AKP បន្ទាយមានជ័យ ថ្ងៃទី០៨ ខែមេសា ឆ្នាំ២០២៦--ក្នុងស្មារតីសាមគ្គីភាព និងការដឹងគុណយ៉ាងជ្រាលជ្រៅចំពោះវីរៈភាពកងទ័ព កាលពីថ្ងៃទី០៧ ខែមេសា ឆ្នាំ២០២៦ ឯកឧត្ដម អ៊ុំ រាត្រី អភិបាលនៃគណៈអភិបាល ខេត្តបន្ទាយមានជ័យ និងលោកជំទាវ រួមជាមួយឯកឧត្តម ប្លែក វ៉ារី ប្រធានក្រុមប្រឹក្សាខេត្ត និងមន្ត្រីពាក់ព័ន្ធ បានអញ្ជើញចុះសួរសុខទុក្ខដោយផ្ទាល់ និងនាំយកអំណោយជាស្បៀងអាហារ ភេសជ្ជៈនិងថវិកា ជូនដល់កងកម្លាំងវីរៈកងទ័ពដែលកំពុងឈរជើងការពារទឹកដីតាមបន្ទាត់ព្រំដែន ក្នុងភូមិសាស្ត្រខេត្តបន្ទាយមានជ័យ។

សកម្មភាពមនុស្សធម៌ និងការផ្តល់កម្លាំងចិត្តនេះ ត្រូវបានរៀបចំឡើងស្របពេលដែលពិធីបុណ្យចូលឆ្នាំថ្មីប្រពៃណីជាតិខ្មែរ ជិតឈានចូលមកដល់ ក្នុងគោលបំណងលើកទឹកចិត្តដល់យុទ្ធជនដែលកំពុងបំពេញភារៈកិច្ចការពារបូរណភាពទឹកដីយ៉ាងអង់អាចក្លាហាន ដោយមិនបានសម្រាកជួបជុំគ្រួសារដូចពលរដ្ឋដទៃ។

ក្នុងឱកាសនោះ ឯកឧត្ដម អ៊ុំ រាត្រី បានពាំនាំនូវប្រសាសន៍សួរសុខទុក្ខ និងសេចក្តីនឹករលឹកយ៉ាងជ្រាលជ្រៅបំផុតពីសំណាក់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចតេជោ ហ៊ុន សែន ប្រធានព្រឹទ្ធសភា ជូនដល់បងប្អូនកងកម្លាំងទាំងអស់។ ឯកឧត្ដមបានបញ្ជាក់ថា រាជរដ្ឋាភិបាលកម្ពុជាជានិច្ចកាល តែងតែយកចិត្តទុកដាក់ខ្ពស់ចំពោះសុខទុក្ខ និងជីវភាពរស់នៅរបស់កងកម្លាំងប្រដាប់អាវុធគ្រប់ប្រភេទ ជាពិសេសកងកម្លាំងជួរមុខដែលជា "របងការពារជាតិ" ដ៏រឹងមាំ។

ឯកឧត្ដមអភិបាលខេត្ត បានមានប្រសាសន៍សង្កត់ធ្ងន់ថា«ការចុះមកសួរសុខទុក្ខ និងនាំយកអំណោយនាពេលនេះ គឺមិនត្រឹមតែជាការចែករំលែកសម្ភារៈប្រើប្រាស់ប៉ុណ្ណោះទេ ប៉ុន្តែគឺជាការបង្ហាញនូវមនោសញ្ចេតនា និងការដឹងគុណចំពោះការលះបង់ដ៏ខ្ពង់ខ្ពស់របស់បងប្អូនកងទ័ព ដែលបានពលីកម្លាំងកាយចិត្ត ឈរជើងការពារព្រំដែន បង្កលក្ខណៈសម្បត្តិឱ្យប្រជាពលរដ្ឋនៅផ្ទៃក្នុងប្រទេសរស់នៅក្នុងសេចក្តីសុខសាន្ត និងសប្បាយរីករាយក្នុងឱកាសបុណ្យទាននានា»។   

បន្ថែមពីនេះ ឯកឧត្ដមបានកោតសរសើរចំពោះស្មារតីទទួលខុសត្រូវខ្ពស់របស់កងកម្លាំងទាំងអស់ ដែលបានសហការគ្នាយ៉ាងល្អក្នុងការថែរក្សាសន្តិសុខ សណ្តាប់ធ្នាប់ តាមបន្ទាត់ព្រំដែន និងបង្ក្រាបបទល្មើសផ្សេងៗ។ ឯកឧត្ដមក៏បានផ្តាំផ្ញើឱ្យបងប្អូនកងទ័ពទាំងអស់ បន្តយកចិត្តទុកដាក់ថែរក្សាសុខភាព និងបង្កើនការប្រុងប្រយ័ត្នខ្ពស់ក្នុងភារកិច្ច ដើម្បីធានាបាននូវភាពសុខសាន្តជូនជាតិមាតុភូមិ។

អំណោយដែលបាននាំយកមកចែកជូននាពេលនេះ រួមមាន៖ អង្ករ ទឹកបរិសុទ្ធ ភេសជ្ជៈ និងគ្រឿងឧបភោគបរិភោគចាំបាច់មួយចំនួនទៀតរួម និងថវិកា ដែលជាការចូលរួមចំណែកសម្រាលបន្ទុកជីវភាព និងបង្កើនបរិយាកាសសប្បាយរីករាយដល់អង្គភាពកងទ័ពក្នុងឱកាសឆ្នាំថ្មី។

ជាកិច្ចឆ្លើយតប តំណាងកងកម្លាំងវីរៈកងទ័ពដែលឈរជើងតាមបន្ទាត់ព្រំដែន បានសម្តែងនូវក្តីរំភើប និងថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំខេត្ត និងរាជរដ្ឋាភិបាលមិនដែលបោះបង់ចោលកងទ័ព និងតែងតែផ្តល់ភាពកក់ក្តៅដល់ពួកគេគ្រប់ពេលវេលា ជាពិសេសក្នុងឱកាសបុណ្យទានសំខាន់ៗបែបនេះ៕

ដោយ ឈុន សារ៉ាត