AKP ភ្នំពេញ ថ្ងៃទី ០៦ ខែឧសភា ឆ្នាំ២០២៦--លោកជំទាវ នង ធួក ប្រធានក្រុមការងារបច្ចេកទេសកិច្ចការពារកុមាររបស់ក្រសួងព័ត៌មាន នាព្រឹកថ្ងៃទី០៦ ខែឧសភា ឆ្នាំ២០២៦ បានរៀបចំកិច្ចប្រជុំផ្ទៃក្នុងដើម្បីពិភាក្សា ពិនិត្យវឌ្ឍនភាពការងារ និងលើកទិសដៅការងារបន្ត សំដៅបង្កើនប្រសិទ្ធភាពក្នុងការផ្សព្វផ្សាយ បណ្តុះបណ្តាល និងលើកទឹកចិត្តឱ្យសាធារណៈជនមានការយល់ដឹង និងចូលរួមលើបញ្ហាពលកម្មកុមារ។

លោកជំទាវបានថ្លែងអំណរគុណ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់សមាជិកក្រុមការងារទាំងអស់នាពេលកន្លងមកក្នុងការចូលរួមគាំទ្រ លើកកម្ពស់សិទ្ធិជាមូលដ្ឋានរបស់កុមារ ស្របតាមច្បាប់ជាតិ និងអន្តរជាតិ។ ជាមួយគ្នានេះ លោកជំទាវប្រធានបានផ្តល់នូវអនុសាសន៍ណែនាំ និងទិសដៅការងារគន្លឹះៗមួយចំនួនដល់ក្រុមការងារបច្ចេកទេសកិច្ចការពារកុមាររបស់ក្រសួងព័ត៌មានតាមដែនសមត្ថកិច្ចរៀងៗខ្លួនដូចជា៖
១. ការពង្រឹងការចងក្រងឯកសារ និងរូបភាពសកម្មភាព៖ សមាជិកក្រុមការងារទាំងអស់ ត្រូវយកចិត្តទុកដាក់ខ្ពស់ក្នុងការថតរូប និងប្រមូលចងក្រងរាល់រូបភាពសកម្មភាពការងារផ្សេងៗឱ្យបានច្បាស់លាស់ ជាឯកសារយោងសម្រាប់បម្រើឱ្យការសរសេររបាយការណ៍វឌ្ឍនភាពការងារ ក៏ដូចជាប្រើប្រាស់សម្រាប់ផ្សព្វផ្សាយជាសាធារណៈ។

២. ការជំរុញការស្វែងរកសារអប់រំពីស្ថាប័នដៃគូ៖ ក្រុមការងារត្រូវបន្តកិច្ចសហការ និងទំនាក់ទំនងយ៉ាងជិតស្និទ្ធជាមួយបណ្តាអង្គការ និងស្ថាប័នដៃគូពាក់ព័ន្ធ ដើម្បីស្នើសុំ «សារអប់រំ» ផ្លូវការ ដើម្បីធានាឱ្យបានខ្លឹមសារអប់រំរួមយកមកផ្សព្វផ្សាយយ៉ាងទូលំទូលាយ។
៣. ការបញ្ជ្រាប «ពាក្យស្លោក» របស់រាជរដ្ឋាភិបាលក្នុងប្រព័ន្ធផ្សព្វផ្សាយ៖ ពិនិត្យលទ្ធភាពក្នុងការយក «ពាក្យស្លោក» របស់រាជរដ្ឋាភិបាល ពាក់ព័ន្ធនឹងការលុបបំបាត់ពលកម្មកុមារ ពិសេសពាក្យស្លោកដែលជាប្រសាសន៍ថ្លែងក្នុងសុន្ទរកថាដ៏ខ្ពង់ខ្ពស់របស់ សម្តេចធិបតី នាយករដ្ឋមន្ត្រី យកមកបញ្ជ្រាបបន្ថែម។ 

សូមបញ្ជាក់ថា ក្នុងគោលបំណងពង្រឹងយន្តការការពារ និងលើកកម្ពស់សិទ្ធិជាមូលដ្ឋានរបស់កុមារ ស្របតាមច្បាប់ជាតិ និងអន្តរជាតិ ក្រសួងព័ត៌មានបានដាក់ចេញនូវសកម្មភាពសំខាន់ៗដូចជា៖ សារអប់រំចំណេះដឹងដែលបញ្ជ្រាបក្នុងនាទីកុមារ ជាភាពយន្តគំនូរជីវចល ក្នុងទម្រង់មួយងាយយល់។ តាមរយៈរូបភាពចលនានេះ ជួយឱ្យកុមារចងចាំនូវទម្លាប់ល្អៗ និងចំណេះដឹងទូទៅ។ បញ្ជ្រាបការយល់ដឹងអំពីសិទ្ធិកុមារតាមរយៈសិល្បៈកម្សាន្ត ដោយក្រសួងព័ត៌មានបានរៀបចំមហោស្រពតន្ត្រី និងចម្រៀងកុមារ ពានរង្វាន់ក្រសួងព័ត៌មាន និងការផលិតមាតិកាចម្រុះ និងវេទិកាពិភាក្សាដើម្បីឱ្យសង្គមទាំងមូលយល់ដឹងកាន់តែច្បាស់អំពីសិទ្ធិកុមារ ក្រសួងព័ត៌មានបានផលិតមាតិកាក្នុងទម្រង់ជាព័ត៌មាន បទយកការណ៍ កិច្ចសម្ភាសន៍ និងកិច្ចពិភាក្សា៕

ដោយ៖ ទូច វលក័្ខណ