AKP បន្ទាយមានជ័យ ថ្ងៃទី១៨ ខែមីនា ឆ្នាំ២០២៦--ក្នុងស្មារតីសាមគ្គីភាព និងការយកចិត្តទុកដាក់ខ្ពស់ចំពោះសុខទុក្ខរបស់ប្រជាពលរដ្ឋដែលរស់នៅតាមបណ្តោយខ្សែបន្ទាត់ព្រំដែន នាព្រឹកថ្ងៃទី១៨ ខែមីនា ឆ្នាំ២០២៦ នេះ ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត បានអញ្ជើញជាអធិបតីក្នុងពិធីចែកអំណោយមនុស្សធម៌ដល់គ្រួសារដែលរងផលប៉ះពាល់ខូចខាតផ្ទះសម្បែង ចំនួន ១៩៧គ្រួសារ នៅបរិវេណសាលាស្រុកថ្មពួក។    
នៅក្នុងឱកាសនោះ ឯកឧត្តម អ៊ុ រាត្រី បានពាំនាំនូវប្រសាសន៍ផ្ដាំផ្ញើសួរសុខទុក្ខពីសំណាក់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាល សម្តេចទាំងទ្វេតែងតែយកចិត្តទុកដាក់ និងគិតគូរពីជីវភាពរស់នៅរបស់បងប្អូនប្រជាពលរដ្ឋនៅគ្រប់ទីកន្លែង ដោយមិនប្រកាន់និន្នាការនយោបាយ ពណ៌សម្បុរ ឬសាសនាឡើយ។

ឯកឧត្តមបានសង្កត់ធ្ងន់ថា «ទោះបីក្នុងកាលៈទេសៈណាក៏ដោយ កាកបាទក្រហមកម្ពុជាដែលមានសម្តេចកិត្តិព្រឹទ្ធបណ្ឌិតជាប្រធាន មិនដែលទុកឱ្យបងប្អូនណាម្នាក់រងគ្រោះដោយអត់បាយ និងនៅឯកោដោយគ្មានការជួយជ្រោមជ្រែងនោះទេ ជាពិសេសបងប្អូនដែលឈរជើងការពារទឹកដី និងរងគ្រោះដោយសារសង្គ្រាមឈ្លានពានមកលើអធិបតេយ្យភាពកម្ពុជានាពេលកន្លងមក»។    
ជាមួយគ្នានោះ ឯកឧត្តមអភិបាលខេត្ត ក៏បានលើកឡើងពីវីរៈភាពរបស់បងប្អូនប្រជាពលរដ្ឋដែលបានរស់នៅ និងរឹងមាំទប់ទល់នឹងផលវិបាកបង្កឡើងដោយជម្លោះព្រំដែន។ ឯកឧត្តមបានបញ្ជាក់ថា រាជរដ្ឋាភិបាលតែងតែចាត់ទុកបងប្អូននៅតាមព្រំដែន ជា "របងដ៏រឹងមាំ" ក្នុងការការពារបូរណភាពទឹកដី ដូច្នេះការផ្ដល់ជំនួយនៅពេលនេះ មិនត្រឹមតែជាការជួយសម្រាលទុក្ខលំបាកផ្នែកជីវភាពប៉ុណ្ណោះទេ ប៉ុន្តែជាការផ្ដល់កម្លាំងចិត្ត និងការដឹងគុណចំពោះការលះបង់របស់ពលរដ្ឋគ្រប់រូប។    

ក្រោយពីទទួលបានអំណោយមនុស្សធម៌នាពេលនេះ បងប្អូនប្រជាពលរដ្ឋដែលរងគ្រោះបានសម្ដែងនូវក្ដីរំភើបយ៉ាងខ្លាំង។ តំណាងពលរដ្ឋម្នាក់ដែលខូចខាតផ្ទះសម្បែងបានលើកឡើងទាំងក្ដីរំភើបថា «ពួកខ្ញុំពិតជាត្រេកអរណាស់ដែលថ្នាក់ដឹកនាំមិនបោះបង់ចោលពួកខ្ញុំ។ នៅពេលដែលពួកខ្ញុំជួបការលំបាកខ្លាំងបំផុត កាកបាទក្រហមតែងតែមកដល់មុនគេជានិច្ច»។ ការចុះមកដោយផ្ទាល់របស់ឯកឧត្តមអភិបាលខេត្ត ធ្វើឱ្យពួកខ្ញុំមានអារម្មណ៍ថាកក់ក្ដៅ និងមានកម្លាំងចិត្តក្នុងការរៀបចំជីវភាពឡើងវិញ បន្ទាប់ពីឆ្លងកាត់គ្រាដ៏លំបាកនៃជម្លោះតាមព្រំដែន។    

អំណោយដែលបានចែកជូននាពេលនេះ រួមមានស្បៀងអាហារ គ្រឿងឧបភោគបរិភោគ និងសម្ភារៈប្រើប្រាស់ចាំបាច់មួយចំនួនទៀត ដែលជាការចូលរួមចំណែកយ៉ាងសំខាន់ក្នុងការស្ដារជីវភាពគ្រួសាររងគ្រោះឱ្យមានភាពប្រសើរឡើងវិញជាជំហានៗ៕

ដោយ ឈុន សារ៉ាត