AKP ភ្នំពេញ ថ្ងៃទី០៦ ខែឧសភា ឆ្នាំ២០២៦ -- ស្ថានទូតសហរដ្ឋអាមេរិកប្រចាំនៅប្រទេសអ៊ីរ៉ាក់បានព្រមានកាលពីថ្ងៃអង្គារថា «កងជីវពលភេរវករអ៊ីរ៉ាក់ដែលមានសម្ព័ន្ធភាពជាមួយអ៊ីរ៉ង់» កំពុងបន្តរៀបចំផែនការវាយប្រហារបន្ថែមទៀតប្រឆាំងនឹងពលរដ្ឋអាម៉េរិក និងគោលដៅរបស់អាម៉េរិកនៅក្នុងប្រទេស។

ស្ថានទូតបាននិយាយនៅក្នុងសេចក្តីថ្លែងការណ៍មួយនៅលើប្រព័ន្ធផ្សព្វផ្សាយសង្គមអ៊ិចរបស់សហរដ្ឋអាមេរិកថា «ធាតុផ្សំមួយចំនួនដែលជាប់ពាក់ព័ន្ធនឹងរដ្ឋាភិបាលអ៊ីរ៉ាក់នៅតែបន្តផ្តល់ការការពារនយោបាយ ហិរញ្ញវត្ថុ និងប្រតិបត្តិការយ៉ាងសកម្មសម្រាប់កងជីវពលភេរវករទាំងនេះ»។

សេចក្តីថ្លែងការណ៍នោះ បានអំពាវនាវឱ្យពលរដ្ឋអាម៉េរិកជៀសវាងការធ្វើដំណើរទៅកាន់ប្រទេសអ៊ីរ៉ាក់ «ដោយហេតុផលណាមួយ» ដោយជំរុញឱ្យមានការចាកចេញជាបន្ទាន់របស់ជនជាតិអាម៉េរិកដែលកំពុងនៅក្នុងប្រទេសអ៊ីរ៉ាក់ស្រាប់។

សេចក្តីថ្លែងការណ៍បាននិយាយថា «បេសកកម្មសហរដ្ឋអាមេរិកប្រចាំនៅប្រទេសអ៊ីរ៉ាក់នៅតែបើក ខណៈដែលកំពុងចេញដំណើរតាមបទបញ្ជាដើម្បីជួយពលរដ្ឋអាម៉េរិកនៅក្នុងប្រទេសអ៊ីរ៉ាក់»។

ស្ថានទូតបាននិយាយថា «កុំព្យាយាមមកស្ថានទូតនៅទីក្រុងបាកដាដ ឬស្ថានកុងស៊ុលនៅទីក្រុងអឺប៊ីល ដោយសារតែហានិភ័យសន្តិសុខ» ដោយបានអំពាវនាវឱ្យជនជាតិអាម៉េរិកទាក់ទងទៅមន្ត្រីនៅក្នុងស្ថានទូត និងស្ថានកុងស៊ុលតាមរយៈមធ្យោបាយអេឡិចត្រូនិក។

ភាពតានតឹងក្នុងតំបន់បានកើនឡើងចាប់តាំងពីសហរដ្ឋអាមេរិក និងអ៊ីស្រាអែលបានបើកការវាយប្រហារប្រឆាំងនឹងអ៊ីរ៉ង់នៅថ្ងៃទី២៨ ខែកុម្ភៈ ដែលបង្កឱ្យមានការសងសឹកពីទីក្រុងតេអេរ៉ង់ប្រឆាំងនឹងអ៊ីស្រាអែល ក៏ដូចជាសម្ព័ន្ធមិត្តរបស់សហរដ្ឋអាមេរិកនៅក្នុងឈូងសមុទ្រ រួមជាមួយនឹងការបិទច្រកសមុទ្រហ័រមុស។

បទឈប់បាញ់បានចូលជាធរមាននៅថ្ងៃទី០៨ ខែមេសា តាមរយៈការសម្របសម្រួលរបស់ប៉ាគីស្ថាន ប៉ុន្តែកិច្ចចរចានៅទីក្រុងអ៊ីស្លាម៉ាបាដបានបរាជ័យក្នុងការសម្រេចបាននូវកិច្ចព្រមព្រៀងយូរអង្វែង។ បទឈប់បាញ់នេះត្រូវបានបន្តដោយប្រធានាធិបតីសហរដ្ឋអាមេរិក លោក ដូណាល់ ត្រាំ នៅពេលក្រោយដោយគ្មានបញ្ជាក់កាលកំណត់៕

ដោយ៖ យា ចិន្ដាខន្ដី (ប្រភព៖ AA-AKP)