AKP បន្ទាយមានជ័យ ថ្ងៃទី១៨ ខែមីនា ឆ្នាំ២០២៦--ក្នុងស្មារតីយកចិត្តទុកដាក់ខ្ពស់ចំពោះសុខទុក្ខ និងជីវភាពរបស់កងកម្លាំងប្រដាប់អាវុធដែលកំពុងបំពេញបេសកកម្មការពារជាតិ កាលពីថ្ងៃទី១៧ ខែមីនា ឆ្នាំ២០២៦ កន្លងទៅនេះ លោក ឃុន វុទ្ធី ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តបន្ទាយមានជ័យ បានដឹកនាំក្រុមការងារចុះផ្ទាល់ដើម្បីប្រគល់អំណោយជាស្បៀងអាហារ និងគ្រឿងឧបភោគបរិភោគជូនដល់កងកម្លាំងទាំង ៣ ប្រភេទ (កងយោធពលខេមរភូមិន្ទ កងរាជអាវុធហត្ថ និងនគរបាលការពារព្រំដែន) ដែលកំពុងឈរជើងតាមបណ្តោយព្រំដែនក្នុងភូមិសាស្ត្រខេត្តបន្ទាយមានជ័យ។

ក្នុងឱកាសនោះ លោក ឃុន វុទ្ធី បានពាំនាំនូវប្រសាសន៍ផ្ដាំផ្ញើសួរសុខទុក្ខដោយក្ដីនឹករលឹកបំផុតពីសំណាក់ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងលោកជំទាវ ជា ផល្គុន។ លោកប្រធានមន្ទីរបានគូសបញ្ជាក់ថាការចុះមកនាពេលនេះគឺជាការបង្ហាញពីការយកចិត្តទុកដាក់ និងមនោសញ្ចេតនាដ៏ជ្រាលជ្រៅរបស់ឯកឧត្តមរដ្ឋមន្ត្រី ចំពោះកងកម្លាំងប្រដាប់អាវុធគ្រប់ប្រភេទ ដែលបាននិងកំពុងលះបង់កម្លាំងកាយចិត្ត ឈរជើងយ៉ាងអង់អាចក្លាហាននៅតាមសមរភូមិមុខ ដើម្បីការពារបូរណភាពទឹកដី និងសេចក្តីសុខសាន្តរបស់ប្រជាពលរដ្ឋពីការឈ្លានពានរបស់សត្រូវ។

លោកបានបន្ថែមថា ទោះបីអំណោយទាំងនេះមានចំនួនមិនច្រើនលើសលប់ ប៉ុន្តែវាជាសក្ខីភាពនៃសាមគ្គីភាព និងការដឹងគុណចំពោះវីរភាពរបស់បងប្អូនកងកម្លាំងដែលមិនអាចកាត់ថ្លៃបាន។ អំណោយដែលបានចែកជូនដល់អង្គភាពកងកម្លាំងទាំង ៣ រួមមានអង្ករ (ស្បៀងបម្រុងយុទ្ធសាស្ត្រ) គ្រឿងឧបភោគបរិភោគ (ទឹកត្រី ទឹកស៊ីអ៊ីវ មី និងសម្ភារចាំបាច់ផ្សេងៗ)។

ជាការឆ្លើយតប តំណាងកងកម្លាំងទាំង៣ប្រភេទដែលបានទទួលអំណោយ បានសម្ដែងនូវក្ដីរំភើបរីករាយ និងអំណរគុណយ៉ាងជ្រាលជ្រៅចំពោះ ឯកឧត្តម ជា សុមេធី និងក្រុមការងារមន្ទីរសង្គមកិច្ចខេត្ត។ ពួកគាត់បានលើកឡើងថា ការចុះមកសួរសុខទុក្ខដល់មូលដ្ឋានផ្ទាល់បែបនេះ គឺជាការលើកទឹកចិត្តយ៉ាងធំធេង ដែលធ្វើឱ្យពួកគាត់កាន់តែមានស្មារតីរឹងមាំ និងប្តេជ្ញាចិត្តខ្ពស់ក្នុងការការពារដាច់ខាតនូវទឹកដីមាតុភូមិ មិនឱ្យសត្រូវណាមកបំពានបានឡើយ៕

ដោយ ឈុន សារ៉ាត