល់សាលាបឋមសិក្សាគោលដៅទាំងអស់។

តាមផែនការដែលបានពិភាក្សា វគ្គបណ្ដុះបណ្ដាលនឹងចាប់ផ្ដើមអនុវត្តចាប់ពីខែកក្កដា ឆ្នាំ២០២៦នេះតទៅ ដោយគោលបំណងចម្បងនៃគម្រោងនេះ គឺចង់ឱ្យសាលាគរុកោសល្យ និងវិក្រឹតការខេត្តស្វាយរៀងក្លាយជាមជ្ឈមណ្ឌលឧត្តមភាពលើមុខវិជ្ជាវិទ្យាសាស្ត្រប្រចាំខេត្ត ព្រមទាំងជំរុញឱ្យគ្រូឧទ្ទេសទាំងអស់បង្កើនការស្រាវជ្រាវប្រតិបត្តិ ដើម្បីលើកកម្ពស់សមត្ថភាពរបស់ខ្លួនឱ្យឆ្លើយតបទៅនឹងយុគសម័យអប់រំឌីជីថល៕

ដោយ៖ ចាន់ សុភឿន (ប្រភព៖ ក្រសួងអប់រំ)