AKP កំពង់ចាម ថ្ងៃទី១៨ ខែមីនា ឆ្នាំ២០២៦-- មិនខុសពីឆ្នាំមុនៗ ដើម្បីបង្កភាពសប្បាយរីករាយដល់បងប្អូនប្រជាពលរដ្ឋ និងអបអរសាទរពិធីបុណ្យចូលឆ្នាំថ្មី ឆ្នាំមមី ខាងមុខនេះ អាជ្ញាធរខេត្តកំពង់ចាមនឹងរៀបចំ «ព្រឹត្តការណ៍សង្ក្រាន្តកំពង់ចាមឆ្នាំ២០២៦» ដែលមានរយៈពេល៣ថ្ងៃ គឺថ្ងៃទី១៤-១៥-១៦ ខែមេសា ខាងមុខ នៅបរិវេណសួនស្មៅសាធារណៈមុខសាលាខេត្ត។

យោងសេចក្តីជូនដំណឹងស្តីពីការរៀបចំកម្មវិធី និងព្រឹត្តិការណ៍សង្ក្រាន្តកំពង់ចាមបានបង្ហាញថាព្រឹត្តិការណ៍សង្ក្រាន្ត ដើម្បីចូលរួមអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី ដែលនឹងប្រព្រឹត្តទៅរយៈពេល៣ថ្ងៃ ត្រូវនឹងថ្ងៃអង្គារ-ពុធ-ព្រហស្បតិ៍ ទី១៤-១៥-១៦ ខែមេសា ឆ្នាំ២០២៦ ខាងមុខនេះ រដ្ឋបាលខេត្តនឹងរៀបចំនូវកម្មវិធី និងព្រឹត្តិការណ៍សង្ក្រាន្តកំពង់ចាម រួមមានព្រឹត្តិការណ៍លៀសហាល៥តោន ដោយមានការតាំងពិព័រណ៍ភូមិ១ផលិតផល១  ស្តង់ចំណីអាហារ ៣៤ មុខ បង្ហាញតាមដងផ្លូវមុខសាលាខេត្ត ការបង្ហាញរបស់យុវជនភូមិវប្បធម៌ ការលេងល្បែង របាំប្រជាប្រិយខ្មែរ សួនស្មៅមុខសាលាខេត្ត និងក្នុងរយ:ពេល៣ថ្ងៃ មានការប្រគុំតន្រ្តីខ្នាតយក្ស និងការប្រកួតប្រដាល់ខ្នាតអន្តរជាតិ នៅសួនវិមានឯករាជ្យចាប់ពីម៉ោង៥៖០០ល្ងាចតទៅ។

ដោយឡែកនៅតាមបណ្តាក្រុង-ស្រុកក៏មានរៀបចំព្រឹត្តិការណ៍សង្ក្រាន្តនៅតាមស្រុក ដូចជាបាធាយមានកម្មវិធីម្សាន្តសង្ក្រាន្តឆ្នាំថ្មីល្បែងខ្លែងឆាបកូនមាន់ និងព្រឹត្តិការណ៍ស្ងោរពងទាកូន១២,១២៦គ្រាប់ ក្នុងបរិវេណសាលាស្រុក។ ស្រុកជើងព្រៃមានព្រឹត្តិការណ៍ ប្រគុំតន្ត្រី និងនំបញ្ចុក១២០០គីឡូក្រាម។ ស្រុកស្ទឹងត្រង់ ព្រឹត្តិការណ៍ចេកអំបូងលឿង។ ស្រុកកំពង់សៀមព្រឹត្តិការណ៍ប៉ិកួៈ។ ស្រុកស្រីសន្ធររៀបចំព្រឹត្តិការណ៍ល្បែងប្រជាប្រិយ និងការប្រណាំងក្របី។ ស្រុកកងមាសមានព្រឹត្តិការណ៍ បង្ហាញផ្លែស្វាយចំនួន១១៣ ៩៤៨ ផ្លែ។ ស្រុកកោះសូទិនមានព្រឹត្តិការណ៍ ពោតស្ងោរចំនួន៨៨៨៦ផ្លែនិង ស្រុកព្រៃឈរមានរៀបចំនំអន្សមខ្មែរចម្រុះចំនួន១៥៥៧៨០នំ។

រដ្ឋបាលខេត្តសូមធ្វើការអំពាវនាវដល់បងប្អូនជនរួមជាតិ ភ្ញៀវទេសចរជាតិនិងអន្តរជាតិអញ្ជើញចូលរួមក្នុងកម្មវិធីសង្ក្រាន្តកំពង់ចាមឱ្យបានច្រើនកុះករដោយខេត្តមានរមណីយដ្ឋានទេសចរណ៍ជាច្រើនកន្លែង និងមានរៀបចំនូវព្រឹត្តិការណ៍ជាច្រើនសម្រាប់បងប្អូនចូលរួមកម្សាន្តសប្បាយក្នុងឱកាសបុណ្យចូលឆ្នាំថ្មីប្រពៃណីជាតិខ្មែរយើងខាងមុខនេះ៕

ដោយ ឆាយ ម៉ុត