AKP បន្ទាយមានជ័យ ថ្ងៃទី0៦ ខែឧសភា ឆ្នាំ២០២៦--  ភាពខ្លាំងនៃវិស័យអប់រំនៅតាមបណ្តាខេត្ត កាន់តែលេចធ្លោឡើងតាមរយៈសមត្ថភាពពិតរបស់យុវជនជំនាន់ក្រោយ។ នៅព្រឹកថ្ងៃទី៦ ខែឧសភា ឆ្នាំ២០២៦ វិទ្យាល័យជប់វារី ស្រុកព្រះនេត្រព្រះ ខេត្តបន្ទាយមានជ័យ បានប្រែក្លាយជាទីកន្លែងនៃក្តីរំភើប និងមោទនភាព ក្នុងពិធីជួបសំណះសំណាល អបអរសាទរជ័យលាភីលេខ១ សិស្សពូកែទូទាំងប្រទេស ក្រោមអធិបតីភាពដ៏ខ្ពង់ខ្ពស់របស់ ឯកឧត្តម គង់ ច័ន្ទវាសនា។

  ក្នុងឱកាសជួបសំណះសំណាលជាមួយលោកគ្រូ អ្នកគ្រូ និងសិស្សានុសិស្ស ឯកឧត្តម គង់ ច័ន្ទវាសនា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងារចុះមូលដ្ឋានស្រុកព្រះនេត្រព្រះ បានថ្លែងនូវការកោតសរសើរយ៉ាងស្មោះសរចំពោះការខិតខំប្រឹងប្រែងរបស់ក្មួយៗសិស្សានុសិស្ស ជាពិសេសយុវសិស្ស ធេង លីហុង ដែលបានខិតខំរហូតដណ្តើមបានមេដាយមាស លេខ១ ផ្នែកគណិតវិទ្យា ថ្នាក់ទី៩ ទូទាំងព្រះរាជាណាចក្រកម្ពុជា។

  ឯកឧត្តមបានសង្កត់ធ្ងន់ថា "ជោគជ័យនាពេលនេះ មិនត្រឹមតែជាមោទនភាពផ្ទាល់ខ្លួន និងគ្រួសារប៉ុណ្ណោះទេ ប៉ុន្តែគឺជាកិត្តិយសដ៏ធំធេងសម្រាប់ស្រុកព្រះនេត្រព្រះ និងខេត្តបន្ទាយមានជ័យទាំងមូល។ នេះជាសក្ខីភាពដែលបង្ហាញថា សិស្សនៅតាមតំបន់ជនបទ ក៏មានសមត្ថភាពខ្ពស់ អាចប្រកួតប្រជែងលំដាប់ថ្នាក់ជាតិបាន ប្រសិនបើមានការតាំងចិត្ត និងការគាំទ្រត្រឹមត្រូវ"។  ឯកឧត្តមក៏បានឆ្លៀតឱកាសថ្លែងអំណរគុណដល់លោកគ្រូ អ្នកគ្រូ ដែលបានលះបង់កម្លាំងកាយចិត្ត បណ្តុះបណ្តាលផ្ទេរចំណេះដឹងដល់សិស្សានុសិស្ស ដែលជាសសរទ្រូងដ៏រឹងមាំសម្រាប់អភិវឌ្ឍប្រទេសជាតិទៅថ្ងៃអនាគត។

  យុវសិស្ស ធេង លីហុង ដែលជាតួអង្គឯកនៃកម្មវិធី បានសម្តែងនូវក្តីរំភើបឥតឧបមា ខណៈដែលទទួលបានការលើកទឹកចិត្តដោយផ្ទាល់ពីសំណាក់ថ្នាក់ដឹកនាំ។ លីហុង បានចែករំលែកថា ការដណ្តើមបានជ័យលាភីលេខ១ នេះ មិនមែនជារឿងចៃដន្យឡើយ ប៉ុន្តែវាបានមកពីការដាក់វិន័យលើការសិក្សា និងការគាំទ្រពីលោកគ្រូ អ្នកគ្រូ និងឪពុកម្តាយ។ យុវសិស្សរូបនេះបានបញ្ជាក់ថា "ខ្ញុំបាទពិតជាមានមោទនភាពណាស់ដែលបាតំណាងឱ្យវិទ្យាល័យជប់វារី លើកមុខមាត់ស្រុកកំណើតរបស់ខ្ញុំ។ ការអញ្ជើញមកដល់របស់ឯកឧត្តមរដ្ឋលេខាធិការនាថ្ងៃនេះ គឺជាកម្លាំងចិត្តដ៏ធំធេងសម្រាប់ខ្ញុំបាទ និងមិត្តភក្តិដទៃទៀត ឱ្យកាន់តែខិតខំរៀនសូត្របន្ថែមទៀត ដើម្បីក្លាយជាធនធានដ៏ល្អសម្រាប់សង្គមជាតិ"។

  ពិធីសំណះសំណាលនេះ មិនត្រឹមតែជាការអបអរសាទរជ័យលាភីប៉ុណ្ណោះទេ ប៉ុន្តែគឺជាយុទ្ធនាការជំរុញស្មារតីសិក្សានៅទូទាំងស្រុកព្រះនេត្រព្រះ។ ឯកឧត្តម គង់ ច័ន្ទវាសនា តែងតែយកចិត្តទុកដាក់ខ្ពស់លើការអភិវឌ្ឍធនធានមនុស្ស ទន្ទឹមនឹងការងារអភិវឌ្ឍកសិកម្ម និងហេដ្ឋារចនាសម្ព័ន្ធ។

  តាមរយៈព្រឹត្តិការណ៍នេះ បានឆ្លុះបញ្ចាំងឱ្យឃើញពីការយកចិត្តទុកដាក់របស់ រាជរដ្ឋាភិបាលតាមរយៈក្រុមការងារចុះមូលដ្ឋាន ដែលតែងតែនៅកៀកកិតជាមួយប្រជាពលរដ្ឋ និងយុវជន ដើម្បីជ្រោមជ្រែង និងជំរុញឱ្យវិស័យអប់រំនៅតាមមូលដ្ឋានកាន់តែមានគុណភាព និងប្រសិទ្ធភាពខ្ពស់៕

ដោយ ឈុន សារ៉ាត