AKP បន្ទាយមានជ័យ ថ្ងៃទី២៨ ខែមីនាឆ្នាំ២០២៦–លោក ហុង ពិសិដ្ឋ អនុប្រធានសហភាពសហព័ន្ធយុវជនកម្ពុជា (ស.ស.យ.ក.) ខេត្តបន្ទាយមានជ័យបានលើកឡើងថា ប្រមុខរាជរដ្ឋាភិបាលកម្ពុជា តែងតែផ្តល់អាទិភាពខ្ពស់បំផុត និងយកចិត្តទុកដាក់យ៉ាងខ្លាំងចំពោះអនាគតរបស់យុវជន ជាពិសេសតាមរយៈការជំរុញ និងការដាក់ចេញនូវគោលនយោបាយបណ្តុះបណ្តាលជំនាញវិជ្ជាជីវៈ។

ការថ្លែងយ៉ាងដូច្នេះរបស់ លោក ហុងពិសិដ្ឋ បានធ្វើឡើងកាលពីព្រឹកថ្ងៃទី២៨ ខែមីនា ឆ្នាំ២០២៦នេះ នៅសាលប្រជុំនៃសាកលវិទ្យាល័យអន្តរជាតិ ខេត្តបន្ទាយមានជ័យ ដែលបានរៀបចំវេទិកាដ៏មានសារៈសំខាន់មួយ ស្តីពី «ការតម្រង់ទិសការត្រៀមខ្លួនឆ្ពោះទៅថ្នាក់ឧត្តមសិក្សា និងការជ្រើសរើសជំនាញសិក្សានៅក្នុងសាកលវិទ្យាល័យស្របតាមទីផ្សារការងារ»ដោយមានការចូលរួមយ៉ាងកុះករពីសិស្សានុសិស្សមកពីវិទ្យាល័យចំនួន ៤ រួមមាន វិទ្យាល័យសម្តេចឪ, វិទ្យាល័យខ្លាកូន, វិទ្យាល័យអូរអំបិល និងវិទ្យាល័យសិរីសោភ័ណ។
នៅក្នុងឱកាសនោះ លោក ហុង ពិសិដ្ឋ បានពាំនាំនូវការសួរសុខទុក្ខពីសំណាក់ថ្នាក់ដឹកនាំ និងបានសង្កត់ធ្ងន់ថា យុវជនគឺជាសសរទ្រូងដ៏រឹងមាំរបស់ជាតិ។

"ការជ្រើសរើសជំនាញដែលត្រឹមត្រូវ និងស្របតាមតម្រូវការទីផ្សារការងារនាពេលបច្ចុប្បន្ន គឺជាគន្លឹះជោគជ័យដ៏សំខាន់សម្រាប់យុវជនម្នាក់ៗ ក្នុងការកសាងអនាគតឱ្យបានរឹងមាំ និងចូលរួមចំណែកអភិវឌ្ឍន៍សេដ្ឋកិច្ចជាតិ"នេះជាប្រសាសន៍បន្ថែមរបស់លោក ហុង ពិសិដ្ឋ។

វេទិកានេះត្រូវបានរៀបចំឡើងក្នុងគោលបំណងផ្តល់ជាពន្លឺ និងចំណេះដឹងដល់សិស្សានុសិស្សដែលត្រៀមប្រឡងបញ្ចប់មធ្យមសិក្សាទុតិយភូមិ ឱ្យបានយល់ដឹងកាន់តែច្បាស់អំពីការស្វែងយល់ពីខ្លួនឯងការកំណត់ចំណង់ចំណូលចិត្ត និងសមត្ថភាពពិតប្រាកដមុននឹងសម្រេចចិត្តរៀនជំនាញណាមួយ។

និន្នាការទីផ្សារការងារការបណ្តុះបណ្តាលដែលផ្តោតលើជំនាញបច្ចេកទេស និងវិជ្ជាជីវៈដែលកំពុងមានតម្រូវការខ្ពស់ក្នុងយុគសម័យឌីជីថល និងឧស្សាហកម្ម។
ការត្រៀមខ្លួនសម្រាប់សាកលវិទ្យាល័យរបៀបរៀបចំខ្លួនទាំងចំណេះដឹង និងស្មារតី ដើម្បីឈានជើងចូលក្នុងពិភពអប់រំកម្រិតឧត្តមសិក្សាដោយទំនុកចិត្ត។

សូមបញ្ជាក់ផងដែរថា វេទិកានេះគឺជាលទ្ធផលនៃកិច្ចសហការយ៉ាងជិតស្និទ្ធរវាង សហភាពសហព័ន្ធយុវជនកម្ពុជា ខេត្តបន្ទាយមានជ័យនិង សាកលវិទ្យាល័យអន្តរជាតិ ដើម្បីពង្រីកវិសាលភាពនៃការអប់រំ និងការណែនាំផ្លូវដល់យុវជនក្នុងខេត្ត។ លោកអនុប្រធានក៏បានរំលឹកដល់សិស្សានុសិស្សទាំងអស់ឱ្យខិតខំរៀនសូត្រ និងក្តាប់យកឱកាសមាសដែលរាជរដ្ឋាភិបាលបានផ្តល់ឱ្យតាមរយៈកម្មវិធីបណ្តុះបណ្តាលនានា ដើម្បីប្រែក្លាយខ្លួនជាធនធានមនុស្សដែលមានគុណភាព និងសក្តានុពល៕

ដោយ៖ ឈុន សារ៉ាត