AKP កំពង់ស្ពឺ ថ្ងៃទី១៨ ខែមីនា ឆ្នាំ២០២៦--ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ បានធ្វើការអំពាវនាវដល់សហគមន៍ និងប្រជាពលរដ្ឋទាំងអស់ឱ្យចូលរួមទុកដាក់សំរាមឱ្យបានត្រឹមត្រូវនិងកាត់បន្ថយការប្រើប្រាស់ថង់ប្លាស្ទិក ដើម្បីជួយឱ្យមានសោភ័ណភាពល្អប្រសើរ បរិស្ថានស្អាត មានកំណើនភ្ញៀវទេចរណ៍ជាតិ អន្តរជាតិមកលេងកម្សាន្តច្រើន។ការអំពាវនាវដូច្នេះធ្វើឡើងក្នុងពិធីបុណ្យបញ្ចុះខណ្ឌសីមាព្រះវិហារថ្មី នៅវត្តសំពៅផុស ហៅវត្តតាំងបំពង់ ស្ថិតក្នុងភូមិតាំងបំពង់ ឃុំតាសាល ស្រុកឱរ៉ាល់ ខេត្តកំពង់ស្ពឺ។

ឯកឧត្តមបណ្ឌិត ជាម ច័ន្ទសោភ័ណ បានលើកឡើងថា   ស្រុកឱរ៉ាល់គឺជាស្រុកមួយដែលធ្លាប់រងគ្រោះដោយសង្គ្រាមរ៉ាំរ៉ៃអូសបន្លាយជាច្រើនឆ្នាំ។ក្រោមគោលនយោបាយឈ្នះ ឈ្នះរបស់រាជរដ្ឋាភិបាល ស្រុកនេះត្រូវបានប្រកាសនៅឆ្នាំ១៩៨៥ដោយកាត់ចេញពីស្រុកថ្ពង និងស្រុកភ្នំស្រួច។ ក្រោយប្រកាស សមិទ្ធផលជាច្រើនត្រូវបានផុសឡើងជាបន្តបន្ទាប់ ហើយក្នុងនោះរមណីយដ្ឋានធម្មជាតិដែលមានក្នុងស្រុកនេះក៏ត្រូវបានគាស់រំលើង និងធ្វើការអភិវឌ្ឍន៍ ដើម្បីទទួលស្វាគមន៍ភ្ញៀវទេសចរជាតិ អន្តរជាតិមកលេងកម្សាន្ត។

ជាមួយគ្នានោះ ឯកឧត្តមបណ្ឌិត បានបន្ថែមដោយគូសបញ្ជាក់ថា ដើម្បីឱ្យកំណើនភ្ញៀវទេសចរមកលេងកម្សាន្តច្រើនក្នុងស្រុកនេះ អាជ្ញាធរ សហគមន៍ និងប្រជាពលរដ្ឋក្នុងមូលដ្ឋានគប្បីធ្វើការរៀបចំអនាម័យ និងសោភ័ណភាពនៅតាមកន្លែងសាធារណៈ តំបន់ទេសចរណ៍ វត្តអារាម និងមូលដ្ឋាននៅទូទាំងស្រុកឱ្យបានល្អប្រសើរធ្វើយ៉ាងណាឱ្យសោភ័ណភាពនៃស្រុកនេះ និងទីរមណីយដ្ឋានមើលឃើញមានភាពស្រស់ស្អាត និងមានបរិស្ថានល្អ ជាទីគយគន់របស់ភ្ញៀវទេសចរជាតិ និងអន្តរជាតិ ដែលធ្វើដំណើរមកចូលរួមកម្សាន្ត សប្បាយរីករាយ ។

លើសពីនេះ មន្ទីរបរិស្ថានខេត្តត្រូវសហការជាមួយអាជ្ញាធរមូលដ្ឋាន សហគមន៍ រៀបចំឱ្យមានទីកន្លែងទុកដាក់សំរាមឱ្យបានត្រឹមត្រូវ ដាំកូនឈើ ដើមផ្កានៅអមសងខាងផ្លូវ ពិសេសផ្លូវចូលទៅកាន់រមណីយដ្ឋាននានា ដើម្បីបង្កើនសោភ័ណភាព និងភាពស្រស់បំព្រង៕

ដោយ  ម៉ែន ប៊ុនធីម