AKP ភ្នំពេញ ថ្ងៃទី៣០ ខែមេសា ឆ្នាំ២០២៦–ឯកឧត្តម ហ៊ែល តូនី អនុប្រធានអចិន្រ្តៃយ៍អាជ្ញាធរទន្លេសាប និងជាប្រធានក្រុមការងារទទួលបន្ទុកការអនុវត្តគម្រោងក្រោមកិច្ចសហប្រតិបត្តិការជាមួយធនាគារពិភពលោក នៅថ្ងៃទី៣០ ខែមេសា ឆ្នាំ២០២៦ បានអញ្ជើញដឹកនាំសម្របសម្រួលសិក្ខាសាលា ស្តីពីទំនាក់ទំនងការប្រើប្រាស់ បច្ចេកទេសវិទ្យាបញ្ញាសិប្បនិម្មិត AI សម្រាប់ការគ្រប់គ្រងទន្លេសាប និងគោលនយោបាយទឹក Co-Creation Workshop for initiative and AI for Water governance Concepts  ដោយទទួលបានកិច្ចសហការរៀបចំ ពីក្រុមការងារបច្ចេកទេសរបស់ធនាគារពិភពលោក នៅ Atom Vattanac Tower។ 

ឯកឧត្តម ហ៊ែល តូនី បានបញ្ជាក់ថា សិក្ខាសាលានេះ បានបង្ហាញ និងពិភាក្សាផ្តោតសំខាន់ទៅលើ ការកំណែទម្រង់ទិន្នន័យ និងបញ្ហាសិប្បនិម្មិត AI សម្រាប់អាជ្ញាធរទន្លេសាប និងស្ថាប័នជំនាញពាក់ពន្ធ ការចែករំលែកការយល់ដឹងពីបញ្ហាទន្លេសាប ដូចជា បរិមាណ គុណភាពទឹក និងអភិបាលកិច្ចធនធានទឹក និងការបង្ហាញអំពីខ្សែសង្វាក់តម្លៃនៃការប្រើប្រាស់បច្ចេកវិទ្យាសប្បនិម្មិត AI អភិបាលកិច្ចទឹក ដោយការរួមបញ្ចូលទិន្នន័យ ស្ថាបត្យកម្ម និងការវិភាគ ។អាជ្ញាធរទន្លេសាប បាននិងកំពុងពង្រឹងកិច្ចសហប្រតិបត្តិការជាមួយធនាគារពិភពលោក ស្ថិតក្រោមកម្មវិធីគម្រោងវាយតម្លៃសន្តិសុខទឹកទន្លេសាប និងបានកំពុងតែរៀបចំកសាងឯកសារសំខាន់ៗ រួមមាន ទី១ របាយការណ៍ ស្តីពីស្ថានភាពអាងទន្លេសាប ទី២ ការវាយតម្លៃសន្តិសុខទឹកទន្លេសាប និង និងទី៣ សេចក្តីសង្ខេបគោលនយោបាយ ។
សមាសភាពសិក្ខាកាម អញ្ជើញ ចូលរួមមកពីតំណាងក្រសួង ស្ថាប័នបច្ចេកទេសជំនាញសំខាន់ៗ ជាសមាជិករបស់អាជ្ញាធរទន្លេសាប និងមន្រ្តីរបស់អគ្គលេខាធិការដ្ឋាន នៃអាជ្ញាធរទន្លេសាប និងស្ថាបន្តម្ចាស់ជំនួយ ៕

ដោយ៖ ណយ នឿន (ប្រភព៖អាជ្ញាធរទន្លេសាប)