AKP កំពង់ធំ ថ្ងៃទី១៧ ខែមេសា ឆ្នាំ២០២៦--នៅទីបញ្ជាការដ្ឋានតំបន់ប្រតិបត្តិការសឹងរងកំពង់ធំ កាលពីថ្ងៃទី១៦ ខែមេសា ឆ្នាំ២០២៦ ដែលជាថ្ងៃវារ:ឡើងស័ក្តនៃពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី អដ្ឋស័កពុទ្ធសករាជ ២៥៧០ នាយទាហាន នាយទាហានរង និងពលទាហាននៃបញ្ជាការដ្ឋានតំបន់ប្រតិបត្តិការសឹករងកំពង់ធំយោធភូមិភាគទី៤បានស្មឹងស្មាត គោរពវិញ្ញាណក្ខន្ធ វីរៈយុទ្ធជនដែលបានពលីជីវិតដ៏អង់អាចក្លាហានក្នុងភារកិច្ចការពារបូរណភាពទឹកដីពីការរំលោភឈ្លានពានដ៍ឃោរឃៅព្រៃផ្សៃពីសំណាក់ទាហានថៃមកលើដែនអធិបតេយ្យភាពនៃព្រះរាជាណាចក្រកម្ពុជាក្រោមអធិបតីភាពឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ។ 

ឧត្តមសេនីយ៍ទោ សោម ស៊ុន បានថ្លែងថា ជានិច្ចកាលនាយទាហាននាយទាហានរង និងពលទាហាននៃបញ្ជាការដ្ឋានតំបន់ប្រតិបត្តិការសឹករងកំពង់ធំព្រមទាំងក្រុមគ្រួសារបានគោរពដឹងគុណជានិច្ចចំពោះវីរភាពដ៏អង់អាវក្លាហាន របស់វីរយុទ្ធជនដែលបានពលីជីវិតនៅក្នុងសមរភូមិដើម្បីការពារជាតិមាតុភូមិកម្ពុជា។យើងខ្ញុំទាំងអស់គ្នាសូមចងចាំជានិច្ចមិនអាចបំភ្លេចបានឡើយនូវគុណូបការៈរបស់វីរយុទ្ធជននៃយើងនិងបានសូមបួងសួងដល់វិញ្ញាណក្ខន្ធរបស់ពួកគាត់បានទៅកាន់សុគតិភពកុំបីឃ្លៀងឃ្លាតឡើយ។ 

ឧត្តមសេនីយ៍ទោ សោម ស៊ុនបានបញ្ជាក់ថា នៅមុនថ្ងៃពិធីបុណ្យចូលឆ្នាំថ្មីប្រពៃណីជាតិខ្មែរកន្លងទៅនេះថ្នាក់ដឹកនាំ នាយទាហាន នាយទាហានរងនិងពលទាហាននៃបញ្ជាការដ្ឋានតំបន់ប្រតិបត្តិការសឹករងកំពង់ធំព្រមទាំងក្រុមគ្រួសារបានរៀបចំពិធីសូត្រមន្ត រាប់បាត្រ បង្សុកូលឧទ្ទិសកុសលផលបុណ្យជូនដល់វិញ្ញាណក្ខន្ធវីរយុទ្ធជនរបស់យើងរួចមកហើយ។ថ្ងៃនេះជាថ្មីម្ដងទៀតដែលជាថ្ងៃឧបោសថសីលនិងជាថ្ងៃវារៈឡើងស័ក្ត ហើយជាថ្ងៃចុងក្រោយនៃពិធីបុណ្យចូលឆ្នាំថ្មីប្រពៃណីជាតិខ្មែរ យើងខ្ញុំទាំងអស់គ្នាសូមចងចាំនឹងដឹងគុណមិនអាចបំភ្លេចបានឡើយនូវវីរៈភាពដ៏ថ្លៃថ្លានេះ ហើយនឹងសូមអំពាវនាវដល់ប្រជាពលរដ្ឋគ្រប់រូបត្រូវបន្តរួមគ្នាជាធ្លុងមួយ ជាមួយរាជរដ្ឋាភិបាលកម្ពុជាដើម្បីសន្តិភាព និងការពារបូរណភាពទឹកដីរបស់យើង ដោយសន្តិវិធីស្របតាមច្បាប់អន្តរជាតិមិនឱ្យមានការបាត់បង់ដោយការឈ្លានពានដោយកម្លាំងខុសច្បាប់បានឡើយ៕

ដោយ ស៊ុម វណ្ណា