AKP បន្ទាយមានជ័យ ថ្ងៃទី២៩  ខែមេសា ឆ្នាំ២០២៦--ក្នុងជំហានថ្មីមួយនៃការរឹតចំណងមិត្តភាព និងកិច្ចសហប្រតិបត្តិការសន្តិសុខទ្វេភាគី លោកឧត្តមសេនីយ៍ត្រី សឿម សារិទ្ធ ស្នងការនៃស្នងការដ្ឋាននគរបាល ខេត្តបន្ទាយមានជ័យ បានបើកទ្វារទទួលស្វាគមន៍យ៉ាងកក់ក្តៅចំពោះឯកឧត្តម គីម ឆាងយ៉ុង (KIM CHANGYONG) ឯកអគ្គរដ្ឋទូតសាធារណរដ្ឋកូរ៉េ ប្រចាំព្រះរាជាណាចក្រកម្ពុជា ដើម្បីពិភាក្សាលើការងារយុទ្ធសាស្ត្រសំខាន់ៗ កាលពីថ្ងៃអង្គារ ទី២៨ ខែមេសា ឆ្នាំ២០២៦ ម្សិលមិញនេះ។

ក្នុងជំនួបសម្តែងការគួរសមនេះ លោកឧត្តមសេនីយ៍ត្រី ស្នងការ រួមជាមួយកម្លាំងផែនការអន្តោប្រវេសន៍ បានលើកឡើងពីកិច្ចខិតខំប្រឹងប្រែងក្នុងការផ្តល់ព័ត៌មាន និងការសម្របសម្រួលផ្នែកច្បាប់ដល់ប្រជាជនកូរ៉េ ដែលកំពុងស្នាក់នៅ និងបំពេញការងារក្នុងភូមិសាស្ត្រខេត្តបន្ទាយមានជ័យ។ ការធានានូវសុវត្ថិភាព និងភាពងាយស្រួលក្នុងការធ្វើដំណើរចេញ-ចូល គឺជាអាទិភាពចម្បងដែលឆ្លុះបញ្ចាំងពីការយកចិត្តទុកដាក់របស់អាជ្ញាធរមូលដ្ឋាន ចំពោះវិនិយោគិន និងភ្ញៀវទេសចរបរទេស។

ចំណុចសំខាន់ដែលត្រូវបានលើកយកមកជជែកយ៉ាងយកចិត្តទុកដាក់បំផុតនោះគឺ "ការទប់ស្កាត់ការបោកប្រាស់តាមប្រព័ន្ធអនឡាញ (Online Scams)"។ ក្នុងបរិបទដែលបទល្មើសបច្ចេកវិទ្យាកំពុងរីករាលដាល ភាគីទាំងពីរបានឯកភាពគ្នាពង្រឹងកិច្ចសហប្រតិបត្តិការចែករំលែកព័ត៌មាន និងចាត់វិធានការបង្ក្រាបឱ្យបានម៉ឺងម៉ាត់បំផុត ដើម្បីការពារឧត្តមប្រយោជន៍ និងទ្រព្យសម្បត្តិរបស់ប្រជាជននៃប្រទេសទាំងពីរ ចៀសផុតពីការចាញ់បោកក្រុមឧក្រិដ្ឋជនឆ្លងដែន។

ក្រៅពីបញ្ហាសន្តិសុខបច្ចេកវិទ្យា អង្គប្រជុំក៏បានពិភាក្សាលើស្ថានភាពសន្តិសុខតាមបណ្តោយព្រំដែន ដើម្បីធានាបាននូវសណ្តាប់ធ្នាប់ និងការទប់ស្កាត់រាល់សកម្មភាពខុសច្បាប់នានា។ការពង្រឹងកិច្ចសហប្រតិបត្តិការបន្ថែម ការប្តេជ្ញាចិត្តរួមគ្នាក្នុងការកសាងទំនាក់ទំនងឱ្យកាន់តែស្អិតរមួត ដើម្បីផលប្រយោជន៍សេដ្ឋកិច្ច និងសង្គមរវាងខេត្តបន្ទាយមានជ័យ និងសាធារណរដ្ឋកូរ៉េ។

"ការជួបពិភាក្សានាពេលនេះ មិនត្រឹមតែជាការសម្តែងការគួរសមតាមបែបការទូតប៉ុណ្ណោះទេ ប៉ុន្តែគឺជាការកំណត់ទិសដៅរួមគ្នាក្នុងការធានាសុខសុវត្ថិភាពជូនប្រជាពលរដ្ឋ និងការកសាងទំនុកចិត្តដល់អ្នកវិនិយោគកូរ៉េនៅក្នុងទឹកដីខេត្តបន្ទាយមានជ័យ"។

កិច្ចពិភាក្សានេះបានបញ្ចប់ទៅក្នុងបរិយាកាសស្និទ្ធស្នាល និងទទួលបានលទ្ធផលជាផ្លែផ្កា ដែលជាសញ្ញាវិជ្ជមាននៃការបន្តពង្រឹងសន្តិសុខជាតិ និងកិច្ចសហប្រតិបត្តិការអន្តរជាតិនៅកម្រិតថ្នាក់ក្រោមជាតិឱ្យកាន់តែរឹងមាំ៕

ដោយ ឈុន សារ៉ាត