AKP សៀមរាប ថ្ងៃទី២៩ ខែមេសា ឆ្នាំ២០២៦--សាលាអនុគណក្រុងសៀមរាបនឹងរៀបចំពិធីបំបួសកុលបុត្រ កុលធីតាចំនួន ៣២៨រូប នៅបរិវេណវត្តព្រះឥន្ទទេព (ប្រាសាទបាយ័ន) ដើម្បីអនុមោទនាបុណ្យវិសាខបូជា ដែលជាឱកាសផ្តល់ឱ្យកុលបុត្រ កុលធីតាខ្មែរបានទទួលការអប់រំទូន្មានសីលធម៌តាមបែបពុទ្ធសាសនា ដើម្បីតបស្នងសងគុណចំពោះមាតា បិតា ជាតិ សាសនា ព្រះមហាក្សត្រ និងដើម្បីចូលរួមរំលឹកដល់បុណ្យវិសាខបូជា ដែលជាបុណ្យជាតិ និងអន្តរជាតិដ៏សំខាន់ ដែលពិធីនេះកម្មវិធីនេះមានរយៈពេល៥ថ្ងៃ ចាប់ពីថ្ងៃទី២៨ ខែមេសា ដល់ថ្ងៃទី០២ ខែឧសភា ឆ្នាំ២០២៦។

ព្រះវិជ័យរង្សី បណ្ឌិត ឡាច លាង ព្រះធម្មធរគណៈខេត្តសៀមរាប និងជាអនុគណក្រុងសៀមរាប មានថេរដីការថា ពិធីបំបួសកុលបុត្រកុលធីតា ចំនួន ៣២៨រូប នៅបរិវេណវត្តព្រះឥន្ទទេព (ប្រាសាទបាយ័ន)នេះ ធ្វើឡើងក្នុងគោលបំណងធំៗដូចជា ដើម្បីឈ្វេងយល់និងចូលរួមប្រារព្ធបុណ្យវិសាខបូជា ដែលពុទ្ធសាសនិកទូទាំងពិភពលោក តែងប្រារព្ធឡើងរៀងរាល់ឆ្នាំ។ ឱ្យកុលបុត្រ កុលធីតាខ្មែរ មានឱកាសចូលសាងផ្នួសដើម្បីតបស្នងសងគុណចំពោះអ្នកមានគុណរបស់ខ្លួន មានមាតាបិតា អាណាព្យាបាល ព្រះមហាក្សត្រ និងថ្នាក់នាំរបស់ប្រទេសជាតិ និងដើម្បីអប់រំបន្ទុំនិស្ស័យកុលបុត្រកុលធីតាខ្មែរ តាមមាគ៌ាព្រះពុទ្ធសាសនា ដោយការបួសរយៈពេលខ្លីនេះ។ ជាពិសេស ដើម្បីឱ្យពួកគេមានការភ្ញាក់រឭក លះបង់នូវអ្វីដែលកំពុងតែធ្វើខុស និង បានប្រតិបត្តិខ្លួនជាមនុស្សល្អ៥យ៉ាង គឹកូនល្អ សិស្សល្អ មិត្តល្អ ពលរដ្ឋល្អ និងជាពុទ្ធសាសនិកល្អ។

ព្រះវិជ័យរង្សី បណ្ឌិត ឡាច លាង មានថេរដីការបន្ដទៀតថា សម្រាប់ពិធីកោរសក់ បួងសក់ ដល់កុលបត្រកុលធីតានាពេលនេះ គឺជាប្រពៃណីទំនៀមទម្លាប់ខ្មែរយើងដ៏យូរលង់ណាស់មកហើយ ដែលយើងតែងប្រារព្ធមុនពេលបួស។ ព្រះវិជ័យរង្សីបានបញ្ជាក់ថា ពិធីបំបួសកុលបុត្រកុលធីតានេះធ្វើឡើងតាំងពីឆ្នាំ២០១១មកម្ល៉េះ ប៉ុន្ដែដោយវិបត្តិសាកល កូវីដ-១៩ យើងបានខកខាន ២ ឆ្នាំ ក្នុងឆ្នាំ២០២០ និង២០២១ ហើយបានបន្តមកវិញចាប់ពីឆ្នាំ២០២២មក។ 

ជាសរុប ចាប់ពីឆ្នាំ ដំបូងមកទល់ឆ្នាំនេះ ដែលជាឆ្នាំទី១៤សម្រាប់ពិធីបំបួស និងវិសាខបូជានេះ មានកុលបុត្រកុលធីតាខ្មែរ ដែលបានចូលរួមបួសសរុបប្រមាណជិត៨០០០ នាក់៕

ដោយ ឃុត សៅ