AKP ភ្នំពេញ ថ្ងៃទី១៧ ខែមេសា ឆ្នាំ២០២៦–ពិធីបុណ្យចូលឆ្នាំថ្មីប្រពៃណីជាតិខ្មែររយៈពេល៣ថ្ងៃ ត្រូវបានប្រារព្ធធ្វើឡើងយ៉ាងសប្បាយរីករាយនៅគ្រប់ទិសទីតាមគន្លងប្រពៃណីព្រះពុទ្ធសាសនា និងទំនៀមទម្លាប់ពីដូនតា ដូចការគ្រោងទុក។ នេះជាការគូសបញ្ជាក់របស់ អ្នកនាំពាក្យរាជរដ្ឋាភិបាលកម្ពុជា។

ក្នុងការធ្វើ សេចក្ដីថ្លែងការណ៍៖ បច្ចុប្បន្នភាពស្តីពី «ការវិវឌ្ឍន៍ស្ថានភាពព្រំដែនកម្ពុជា-ថៃ និងព្រឹត្តិការណ៍ថ្មីៗដែលកើតឡើង» នៅថ្ងៃសុក្រ ១កើត ខែពិសាខ ឆ្នាំមមី អដ្ឋស័ក ព.ស.២៥៦៩ ត្រូវនឹងថ្ងៃទី១៧ ខែមេសា ឆ្នាំ២០២៦ នៅទីស្តីការគណៈរដ្ឋមន្ត្រី ឯកឧត្តម  ប៉ែន បូណា អ្នកនាំពាក្យរាជរដ្ឋាភិបាលកម្ពុជាបានថ្លែងថា មរតកវប្បធម៌ដ៏មានតម្លៃដែលបុព្វបុរសខ្មែរបន្សល់ទុកត្រូវបានសង្គ្រោះនិងថែរក្សាបានគង់វង្សរហូតមកដល់បច្ចុប្បន្ននិងតទៅអនាគត ដោយរាជរដ្ឋាភិបាលគណបក្សប្រជាជនកម្ពុជា បន្ទាប់ពីរបបប៉ុលពតបានលុបបំបាត់ចោលអស់រយៈពេលជិត៤ឆ្នាំ។ ឆ្នាំនេះ រាជរដ្ឋាភិបាលនិងប្រជាពលរដ្ឋខ្មែរទាំងក្នុងនិងក្រៅប្រទេសបានរួមគ្នាប្រារព្ធពិធីបុណ្យចូលឆ្នាំថ្មីក្នុងបរិយាកាសសាមគ្គីភាពយ៉ាងរឹងមាំក្នុងនាមមហាគ្រួសារខ្មែរ ដោយមិនភ្លេចកាតព្វកិច្ចការពារបូរណភាពទឹកដីនិងប្រជាជន ដែលជាអាទិភាពខ្ពស់បំផុតរបស់រាជរដ្ឋាភិបាល។ 

ក្នុងសារលិខិតផ្ញើជូនប្រជាពលរដ្ឋក្នុងឱកាសបុណ្យចូលឆ្នាំថ្មី សម្តេចមហាបវរធីបតី ហ៊ុន ម៉ាណែត នាយករដ្ឋមន្ត្រីបានគូសបញ្ជាក់ថា ក្នុងឆ្នាំកន្លងទៅ យើងបានឆ្លងកាត់នូវវិញ្ញាសាដ៏លំបាក និងថ្មីៗជាច្រើនមិនធ្លាប់មាន ដែលបាននិងកំពុងបង្កើតជាផលប៉ះពាល់ដោយផ្ទាល់និងដោយប្រយោលមកលើសន្តិសុខ និងសង្គម-សេដ្ឋកិច្ចជាតិយើង»។ ទោះជាយ៉ាងនេះក្តី សម្តេចសង្កត់ធ្ងន់ថា «យើងត្រូវតែប្រែក្លាយការលំបាកទាំងនេះឱ្យទៅជាបទពិសោធន៍ ប្រែក្លាយការឈឺចាប់ឱ្យទៅជាថាមពលដ៏រឹងមាំ និងប្រែក្លាយឧបសគ្គឱ្យទៅជាឱកាសដើម្បីជោគជ័យ។ សម្តេចប្រមុខរាជរដ្ឋាភិបាលក៏បានបញ្ជាក់អំពីការប្តេជ្ញាចិត្តខ្ពស់ក្នុងការបន្តខិតខំប្រឹងប្រែងកសាង ការពារ និងអភិវឌ្ឍសង្គមជាតិដោយឈរលើមាគ៌ាដ៏ត្រឹមត្រូវឆ្ពោះទៅរកភាពសុខដុមរមនា សេចក្តីថ្លៃថ្នូរ និងសុខុមាលភាពសង្គម បើទោះជាត្រូវជួបប្រទះឧបសគ្គ និងបញ្ហាប្រឈមយ៉ាងណាក៏ដោយ។

