AKP បន្ទាយមានជ័យ ថ្ងៃទី១៩ ខែមេសា ឆ្នាំ២០២៦--

ក្នុងស្មារតីសង្គ្រោះបន្ទាន់ និងមិនទុកឱ្យប្រជាពលរដ្ឋរងគ្រោះនៅឯកោ ឯកឧត្តម ឌិត ទីណារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ កាលពីរសៀលថ្ងៃទី១៨ ខែមេសា ឆ្នាំ២០២៦នេះ បានអញ្ជើញចុះពិនិត្យស្ថានភាពផ្ទះសម្បែងផ្ទាល់ និងនាំយកអំណោយសង្គ្រោះបឋមជូនដល់បងប្អូនប្រជាពលរដ្ឋដែលរងគ្រោះដោយខ្យល់កន្ត្រាក់ ស្ថិតក្នុងភូមិគោកព្រេច ឃុំគោករមៀត ស្រុកថ្មពួក។

យោងតាមរបាយការណ៍បឋម បាតុភូតខ្យល់កន្ត្រាក់នាពេលថ្មីៗនេះ បានបង្កឱ្យមានការខូចខាតផ្ទះសម្បែងរបស់ប្រជាពលរដ្ឋជិត ៧០០ខ្នង នៅទូទាំងខេត្តបន្ទាយមានជ័យក្នុងនោះនៅ៩ភូមិក្នុងឃុំគោករមៀតស្រុកថ្មពួកដែលរងការខូតខាតច្រើនជាងគេរហូតដល់ជាង៤០០ខ្នងផ្ទះដោយការរបើកដំបូល ជញ្ជាំង។ ដើម្បីដោះស្រាយបញ្ហាចំពោះមុខ ក្រុមការងាររាជរដ្ឋាភិបាលចុះមូលដ្ឋាន សហការជាមួយរដ្ឋបាលខេត្ត បានសម្រេចផ្ដល់អន្តរាគមន៍ជាសម្ភារសំណង់ (ស័ង្កសី) និងថវិកាមួយចំនួន ដើម្បីផ្តល់លទ្ធភាពឱ្យពលរដ្ឋអាចជួសជុលដំបូលផ្ទះឡើងវិញភ្លាមៗ សំដៅធានាឱ្យមានជម្រកប្រកបដោយសុវត្ថិភាព ជៀសវាងការលំបាកយូរអង្វែង។

ក្នុងឱកាសសំណេះសំណាលនោះ ឯកឧត្តមរដ្ឋមន្ត្រីបានពាំនាំនូវការសាកសួរសុខទុក្ខយ៉ាងជ្រាលជ្រៅបំផុតពីសំណាក់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ ឯកឧត្តមបានបញ្ជាក់ថា សម្តេចនាយករដ្ឋមន្ត្រី ជានិច្ចកាលតែងតែយកចិត្តទុកដាក់ និងតាមដានរាល់សុខទុក្ខរបស់បងប្អូនប្រជាពលរដ្ឋដែលជួបការលំបាក និងគ្រោះមហន្តរាយផ្សេងៗ ដោយមិនបង្អង់យូរឡើយ។

ទន្ទឹមនឹងការផ្តល់ជំនួយសង្គ្រោះ ឯកឧត្តម ឌិត ទីណា ក៏បានសង្កត់ធ្ងន់ និងអំពាវនាវដល់បងប្អូនប្រជាពលរដ្ឋទាំងអស់ ត្រូវបង្កើនការប្រុងប្រយ័ត្នឱ្យបានខ្ពស់បំផុត ចំពោះបាតុភូតធម្មជាតិដែលពិបាកប៉ាន់ស្មាននាដើមរដូវវស្សានេះ ត្រូវតាមដានព័ត៌មានព្យាករណ៍អាកាសធាតុជាប្រចាំ។ស្ដាប់ការណែនាំពីក្រសួង និងអាជ្ញាធរជំនាញ នៅពេលមានភ្លៀងធ្លាក់លាយឡំផ្គររន្ទះ និងខ្យល់កន្ត្រាក់។ ត្រូវកាត់ផ្ដាច់ចរន្តអគ្គិសនីក្នុងផ្ទះក្នុងករណីចាំបាច់ ដើម្បីបង្ការគ្រោះថ្នាក់អាយុជីវិតជាយថាហេតុ។

សកម្មភាពចុះជួយសង្គ្រោះយ៉ាងទាន់ហន់នាពេលនេះ មិនត្រឹមតែបង្ហាញពីសមត្ថភាព និងការទទួលខុសត្រូវខ្ពស់របស់អាជ្ញាធរខេត្តបន្ទាយមានជ័យប៉ុណ្ណោះទេ ប៉ុន្តែវាគឺជាការឆ្លុះបញ្ចាំងយ៉ាងច្បាស់ពី «សណ្តានចិត្តដ៏សប្បុរស» និងគោលការណ៍ «មិនបោះបង់ពលរដ្ឋណាម្នាក់ចោល» របស់រាជរដ្ឋាភិបាលកម្ពុជា ក៏ដូចជាកាកបាទក្រហមកម្ពុជា ក្នុងគ្រប់កាលៈទេសៈទាំងអស់ ទោះស្ថិតក្នុងស្ថានភាពលំបាកយ៉ាងណាក៏ដោយ៕

ដោយ ឈុន សារ៉ាត