AKP ភ្នំពេញ ថ្ងៃទី០៧ ខែឧសភា ឆ្នាំ២០២៦-- អាជ្ញាធរជាតិព្រះវិហារ បានទទួលវត្ថុបុរាណចំនួន៧ប្រភេទពីរដ្ឋបាលស្រុក និងព្រះសង្ឃគង់នៅវត្តទួលអណ្តែកស្រុកជាំក្សាន្ត ខេត្តព្រះវិហារ ដើម្បីរក្សាទុក ចុះបញ្ជី អភិរក្ស និងវិភាគបន្ថែម នៅរោងជាងសារមន្ទីរធម្មជាតិសាកលសម្តេចតេជោ ហ៊ុន សែន ព្រះវិហារ។

ទាក់ទិនក្នុងរឿងនេះឯកឧត្តម ភិន សំណាង ប្រធាននាយកដ្ឋានស្រាវជ្រាវ បណ្តុះបណ្តាល និងតម្កល់ឯកសារ បានឱ្យដឹងថា កាលពីអំឡុងដើមសប្តាហ៍មកនេះ មន្រ្តីនៃនាយកដ្ឋានស្រាវជ្រាវ បណ្តុះបណ្តាល និងតម្កល់ឯកសារ បានចុះទៅទទួលវត្ថុបុរាណទាំងនេះ ដោយផ្ទាល់នៅស្រុកជាំក្សាន្ត ខេត្តព្រះវិហារ។ វត្ថុបុរាណទាំងនេះរួមមាន ដងខ្លួនបដិមាទេពស្រីចំនួន១ ធ្វើពីថ្មភក់ចំនួន១ និងវត្ថុសិល្បះចំនួន៦ទៀតរួមមាន ក្រឡចំនួន១ធ្វើពីដីដុត, កំណាត់សសរពេជ្រចំនួន២, ចម្លាក់ទេពស្រីចំនួន១, ចម្លាក់ទេពស្រីរាំចំនួន១, និងវត្ថុសិល្បះមួយទៀតទំនងជា ថ្មបស ចំនួន១ធ្វើពីថ្មភក់។ ឯកឧត្តមបានបញ្ជាក់ថាវត្ថុបុរាណទាំងនេះ រដ្ឋបាលស្រុក និងព្រះសង្ឃបានទទួលពីប្រជាពលរដ្ឋ ដែលបានប្រទះឃើញកន្លងមក នឹងបានប្រគល់បន្តមកអាជ្ញាធរជាតិព្រះវិហារដើម្បីរក្សាទុក និងអភិរក្ស។

អាជ្ញាធរជាតិព្រះវិហារបានថ្លែងអំណរគុណដល់អាជ្ញាធរមូលដ្ឋាន ព្រះសង្ឃ និងប្រជាពលរដ្ឋ ដែលតែងតែចូលរួមសហការក្នុងការផ្តល់បដិមារ និងវត្ថុសិល្បៈបុរាណមកអ្នកជំនាញដើម្បីរក្សាទុក។ជាមួយគ្នានេះអាជ្ញាធរជាតិព្រះវិហារចាត់ទុកថា ការផ្តល់ជូននេះបង្ហាញពីការចូលរួមយ៉ាងសំខាន់ក្នុងកិច្ចការពារ និងថែរក្សាវត្ថុបុរាណ ដែលជាបេតិកភណ្ឌវប្បធម៌ដ៏មានតម្លៃសម្រាប់ជាតិ និងសម្រាប់អ្នកជំនាន់ក្រោយ៕

ដោយ៖ មករា