សម្តេចធិបតីបន្តថា ជម្រើសដែលប្រសើរបំផុតសម្រាប់កម្ពុជា គឺត្រូវបន្តពង្រឹងខ្លួនឱ្យកាន់តែរឹងមាំ និងបង្កើនភាពម្ចាស់ការលើមូលដ្ឋានសំខាន់ និងចាំបាច់ដើម្បីបង្កើនសមត្ថភាពឆ្លើយតបទៅនឹងបញ្ហា និងវិបត្តិនានាប្រកបដោយភាពធន់ និងបានបញ្ជាក់ជាថ្មីនូវការប្តេជ្ញាចិត្តរបស់រាជរដ្ឋាភិបាលក្នុងការការពាររដ្ឋធម្មនុញ្ញ និងរបបរាជានិយម ស្របតាមបាវចនា «ជាតិ សាសនា ព្រះមហាក្សត្រ” និងការពារនូវរាល់សមិទ្ធផលដែលរាជរដ្ឋាភិបាលនិងប្រជាជនកម្ពុជាសម្រេចបាននាពេលកន្លងមកឱ្យបានគង់វង្សដោយមិនអនុញ្ញាតឱ្យបុគ្គលណា ក្រុមណា ឬបរទេសណាមកបំផ្លាញបានឡើយ។

សម្តេចធិបតី ក៏បានសម្តែងការដឹងគុណដ៏ជ្រាលជ្រៅបំផុតចំពោះការលះបង់មិនអាចកាត់ថ្លៃបានរបស់វីរយុទ្ធជន និងកងកម្លាំងដ៏អង់អាចក្លាហានគ្រប់រូបក្នុងការបំពេញភារកិច្ចដ៏ឧត្តុង្គឧត្តមនៃការកាពារអធិបតេយ្យជាតិ និងបូរណភាពទឹកដីកម្ពុជា និងកោតសរសើរប្រកបដោយអំណរគុណយ៉ាងជ្រាលជ្រៅបំផុតចំពោះស្មារតីស្នេហាជាតិមាតុភូមិ និងសាមគ្គីភាពជាតិជាធ្លុងមួយរបស់បងប្អូនជនរួមជាតិគ្រប់រូបនិងគ្រប់ទិសទី ទាំងក្នុងនិងក្រៅប្រទេស ក្នុងការការពារអធិបតេយ្យជាតិ បូរណភាពទឹកដី និងសន្តិភាពដែលមានតម្លៃមិនអាចកាត់ថ្លៃបាន ហើយត្រូវចារទុកក្នុងប្រវត្តិសាស្ត្រសម្រាប់ប្រជាជាតិខ្មែរ។ ក្នុងន័យនេះ សម្តេចធិបតីបានអំពាវនាវដល់ខ្មែរគ្រប់រូបសូមបន្តរួមគ្នាជាស្មារតីជាតិតែមួយ រួបរួមសាមគ្គីគ្នា ជម្នះរាល់បញ្ហា និងស្នើគ្រប់ក្រសួងស្ថាប័ននិងគ្រប់វិស័យទាំងអស់ បន្តខិតខំដើរទៅមុខ ពោលគឺ កាន់តែលំបាក កាន់តែខិតខំ ដើម្បីធ្វើឱ្យនាវាកម្ពុជាបន្តដំណើរឆ្ពោះទៅមុខជានិច្ច ជាមួយការប្តេជ្ញាចិត្តរបស់រាជរដ្ឋាភិបាលថា បូរណភាពទឹកដីនិងប្រជាជនកម្ពុជា គឺជាអាទិភាពចម្បងបំផុតក្នុងការយកចិត្តទុកដាក់ខ្ពស់ ទាំងបច្ចុប្បន្ននិងអនាគត និងសូមបញ្ជាក់សាជាថ្មីម្តងទៀតថា កម្ពុជានៅតែរក្សាសិទ្ធិយ៉ាងពេញលេញក្នុងការការពារខ្លួនតាមគ្រប់មធ្យោបាយ ស្របតាមច្បាប់អន្តរជាតិ ដើម្បីការពារបូរណភាពទឹកដី និងអធិបតេយ្យជាតិ។

