AKP ភ្នំពេញ ថ្ងៃទី១៨ ខែមីនា ឆ្នាំ២០២៦--ក្នុងគោលដៅជំរុញអភិបាលកិច្ចលើវិស័យសាធារណការ ដឹកជញ្ជូន អាកាសចរណ៍ស៊ីវិល ប្រៃសណីយ៍ ទូរគមនាគមន៍ ឧស្សាហកម្ម វិទ្យាសាស្ត្រ បច្ចេកវិទ្យា នវានុវត្តន៍ រ៉ែ ថាមពល     ពាណិជ្ជកម្ម រៀបចំដែនដី នគរូបនីយកម្ម និងសំណង់ ឱ្យកាន់តែមានប្រសិទ្ធភាព នាព្រឹកថ្ងៃទី១៨ ខែមីនា ឆ្នាំ២០២៦ នេះ លោកជំទាវ និន សាផុន ប្រធានគណៈកម្មការ (គណៈកម្មការទី៩) នៃរដ្ឋសភា បានដឹកនាំកិច្ចប្រជុំផ្ទៃក្នុង ដើម្បីបូកសរុបលទ្ធផលការងារសំខាន់ៗ និងដាក់ចេញទិសដៅយុទ្ធសាស្ត្រសម្រាប់អនុវត្តបន្ត។

តាមរយៈកិច្ចប្រជុំ គណៈកម្មការទី៩ នៃរដ្ឋសភា បានពិភាក្សាលើរបៀបវារៈសំខាន់ៗរួមមាន៖
១.  ការវាស់វែងជោគជ័យនៃសិក្ខាសាលាយុទ្ធសាស្ត្រ៖ អង្គប្រជុំបានធ្វើការវាយតម្លៃផ្អែកលើលទ្ធផលនៃសិក្ខាសាលាស្តីពី «ភាពធន់ និងកាលានុវត្តភាពនៃយុទ្ធសាស្ត្រអភិបាលកិច្ច វិទ្យាសាស្ត្រ បច្ចេកវិទ្យា នវានុវត្តន៍ ឧស្សាហកម្ម និងពាណិជ្ជកម្មកម្ពុជា» ដែលបានប្រព្រឹត្តទៅកាលពីថ្ងៃទី១២ ខែមីនាកន្លងទៅ។ ការវាយតម្លៃនេះ ធ្វើឡើងដើម្បីធានាថា រាល់ធាតុចូលដែលទទួលបាន នឹងត្រូវយកទៅបំប្លែងជាសកម្មភាពជាក់ស្តែង ក្នុងការគាំទ្រដល់ការអភិវឌ្ឍសេដ្ឋកិច្ចឌីជីថល និងឧស្សាហកម្មទំនើប។

២. ផែនការសកម្មភាពអំឡុងពេលវិស្សមកាល៖ បើទោះបីជាស្ថិតក្នុងអំឡុងពេលវិស្សមកាលរដ្ឋសភាក៏ដោយ ក៏គណៈកម្មការទី៩ បានត្រៀមលក្ខណៈរួចជាស្រេចនូវ ផែនការចុះបេសកកម្មតាមបណ្តាខេត្ត ដើម្បីពិនិត្យស្ថានភាពជាក់ស្តែងនៃហេដ្ឋារចនាសម្ព័ន្ធ និងការអនុវត្តច្បាប់ដែលស្ថិតក្រោមសមត្ថកិច្ចរបស់ខ្លួន។

៣ . ការពង្រឹងការងារព្រឹត្តិបត្រព័ត៌មាន៖ ដើម្បីបង្កើនការផ្សារភ្ជាប់ទំនាក់ទំនងជាមួយសាធារណជន គណៈកម្មការបានពិភាក្សាលើការរៀបចំ «ព្រឹត្តិបត្រព័ត៌មាន» ដែលជាឧបករណ៍ឆ្លុះបញ្ចាំងពីសមិទ្ធផលការងារ និងវឌ្ឍនភាពនៃវិស័យដែលខ្លួនគ្រប់គ្រង។

តាមរយៈកិច្ចប្រជុំនៅថ្ងៃនេះគណៈកម្មការទី៩ បានបង្ហាញពីការប្តេជ្ញាចិត្តខ្ពស់ក្នុងការបំពេញតួនាទីជាសេនាធិការជូនរដ្ឋសភា ដើម្បីត្រួតពិនិត្យ និងជំរុញការអនុវត្តគោលនយោបាយរបស់រាជរដ្ឋាភិបាលលើវិស័យគន្លឹះៗ ឱ្យទទួលបានជោគជ័យប្រកបដោយចីរភាព៕

ដោយ៖ ប៊ុនរិទ្ធ , ប្រភព៖ រដ្ឋសភា