AKP ភ្នំពេញ ថ្ងៃទី១៦ ខែមីនា ឆ្នាំ២០២៦--ឯកឧត្តម Danny Annan ឯកអគ្គរាជទូតដាណឺម៉ាក ប្រចាំនៅកម្ពុជា បានសម្ដែងនូវការពេញចិត្តចំពោះជំហររបស់កម្ពុជា ក្នុងការដោះស្រាយបញ្ហាព្រំដែនរវាងកម្ពុជា និងថៃ ដោយឈរលើការគោរពបទឈប់បាញ់ និងការដោះស្រាយដោយសន្តិវិធី។ នេះបើតាមការឱ្យដឹងរបស់ឯកឧត្ដម ជា ធីរិទ្ធ អ្នកនាំពាក្យព្រឹទ្ធសភា បន្ទាប់ពីសម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទីនៃព្រះរាជាណាចក្រកម្ពុជា បានអនុញ្ញាតឱ្យឯកឧត្តម Danny Annan ឯកអគ្គរាជទូតនៃប្រទេសដាណឺម៉ាក ប្រចាំនៅកម្ពុជា ចូលជួបសម្តែងការគួរសម និងពិភាក្សាការងារ នាព្រឹកថ្ងៃទី១៦ ខែមីនា ឆ្នាំ២០២៦ នៅវិមានសាមគ្គីភាព នៃព្រឹទ្ធសភា។

ក្នុងជំនួបនោះ សម្ដេចតេជោប្រមុខរដ្ឋស្ដីទី បានសម្ដែងនូវការស្វាគមន៍ និងរីករាយដែលបានជួបជាមួយឯកឧត្ដមឯកអគ្គរាជទូត ហើយសង្ឃឹមថា ទំនាក់ទំនងរវាងកម្ពុជា និងដាណឺម៉ាក កាន់តែរីកចម្រើនបន្ថែមទៀត ក្រោមការដឹកនាំរបស់ឯកឧត្តម Danny Annan ជាឯកអគ្គរាជទូតប្រទេសដាណឺម៉ាក ប្រចាំនៅព្រះរាជាណាចក្រកម្ពុជា។ សម្ដេចតេជោ ក៏បានបង្ហាញនូវការពេញចិត្តចំពោះទំនាក់ទំនងរវាងប្រទេសទាំងពីរកន្លងមក ដែលមានភាពល្អប្រសើរ ហើយសង្ឃឹមថា នៅឆ្នាំក្រោយ ដែលជាខួប៦០ឆ្នាំ នៃទំនាក់ទំនងរវាងកម្ពុជា និងដាណឺម៉ាក ប្រទេសទាំងពីរ នឹងមានការរៀបចំនូវកម្មវិធីនានា ដើម្បីអបអរសាទខួប៦០ឆ្នាំ ដែលមកដល់នៅឆ្នាំក្រោយនេះ។ 

ជាមួយគ្នានេះ ឯកឧត្តមឯកអគ្គរាជទូត Danny Annan បានសម្ដែងនូវការអរគុណជាអនេកកប្បការ ចំពោះសម្ដេចតេជោ ដែលបានអនុញ្ញាតឱ្យឯកឧត្ដម និងសហការី បានចូលជួបសម្ដែងការគួរសមក្នុងឱកាសនេះ។ ឯកឧត្ដមបានលើកឡើងថា ក្នុងការបំពេញបេសកកម្មការទូតនៅកម្ពុជា ឯកឧត្ដមនឹងខិតខំប្រឹងប្រែងក្នុងការពង្រីកទំនាក់ទំនងរវាងកម្ពុជា និងដាណឺម៉ាក ឱ្យកាន់តែរីកចម្រើន ទាំងនៅក្នុងក្របខ័ណ្ឌនៃការទូតនយោបាយ ជាពិសេស គឺសេដ្ឋកិច្ច ពាណិជ្ជកម្ម និងការនិយោគរវាងប្រទេសទាំងពីរ។

សម្ដេចតេជោ ហ៊ុន សែន បានពេញចិត្តចំពោះការលើកឡើងរបសរបស់ឯកឧត្ដមឯកអគ្គរាជទូតដាណឺម៉ាក ដោយសម្ដេចបានឯកភាពទៅលើការធ្វើយ៉ាងណាឱ្យទំនាក់ទំនងរវាងកម្ពុជា និងដាណឺម៉ាក ទៅលើបញ្ហាសេដ្ឋកិច្ច ពាណិជ្ជកម្ម និងការវិនិយោគ ឱ្យមានភាពល្អប្រសើរ មានការកើនឡើង ស្របទៅនឹងកិច្ចសហប្រតិបត្តិការនៅក្នុងវិស័យនយោបាយការទូតរវាងប្រទេសទាំងពីរ ដែលមានជាមួយគ្នា។ សម្ដេចតេជោប្រមុខរដ្ឋស្ដីទីបានគូសបញ្ជាក់ថា ទំនាក់ទំនងរវាងកម្ពុជា និងដាណឺម៉ាក នៅមានសក្ដានុពលជាច្រើនទៀត ដែលភាគីទាំងពីរអាចពង្រីកជាមួយគ្នា ជាពិសេសក្នុងផ្នែកពាណិជ្ជកម្ម និងវិនិយោគ។ សម្ដេចតេជោ ក៏បានចែករំលែកនៅក្នុងស្ថានការណ៍អន្តរជាតិមួយចំនួនដែលកំពុងកើតមានឡើង ជាពិសេសបញ្ហាព្រំដែងរវាងកម្ពុជា និងថៃ ដែលបានកើតឡើងនាពេលកន្លងមក ហើយមកដល់ពេលនេះភាគីទាំងពីរ កំពុងតែអនុវត្តន៍នូវបទឈប់បាញ់។ សម្ដេចតេជោ ក៏បានបញ្ជាក់ពីជំហររបស់រាជរដ្ឋាភិបាលកម្ពុជាក្នុងពេលកន្លងមក ដែលសម្ដេចគាំទ្រចំពោះការរក្សានូវជំហរនៃការគោរពនៃបទឈប់បាញ់ និងការដោះស្រាយបញ្ហាដោយការចរចារដោយសន្តិវិធី។ 
ក្នុងឱកាសនោះ ឯកឧត្តម Danny Annan ក៏បានពេញចិត្តចំពោះជំហររបស់កម្ពុជា ក្នុងការដោះស្រាយបញ្ហាព្រំដែនរវាងកម្ពុជា និងថៃ ដោយឈរលើការគោរពបទឈប់បាញ់ និងការដោះស្រាយដោយសន្តិវិធី៕

ដោយ៖ ជឹម ណារី