ចំណែកសម្តេចតេជោ ហ៊ុន សែន ប្រមុខរដ្ឋស្តីទី ក៏បានគូសបញ្ជាក់តាមរយៈសារឆ្លើយតបទៅកាន់ក្រុមប្រឆាំងជ្រុលនិយមនៅក្រៅប្រទេសថា របួសកូនដៃមួយមិនគួរធ្វើឲ្យខ្លួនប្រាណពិការទាំងមូលនោះឡើយ។ សម្តេចតេជោបន្តថា យើងទទួលស្គាល់ថា យើងនៅមានការលំបាកតាមព្រំដែនជាមួយថៃលើផ្នែកមួយនៃដែនដី និងពេលវេលាដែលជាការលំបាករបស់កងកម្លាំងប្រដាប់អាវុធនៅតាមព្រំដែន និងប្រជាជនភៀសសឹកមួយចំនួន ប៉ុន្តែ យើងបានជួយឲ្យពួកគាត់មានឱកាសបានចូលឆ្នាំថ្មីផងដែរ។ សម្តេចប្រមុខរដ្ឋស្តីទីបានចោទសំណួរទៅកាន់ក្រុមប្រឆាំងជ្រុលនិយមថា តើទុកឲ្យពួកប្រជាពលរដ្ឋជាង១៧លាននាក់នាំគ្នាស្រែកយំ ដោយត្រូវបញ្ឈប់សកម្មភាពជីវភាពសេដ្ឋកិច្ចសង្គមឬយ៉ាងណា? តើត្រូវបិទផ្សារ បិទការលក់ដូរ បិទធនាគារ បិទរោងចក្រ បិទកសិដ្ឋាន បិទសាលារៀន។ល។ រហូតដល់បិទមិនឲ្យប្រជាជនសប្បាយរីករាយក្នុងពេលចូលឆ្នាំឬយ៉ាងណា? ដោយចាត់ទុកចេតនារបស់ក្រុមប្រឆាំងថា មានគោលបំណងធ្វើឱ្យសង្គមសេដ្ឋកិច្ចជាប់គាំងឈប់ដំណើរការ សម្តេចតេជោ ហ៊ុន សែន បានហៅសកម្មភាពសប្បាយរីករាយរបស់ប្រជាជននៅគ្រប់ទិសទី និងការទទួលទេវតាក្នុងពិធីបុណ្យចូលឆ្នាំថ្មីនេះថា មានន័យស្មើនឹងការទះកំភ្លៀងក្រុមដែលប្រឆាំងនឹងពិធីបុណ្យចូលឆ្នាំថ្មី។
ក្នុងអំឡុងពេលនៃពិធីបុណ្យចូលឆ្នាំថ្មីនេះដែរ កម្ពុជា តាមរយៈក្រសួងវប្បធម៌និងវិចិត្រសិល្បៈ បានប្រកាសតវ៉ាយ៉ាងដាច់អហង្ការចំពោះការកាន់កាប់ដោយខុសច្បាប់ និងដោយប្រើកងកម្លាំងប្រដាប់អាវុធរបស់ថៃមកលើតំបន់បេតិកភណ្ឌវប្បធម៌របស់កម្ពុជា រួមមាន ប្រាសាទតាមាន់ធំ ប្រាសាទតាក្របី ប្រាសាទខ្នារ និងតំបន់ពាក់ព័ន្ធផ្សេងៗទៀត ដែលស្ថិតក្នុងដែនអធិបតេយ្យភាពរបស់កម្ពុជា។ ក្រសួងបានសម្តែងក្តីព្រួយបារម្ភយ៉ាងខ្លាំង ចំពោះវត្តមានរបស់អាជ្ញាធរថៃ និងសកម្មភាពសាងសង់ហេដ្ឋារចនាសម្ព័ន្ធ រួមមានផ្លូវ និងការដំឡើងរូបសំណាកជាបន្តបន្ទាប់ដែលបង្កើតជាស្ថានភាពជាក់ស្តែងលើដី (faits accomplis) និងជាការរំលោភបំពានលើអធិបតេយ្យភាព និងបូរណភាពទឹកដីរបស់កម្ពុជា។ ចំណែកការរៀបចំដំណើរទស្សនកិច្ចជាសាធារណៈនិងសកម្មភាពផ្សេងៗនៅតំបន់ទាំងនោះ ក៏បានបង្ហាញពីការប្រើប្រាស់អំណាច និងការគ្រប់គ្រងដោយខុសច្បាប់លើដែនដីកម្ពុជាផងដែរ។

