AKP ភ្នំពេញ ថ្ងៃទី១៨ ខែមីនា ឆ្នាំ២០២៦-- ឯកឧត្តមសាស្ត្រាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានមានប្រសាសន៍ថា «ការបម្រើសេវាថែទាំ និងព្យាបាលដោយភាពរាក់ទាក់ ស្និទ្ធស្នាលដល់ប្រជាជន បង្ហាញឱ្យឃើញពីភាពថ្លៃថ្នូរបស់អ្នកប្រកបវិជ្ជាជីវៈសុខាភិបាល» ក្នុងឱកាសដែលឯកឧត្តមដឹកនាំវគ្គភាពអ្នកដឹកនាំ និងនវានុវត្តន៍ ដែលមានមន្រ្តីសុខាភិបាលគ្រប់ឋានានុក្រម ក្រោមឱវាទក្រសួងសុខាភិបាលចូលរួមតាមប្រព័ន្ធវីដេអូសន្និសីទ (Zoom) សរុបចំនួន៣៣៦៤នាក់ នារសៀលថ្ងៃទី១៧ ខែមីនា ឆ្នាំ២០២៦។

ក្នុងវគ្គនោះ ឯកឧត្តមសាស្រ្តាចារ្យរដ្ឋមន្រ្តីបានផ្តល់អនុសាសន៍សម្រាប់ការកែលម្អដំណើរការនៃការបម្រើសេវាថែទាំសុខភាពបឋម ឱ្យកាន់តែមានភាពរាក់ទាក់ និងស្និទ្ធស្នាលជូនប្រជាជនដែលតម្រូវឱ្យអ្នកបម្រើសេវាត្រៀមលក្ខណៈ ផ្តល់សេវា២៤ម៉ោង ដោយមានឯកសណ្ឋាន និងសម្ភារសមរម្យ។ អ្នកបម្រើសេវាក៏ត្រូវតែមានប្រាស្រ័យទាក់ទងជាមួយអ្នកជំងឺដោយរាក់ទាក់ សាកសួរអ្នកជំងឺតាមបច្ចេកទេស កត់ត្រាប្រព័ន្ធព័ត៌មានអ្នកជំងឺ ពន្យល់ណែនាំពីការប្រើប្រាស់ឱសថ ការអប់រំសុខភាព និងជម្រាបអ្នកជំងឺពីការតាមដានស្ថានភាពជំងឺ។

ទន្ទឹមនឹងនេះ ឯកឧត្តមសាស្រ្តាចារ្យរដ្ឋមន្រ្តីបានលើកយកពាក្យគន្លឹះមួយចំនួនមកធ្វើការបកស្រាយ៖ ១) ពាក្យថា អ្នកទទួលខុសត្រូវ (អ្នកកាន់ការ) ជាពាក្យមួយដូចគ្នានឹងពាក្យអ្នកដឹកនាំដែរ តែពាក្យនេះមិនសំដៅទៅលើមុខតំណែង និងតួនាទីរបស់បុគ្គលទេ ព្រោះអ្នកទទួលខុសត្រូវ ឬអ្នកដឹកនាំជាអ្នកដែលទទួលខុសត្រូវលើបេសកកម្ម ដែលខ្លួនត្រូវបំពេញទោះតូចឬធំក្តី។ (២) ពាក្យថា អ្នកពាក់ព័ន្ធ គឺជាបុគ្គលឬសហភាតរៈរបស់អ្នកទទួលខុសត្រូវ អ្នកពាក់ព័ន្ធអាចជាអ្នកដែលនៅក្នុងអង្គភាពជាមួយគ្នា ឬ អ្នកដែលនៅក្រៅអង្គភាពឬក្រៅស្ថាប័ន។

ជាកិច្ចបន្ត ក្រុមការងារមន្ទីរពេទ្យបង្អែកខេត្តសៀមរាបបានធ្វើបទបង្ហាញចែករំលែកបទពិសោធន៍ នៃការបម្រើសេវាថែទាំ និងព្យាបាលក្នុងពេលមានសង្គ្រាមឈ្លានពាន ក្នុងស្ថានភាពជាមន្ទីរពេទ្យនៅកៀកនឹងតំបន់សង្រ្គាម។ ក្រោយពីបទបង្ហាញនិងការពិភាក្សា ឯកឧត្តមសាស្រ្តាចារ្យ កុយ វ៉ាន់នី បានរំលេចឡើងវិញរូបមន្តសម្រាប់ការទទួលបានជោគជ័យ ដែលមានបញ្ចូលនូវស្មារតីតែមួយ(Unity of the spirit) របស់មន្ត្រីសុខាភិបាល និងការអនុវត្តខ្ជាប់ខ្ជួនតាមគោលការណ៍ ទំនាក់ទំនងដោយប្រសិទ្ធភាព សម្របសម្រួលដោយយោគយល់ និងឆ្លើយតបបន្ទាន់តាមសភាពការណ៍ រួមទាំងទឹកចិត្ត មេត្តានិងករុណា៕

ដោយ ទេស ច័ន្ទសុធារី (ប្រភព៖ ក្រសួងសុខាភិបាល)