AKP ព្រះវិហារ ថ្ងៃទី១៩ ខែមេសា ឆ្នាំ២០២៦ --

លោក ប៉ែន ជឹង ប្រធានកិត្តិយសអនុសាខាកាកបាទក្រហមកម្ពុជា ស្រុកគូលែន រួមជាមួយក្រុមការងារ បានចុះសួរសុខទុក្ខ និងនាំយកអំណោយមនុស្សធម៌ចែកជូនដល់គ្រួសាររងគ្រោះដោយសារខ្យល់កន្ត្រាក់ចំនួន ២០គ្រួសារ កាលពីថ្ងៃទី១៥ ខែមេសា ឆ្នាំ២០២៦ ស្ថិតនៅភូមិសំបូរ(ចំណុចព្រៃគោល) ឃុំស្រយង់ ស្រុកគូលែនកាលពីថ្ងៃទី១៨ ខែមេសា ឆ្នាំ២០២៦។

លោក ប៉ែន ជឹង បាននាំនូវប្រសាសន៍សាកសួរទុក្ខរបស់ឯកឧត្តម គីម រិទ្ធី ប្រធានគណ:កម្មាធិការសាខា ជាពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ផ្តាំផ្ញើសួរសុខទុក្ខដល់បងប្អូនប្រជាពលរដ្ឋដោយក្តីអាណិតអាសូរ និងសោកស្តាយជាទីបំផុតចំពោះឧប្បទ្ទវហេតុគ្រោះធម្មជាតិដែលបានបំផ្លាញនៅទ្រព្យសម្បត្តិរបស់បងប្អូនដែលរងគ្រោះដោយសារខ្យល់កន្រ្តាក់កាលពីថ្ងៃទី១៥ ខែមេសា ឆ្នាំ២០២៦ កន្លងមក ព្រមទាំងបានអំពាវនាវដល់ប្រជាពលរដ្ឋទាំងអស់ សូមមានការប្រុងប្រយ័ត្នចំពោះអគ្គីភ័យ ផ្គរ រន្ទះ នៅពេលមានភ្លៀងត្រូវបិទទូរទស្សន៍ បិទទូរស័ព្ទ និងស្វែងរកកន្លែងដែលមានសុវត្ថិភាពខ្ពស់បំផុត។ បន្ទាប់មក ក្រុមការងារបានជួយលើកផ្ទះមួយខ្នងទំហំ  ៦ម៉ែត្រ គុណ ៧ម៉ែត្រ ព្រមទាំងបានឧបត្ថម្ភថវិកាមួយចំនួនសម្រាប់ទិញដែកសង្ក័សី និងដែកគោលផងដែរ ។

សូមបញ្ជាក់ថា សម្ភារៈផ្តល់ជូនក្នុងមួយគ្រួសារៗទទួលបានអង្ករ ២៥គីឡូក្រាម មី ១កេស ត្រីខ ១យួរ ទឹកស៊ីអ៊ីវ ១យួរ និងថវិកាមួយចំនួន គ្រួសារដួលរលំផ្ទះចំនួន ៦គ្រួសារទទួលបានបន្ថែមពីលើនូវតង់១ ឃីត ១កញ្ចប់ (សារុង១ ភួយ១ មុង១ ក្រមា១)៕

ដោយ៖ ទិត ស្រ៊