ដោយបញ្ជាក់ជំហរថា កម្ពុជានៅតែបន្តប្តេជ្ញាចិត្តក្នុងការដោះស្រាយវិវាទដោយសន្តិវិធី និងការអនុវត្តយន្តការទ្វេភាគី កិច្ចព្រមព្រៀងនិងច្បាប់អន្តរជាតិដែលមានស្រាប់ រួមទាំងគណៈកម្មការព្រំដែនចម្រុះ (JBC) ផង ក្រសួងវប្បធម៌ និងវិចិត្រសិល្បៈ បានអំពាវនាវឱ្យប្រទេសថៃចាត់វិធានការកែតម្រូវជាបន្ទាន់ក្នុងគោលបំណងរក្សាសន្តិភាព ការគោរពច្បាប់ និងការការពារបេតិកភណ្ឌវប្បធម៌របស់មនុស្សជាតិ។

សរុបមកវិញ ការរៀបចំពិធីបុណ្យចូលឆ្នាំថ្មីប្រពៃណីជាតិ សបញ្ជាក់ថា រាជរដ្ឋាភិបាលនិងថ្នាក់ដឹកនាំកម្ពុជា បានយកចិត្តទុកដាក់លើគ្រប់វិស័យ និងលើពលរដ្ឋគ្រប់មជ្ឈដ្ឋានទាំងអស់ ពោលគឺដៃម្ខាងការពារបូរណភាពទឹកដី ដៃម្ខាងទៀតដោះស្រាយបញ្ហាប្រឈមនានារបស់ប្រជាពលរដ្ឋភៀសសឹកផង យកចិត្តទុកដាក់ចំពោះសុខទុក្ខវីរយុទ្ធជននៅជួរមុខផង និងរក្សាប្រក្រតីភាពនិងនិរន្តរភាពសង្គម-សេដ្ឋកិច្ច វប្បធម៌ និងទេសចរណ៍ សម្រាប់ប្រជាពលរដ្ឋខ្មែរជាង១៧លាននាក់ផង ដោយមិនអាចបោះបង់ចោលផ្នែកណាមួយបានឡើយ។ នេះគឺជាតួនាទីប្រកបដោយការទទួលខុសត្រូវរបស់រាជរដ្ឋាភិបាល៕  

ដោយ៖ គង់ សិរីរ័ត្ន