AKP កំពង់ចាម ថ្ងៃទី១៧ ខែមីនា ឆ្នាំ២០២៦–

សំដៅពង្រីកវិសាលភាព នៃចលនានិង សកម្មភាពមនុស្សធម៌ ក្នុងការឆ្លើយតបចំពោះគ្រោះថ្នាក់ជាយថាហេតុ ណារមួយ នៅតាមមូលដ្ឋាន ក្នុងសហគមន៍ សាខាកាកបាទក្រហមកម្ពុជា ខេត្តកំពង់ចាម នៅថ្ងៃទី១៧ ខែមីនា ឆ្នាំ២០២៦នពបានបើកវគ្គបណ្ដុះបណ្ដាល អ្នកស្ម័គ្រចិត្តកាកបាទក្រហមកម្ពុជាឃុំចំនួន៥០នាក់ ដែលពិធីនេះធ្វើ នៅសាលាស្រុកស្ទឹងត្រង់ខេត្តកំពង់ចាម ក្រោមអធិបតីភាពរបស់ឯកឧត្តម ទូច ឆៃ នាយកសាខា តំណាងដ៏ខ្ពង់ខ្ពស់ ឯកឧត្តម អ៊ុន ចាន់ដា ប្រធានគណៈកម្មាធិការសាខា ។

ថ្លែងក្នុងឱកាសនោះឯកឧត្តម ទូច ឆៃ នាយកសាខា បានលើកឡើងថាវគ្គបណ្ដុះបណ្ដាលអ្នកស្ម័គ្រចិត្តថ្មីចំនួន៥០នេះ ពិតជាមានសារៈសំខាន់ណាស់ ដើម្បីឲ្យអ្នកស្ម័គ្រចិត្តថ្មី បានយល់ដឹង អំពីនៃប្រវត្តិចលនា គោលការណ៍គ្រឹះ និងវិជ្ជាសង្គ្រោះបឋម ក្នុងការផ្ទេរចំណេះដឹងតាមទ្រឹស្ដី ដល់អ្នកស្ម័គ្រចិត្តថ្មីឱ្យដឹងនឹងយល់ច្បាស់ពីប្រវត្តិនៃការកកើតចលនាកាកបាទក្រហម និងតួនាទីដ៏សំខាន់របស់កាកបាទក្រហមកម្ពុជាក្នុងសង្គមជាតិ។

ឯកឧត្តមនាយកសាខា បានបញ្ជាក់ថា វគ្គបំប៉នជំនាញនិងវិជ្ជាសង្គ្រោះបឋមជាជំនាញជីវិត សម្រាប់ជួយសង្គ្រោះជនរងគ្រោះក្នុងករណីមានគ្រោះថ្នាក់ដោយចៃដន្យ នៅកន្លែងណាមួយ ដូចជាកន្លែងការងារ សាលារៀន ឬក្នុងសហគមន៍បានទាន់ពេលវេលា និងប្រកបដោយប្រសិទ្ធភាព។

ឯកឧត្តមទូច ឆៃ បានបន្ថែមថា វគ្គបណ្តុះបណ្តាលក្រុមការងារបច្ចេកទេសបានផ្ដោតសំខាន់លើខ្លឹមសារចំនួន២គឺទី១. ការយល់ដឹងពីចលនាកាកបាទក្រហម និងអឌ្ឍចន្ទក្រហមអំពីគោលការណ៍គ្រឹះទាំង៧នៃចលនាមនុស្សធម៌អន្តរជាតិ។ ទី២. បច្ចេកទេសវិជ្ជាសង្គ្រោះបឋម ដែលសិក្សាទាំងទ្រឹស្ដី ឈរលើការអនុវត្តជាក់ស្ដែង ការវាយតម្លៃសភាពការណ៍ តួនាទីអ្នកសង្គ្រោះ  និងវិធីសាស្ត្របញ្ជូនជនរងគ្រោះទៅកាន់មន្ទីរពេទ្យដោយសុវត្ថិភាព។

ឯកឧត្តមទូច ឆៃ  បានក្រើនរំលឹកដល់បងប្អូនអ្នកស្ម័គ្រចិត្តជាសិក្ខាកាមទាំងអស់ អោយខិតខំយកអស់ស្មារតីទទួលខុសត្រូវខ្ពស់ ព្រោះ ចំណេះដឹងដែលទទួលបាននៅថ្ងៃនេះ គឺជាអាវុធដ៏មានតម្លៃសម្រាប់ជួយខ្លួនឯង និងអ្នកដទៃ។ ចូរយកចំណេះដឹងនេះទៅប្រើប្រាស់ឱ្យចំគោលដៅ និងជួយផ្សព្វផ្សាយដល់ក្រុមគ្រួសារ និងមិត្តភក្តិ ដើម្បីឱ្យសហគមន៍របស់យើងកាន់តែមានសុវត្ថិភាពនិងជាធនធានរបស់កាកបាទក្រហមថ្មីនិងជាភ្នាក់ងារនៃ ចលនាជួយដល់ជនរងគ្រោះជាបង្អែកដ៏រឹងមាំសម្រាប់កិច្ចការមនុស្សធម៌នៅមូលដ្ឋាន៕

ដោយ៖ ឆាយ ម៉ុត